Thangambere 40

Yusuf Ewo The Lek mi Jukol

1Man etimbre yo ng’ei gin maeni, nia jami giramadha ni ubimo mi Misiri man jatedo pare gikier ni rwoth migi m’ubimo mi Misiri. 2Man kwinyo nego Farao kum jego pare ario, kum jadit mi jumi giramadha, man kum jadit mi jutedo. 3Man eketho jukurogi i ot pa jego mi jukur, i otkol, i ka ma jutwio ie Yusuf. 4Man jadit mi jukur ung’olo ni Yusuf pigi, man etimo igi: e gibedo keca nindo moko i ka ma jukuro. 5E gileko lek gin ario, man lek pare man lek pare, i diewor acel, ng’atuman calku the lek pare, jami giramadha man jatedo p’ubimo mi Misiri, ma gibedo atwia i otkol. 6Man Yusuf ubino i bang’gi kugweno, e enenogi, man, nen, can unegogi. 7Man epenjo jego pa Farao ma gini kude i ka ma jukuro i ot pa jadit pare, ewacu kumae, Nedi wuneno piny kumeno ku can tini? 8E giwacu ire kumae, Waleko lek, man ng’atu moko mbe ma copo ewo there. Man Yusuf uwacu igi kumae, Ewo there ni ba Mungu ngo? yere ira, akwayuwu.

9Man jami giramadha ma jadit uyero lek pare ni Yusuf, man ewacu ire kumae, I lek para, nen, ulok ni i wang’a; 10man ulokne jange adek ni i kume: man ebedo calu ekudo, e thiwe yepo; man wicne konjo nyingulok m’ucek: 11e kikombe pa Farao ni i cinga; man agamu nyingulokne, e abiogi i kikombe pa Farao, man amio kikombene i cing’ Farao. 12E Yusuf uwacu ire kumae, Maeni en e there: jange adek en e ceng’ adek; 13ma fodi ceng’ adek kukadhu ngo Farao biting’o wii malu, man ebidwoki i tic maka peri: man ibimio kikombe pa Farao i cinge, calu ma naka ibeditimo ma fodi in i jami giramadha pare. 14Ento ipoi pira kinde ma lembe peri bedo miero, man inyuth bero ira, akwei, man iyer pira ni Farao, man iwodha kud i ot maeni: 15kum andha jukwala kud i ng’om mi Juebrania: man keni bende atimo gin moko ngo m’uketho giketha i otkol.

16Ka jatedo ma jadit uneno nia ewotherene e ber, ewacu ni Yusuf kumae, An bende ani i lek para, man, nen, katoko adek mi mugati ma tar ni i wia: 17man kwond cemo ceke m’ateda ma ni Farao ni i katoko ma yo malu; man winyo gicamugi ku i katoko kud i wia. 18E Yusuf uloko lembe, ewacu de kumae, Maeni en e there: katoko adek en e ceng’ adek; 19ma fodi ceng’ adek kukadhu ngo Farao biting’o wii kud i kumi, man ebilieri wi yen; man winyo bicamu ringi kud i kumi. 20Man etimbre i ceng’ mir adege, ma en e ceng’ ma junyolo ie Farao, nia etimo agba ni jutic pare ceke: man eting’o jami giramadha ma jadit man jatedo ma jadit i kind jutic pare. 21Man edwoko jami giramadha ma jadit ba tic ma kakare kendo; e emio kikombe i cing’ Farao: 22ento eliero jatedo ma jadit: calu Yusuf uewo there igi. 23Ento jami giramadha ma jadit upoi ungo pi Yusuf, ento wie wil pire.

Currently Selected:

Thangambere 40: AB1970

Highlight

Copy