Thangambere 33

Yakobo kud Esau Giripo Kindgi

1E Yakobo ting’o wang’e malu, man eneno, man, nen, Esau bebino, man dhanu dak ang’wen ni karacelo kude. Man epoko nyithindho ba Leya, man ba Rahel, man ba bong’ ario. 2Man eketho bong’ ku nyithindho migi gitelo yo, man Leya ku nyithindho pare yo ng’eigi, Rahel ku Yusuf de gidong’ cen. 3Man en gire ekadhu lokaca i wang’gi, e erum gire i ng’om wang’ abiro, maram etundo ko ceng’ni bang’ umin mire. 4Man Esau ringo kara eromb kude, e egwake, man epodho i ng’ute, e ecwio limbe: man giywak. 5E eting’o wang’e malu, man eneno mon ku nyithindho; e ewacu kumae, Maeni pa ng’a ma ni kudi? Man ewacu kumae, Nyithindho ma Mungu mio ni jatic peri ku berocwiny. 6Bong’ gilund gibino ceng’ni, gin ku nyithindhgi, e girum gigi. 7E Leya bende ku nyithindhe gibino ceng’ni, man girum gigi: man yo ku ng’eye Yusuf ubino ceng’ni giku Rahel, e girum gigi. 8Man ewacu kumae, Itimo ang’o kud ungu maeni ceke m’arombo kudo? Man ewacu kara anwang’ bero i wang’ rwoth para. 9Man Esau wacu kumae, Abedo ku m’uromo, umira; wek maeno m’ibedo ko ubed peri. 10Man Yakobo wacu kumae, Ungo, akwei, tek kawono anwang’u bero i weng’i, dong’ ijol giramia para kud i cinga; kum aneno weng’i calu ng’atu m’uneno wang’ Mungu, man mutoro nyai i weng’i, ni kuma. 11Gam, akwei, giramia para ma jukelo i beng’i; kum Mungu timo ku berocwiny i bang’a, man kum abedo ko m’uromo. Man ecuke, e egame. 12Man ewacu kumae, Dong’ watugu woth mwa, man wacidhu, e abicidho i weng’i. 13Man ewacu ire kumae, Rwoth para ng’eyo nia nyithindho gi tek ungo, man udul rombe ku dhok ma ni kuda gibedo ku nyithindhgi: man tek gilekogi ma sagu i ceng’ acel, udulne ceke bitho. 14Akwei, dong’ rwoth para kadh lokaca i wang’ jatic pare: man abiywaira yo yo, calu woth mi lim ma ni i wang’a man calku woth mi nyithindho, cil m’abino ko ba rwoth para ba Seir. 15E Esau wacu kumae, Nie dong’ awek dhanu moko m’i bang’a i beng’i. Man ewacu kumae, Nedi ke? dong’ anwang’ bero i wang’ rwoth para. 16Kum kumeno Esau dok i ceng’ maeca i yo pare ba Seir. 17Man Yakobo wotho ba Sukoth, man egomo ire ot, man eriko dwol ni lim pare: ka kumeno nying’ kakeca julwong’o Sukoth.

18E Yakobo bino i kwiocwiny bang’ adhura mi Cekem, ma ni i ng’om Kanan, kinde m’eai Padan-aram; man egonjo i wang’ adhurane. 19#Yoc 24:32; Yoh 4:5Man eng’iewo ng’et ng’om, ka m’eguro ie hema pare, i cing’ nyithindho pa Hamor, ma won Cekem, ku ng’et mola ma tar dak acel. 20Man eguro pemblam keca, man elwong’e El-Elohe-Israel.

Currently Selected:

Thangambere 33: AB1970

Highlight

Copy