Marko 16

Cer pa Yesu

(Mt 28:1-10; Lk 24:1-12; Yoh 20:1-10)

1E ka ceng’ sabatu kadhu, Mariamu Magdalene, giku Mariamu ma min Yakobo, man Salome, ging’iewo udok ma ng’wice ng’ar, kara gibin giwire ko. 2E pir kugweno i ceng’ ma kwong’a ma yenga, gibino ba liel ma juroko i cana ka ceng’ uwok. 3Man giwecri i kindgi kumae, Ng’a ma bing’ielo iwa kidi ku dhugola mi liel ma juroko i cana? 4Man giting’o wang’gi, gineno nia kidi ng’iele cen: kum e dit apila. 5E ka gimondo i liel ma juroko i cana, gineno jalawobi acel ubedo yo ku cing’ ma yor acwic, m’eronyo kendi ma tar; e igi wang’ lii. 6Man ewacu igi kumae, Iwu kud uwang’ lii; wuyenyo Yesu, ma Janazareti, ma jugure: ecer, embe keni: nen ka ma jukethe i ie! 7#Mt 26:32; Mk 14:28Ento wucidhi, wuyer ni julubne ku Petro de kumae, Ecidho i weng’wu i Galilaya: wubinene kuca, calu eyero iwu. 8E giwok woko kud i liel ma juroko i cana, giringo: kum mielkum ku wang’uic umakugi: e giyero lembe moko ngo ni ng’atu moko; kum lworo negogi.

Yesu Nyuthre ni Mariamu Magdalene

(Yoh 20:11-18)

9Nie kan ecer pir kugweno i ceng’ ma kwong’a ma yenga elar enyuthre ni Mariamu Magdalene, ma yang’ ewodho pajogi abiro i ie. 10En de ecidho eyero ni ju ma naka gibedo gikugi, kinde ma can ubenegogi giywak de. 11E gin de, ka giwinjo nia ebedo kwo, enen ire de, giyio ngo.

Yesu Nyuthre ni Julub Ario

(Lk 24:13-35)

12Yo ng’ei gin maeni enyuthre ni juario ku kite ma tung’, ka gibewotho, i yo migi i thim. 13E gicidho giyero ni ju m’udong’: joca de giyio igi ngo.

Yesu Oro Juapar wi Acel

(Mt 28:16-20; Lk 24:36-49; Yoh 20:19-23)

14Macen enyuthre ni juapar wi acel ka gibedo dhu cam; man edhau i wigi kum yioyic migi m’umbe kum nwang’ mir adundegi de, kum giyio ngo ni ju m’unene yo ng’ei cer pare. 15#Tic 1:8Man ewacu igi kumae, Wucidh i ng’om yu, wuyer lembanyong’a ma juboth ko ni giracwia ceke. 16E ng’atu m’uyio m’umaku baputisi de ebiboth; ento ng’atu m’uyio ngo jubipoko lembe pare rac. 17Giranyutha maeni bilubo ju m’uyio: ku nyinga gibiwodho pajogi; gibiweco ku dhok ma nyen; 18gibiting’o thwol, man tek gimadhu gin moko ma negojo, ebitimogi rac ki ngo; gibiketho cing’gi kum ju ma kumgi lith, c kumgi bikei.

Yesu Dok i Polo

(Lk 24:50-53)

19 # Tic 1:9-11 Ka kumeno Rwoth Yesu, kan edaru yero igi, jujole malu i polo, ejany de yo ku cing’ Mungu ma yor acwic. 20E gicidho, giyero i kaka ceke, Rwoth utimo kugi, eketho tego kum lembene ku giranyutha m’ulube. Amen.

Currently Selected:

Marko 16: AB1970

Highlight

Copy