Luka 2

Nyol pa Yesu

(Mt 1:18-25)

1Nie etimbre i ceng’ maeno, nia ng’ol uai ba Kaisari Augusto, nia jugor nying’ dhanu ngung’ m’i ng’om. 2Maeni en e goronying’ ma kwong’ane ma jular jugoro ka Kurenio bedo jabim mi Cami. 3Dhanu ceke eidho kubang’gi nzu bang’ adhura migi ma dhe nigoro nying’gi gigi. 4Yusuf bende idho malu m’eai i Galilaya, kud i adhura Nazareti, i Yahudi, ecidho bang’ adhura pa Daudi, ma julwong’o Beth-lehem, kum en e mi ot man wat pa Daudi; 5nigoro nying’gi gigi giku Mariamu ma cege, m’ebenyomo, ma ie teng’ni. 6Etimbre, kinde ma gini keca, nia ceng’ uromo kakare m’ebinyol i ie. 7Man enyolo wode ma kayu; eboye ku bongu mi mukere, man epiele i ka cemo mi dhiang’, kum kabedo mbe igi i odwelo.

Jukwac ku Jumalaika

8I ng’ombuno jukwac nuti, ma gibedo i thim, man gibekuro udul rombe migi ku diewor. 9Malaika pa Rwoth de cungo i bang’gi dwong’ pa Rwoth de caru piny i kumgi: lworo de negogi dit. 10Malaika wacu igi kumae, Lworo kud unegwu; kum nen, akelo iwu rwonglembe ma ber mir anyong’a ma dit ma bibedo ni dhanu ceke: 11kum tinuni junyolo iwu i adhura pa Daudi Jalar, ma en e Kristu ma Rwoth. 12Maeni en e giranyutha iwu: Wubinwang’u mukere ma juboyo ku bongu mi mukere, man evuto i ka ma juketho ie cam mi dhiang’. 13E eni eni udul malaika m’i polo ginuti karacelo ku malaika maeno gibepaku Mungu, giwacu kumae,

14Dwong’ ni Mungu ma malu ngbir,

Kwiocwiny de wi ng’om kind dhanu ma mutoro nege i kumgi.

15Man etimbre, kinde ma malaika ai i bang’gi gidok i polo, jukwac giwecri kumae, Dong’ wacidhu kawono i Beth-lehem, wanenu gin maeni m’utimbre, ma Rwoth uketho wang’eyo. 16Man gibino pio, ginwang’u Mariamu giku Yusuf, ku mukere de m’uvuto ka ma juketho ie cam mi dhiang’. 17Ka ginene de, giketho jung’eyo pi lembe m’uyere igi pi nyathin maeni. 18Dhanu ceke m’uwinjo maeni igi wang’ lii kum lembe ma jukwac uyero igi. 19Ento Mariamu kanu lembe maeni ceke, epido pigi i achindene. 20Jukwac gidok, ku yungo Mungu ku pake de pi gin ceke ma giwinjo ma gineno de, cil calu eyere igi.

Jutimo Yaa Kum Yesu

21 # Law 12:3; Lk 1:31 Ka ceng’ abora romo mi timo yaa i kume, jucaku nyinge Yesu, calu malaika lwong’o ma fodi jukugamu icne ngo.

Juthiero Yesu i Hekalu

22Ka ceng’ uromo mi dwokri leng’ migi calku cik pa Musa, gikele malu Yerusalem nithiere ba Rwoth 23#Ai 13:2, 12(calu egore i cik pa Rwoth kumae, Ku ba co ceke m’uyabu i min jubilwong’e leng’ ni Rwoth), 24#Law 12:6-8man niwodho lam calu cik pa Rwoth uwacu kumae, Akuru ario, kadi nyithindh akuru ario. 25Man nen, ng’atu moko nuti Yerusalem, ma nyinge Simeon; ng’atu maeni ng’atu ma pwe ma lworo Mungu de, m’ebekio juk mir Israel: Tipo Maleng’ de ni i wie. 26Man Tipo Maleng’ unyutho ire nia ebineno tho ngo, ma fokeneno Kristu pa Rwoth ungo. 27Man ebino i hekalu m’eni i Tipo: ka junyodo pa Yesu gikelo nyathin Yesu i ie, kara gitim i kume calku kura cik, 28elund ejole i bote, emio mugisa ni Mungu, ewacu kumae,

29Rwoth, kawono iyio jamiru peri cidh,

Calku lembe peri, i kwiocwiny;

30Kum wang’a neno both peri,

31M’iyiko i nyim wang’ kodhidhanu ceke;

32 # Isa 42:6; 49:6; 52:10 En e der mi nyuthonyuth ni Thekdha numange,

Man dwong’ mi dhanu peri Israel.

33Man won ku min de igi wang’ lii kum gin m’uyere pire; 34man Simeon umio mugisa igi, man ewacu ni Mariamu ma min kumae, Nen, nyathin maeni kethre ni podho ku ai mi dupa i Israel; man pi giranyutha ma juyero pire rac: 35eyo man palamularu bicobo ng’eyong’ec peri giri; kara pidoic ma i adunde dupa nyuthre. 36Jabila ma dhaku nuti ma nyinge Ana, e nya Fanueli, mi suru pa Acer (eti dit, m’ebedo ku nico oro abiro yo ng’ei bedo nyaku, 37man ebedo umbe cware cil i oro pier abora wi ang’wen), m’eai ngo i hekalu, m’erwo ni Mungu diewor ku dieceng’ ku weko cam! ku kwayukwac de. 38Man ewok i saa nini emio foc ni Mungu, man eyero pire ni dhanu ceke m’ukuro war mi Yerusalem.

Gidok i Nazareti

39 # Mt 2:23 Man ka gidaru gin ceke calu cik pa Rwoth uwacu, gidok Galilaya, bang’ adhura migi ma dhe ma Nazareti.

40Nyathin udongo, tego medre ire, rieko de pong’e: man bero pa Mungu ni i wie.

Nyathi Yesu i Hekalu

41 # Ai 12:1-27; Poi 16:1-8 Junyodo pare gibegicidho Yerusalem ku ba rundi i agba mi kadhukuwijo. 42Ka rundi pare doko apar wi ario, giidho malu calu kura mir agba; 43man ka gidaru timo ceng’ne kakare, kinde ma gibedok, nyathin Yesu dong’ cen i Yerusalem; man junyodo pare ging’eyo ngo; 44ento kum giwacu nyo enuti i piro migi, giwotho woth mi ceng’ acel; man giyenye i kind wat migi ku juwagi; 45ka ginwang’e ngo, gidok Yerusalem, ku yenye. 46Man etimbre, ka ceng’ adek ukadhu ginwang’e i hekalu, m’ebedo i kind jueuthecik, m’ewinjogi epenjogi ku lembe de: 47dhanu ceke m’uwinje de igi wang’ lii kum ng’eyong’ec pare ku lembadwoka pare. 48Ka ginene, igi wang’ lii; e min uwacu ire kumae, Woda, nedi itimo kumeno i bang’wa? nen, waku wuru wayenyi ku can kwa. 49Ewacu igi kumae, Wuyenya nedi? wung’eyo ngo nia akoabed i tic pa Vwa be? 50Ento ging’eyo lembe m’eyero igi ngo. 51Man giloro gikugi, giwok Nazareti; man eworogi: e min ukanu lembe maeni ceke i adundene. 52#1 Sam 2:26; Lem 3:4E Yesu dongo man ecikucidho i rieko, man i bero ni Mungu ku dhanu bende.

Currently Selected:

Luka 2: AB1970

Highlight

Copy