Bikambelo biki bikima 11
11
Wuo wʼekelesia lʼecingwelo ea Petelo
1Bikima la balongo baki nda Yudea baoloka wete Bafaya ngoko baolamba Joi ja Nzakomba. 2Aki Petelo oundaka nda Yelusalema, iyʼaki ba boloi wa ntatena ea nsonge baolofela lofeli, 3baokela, Wotswaki ele banto batatename nsonge ko oleki toma lʼiyo. 4Lolo Petelo aanga jacingoza elenge eki baoyiʼako okelamaka; aokela, 5Mbondaki ndʼonanga wa Yafo, ko nda likato njenaki enelo, wete yomba yokitela lima loola iki ngʼeto eʼenene ekitama ndʼakono banei, ko yoya nkʼelʼemi. 6Akiʼmʼoalaka te, njolena nyama yʼokili yʼakakaʼanei, ko la nyama ya wale la ya njakula, ko la tofulu ta loola. 7Ko njoloka lolaka ngoko, loonkela, Emalaka Petelo boma ko leka. 8Lolo njokela, O nye, Nkolo. Ele yomba yʼekila la ya linyamo itafotswa ndʼomwa bokami nye. 9Lolo lolaka lolamba bokela wʼefe lima loola, Toma toki Nzakomba ofetolaka, we totangake toko ekila. 10Ko joi line jokelama bekelʼesato, nkako bakʼauma baolulezama lenkina nda loola. 11Ko bala, nkakoyoko bantʼasato baolemala nda joso jʼilombe ikiʼsʼoyalaka, wete iyo batomamaki elʼemi lima Kaisalia. 12Ko Bolimo aonsangela wae nkende lʼiyo nko nkakaza. Balongo bane botoa baocwa lʼemi, ko totswaki ndʼilombe yʼontʼoko. 13Ko ende aotosangela elenge ekiʼndʼenaka ekima, ekemi ndʼilombe ko aolokela, Tomʼanto nda Yafo, ko eta Simona, otangema Petelo; 14ende ifokosangela baoyi bae we la bauma bʼilombe ike oikyama. 15Akiʼmʼoangaka lotefela, Bolimo wʼoeko aolakwela nkʼelenge eki oko otokwelakʼiso ndʼiango. 16Ko njofwaki joi liki Nkolo ngokiʼndʼokelaka, Yoane aolina ndʼasi, lolo inyo lifinama la Bolimo wʼoeko. 17Ayaka Nzakomba akaakʼivo nganji o fio lʼiso akiʼsʼimezaka Nkolo Yesu Masiya, emi nki na wae nsukeya Nzakomba? 18AkiʼyʼOkaka baoyiʼane, baoyala o wai, baokumya Nzakomba, baokela, Kamba Nzakomba aokaya Bafaya eututaelo ele loiko!
Bosako wʼolotsi bokita Antiokia
19Iyʼafalanganaki ndʼenyoko bendielaki la ncina ea Setefano, baotuwana bise kita o Foinike la Kupulio la Antiokia, baosanga nsango nkʼele Ba-Yuda kika. 20Lolo bamʼakiyo, banto ba Kupulio la Kulene, akiʼyʼokitaka nda Antiokia, baotefela la Ba-Elene ngoko, baolaongoza nsango eʼolotsi ea Nkolo Yesu. 21Ko likata ja Nkolo liki lʼiyo, ko bouke wʼanto baolimeza, ko baokengwanʼele Nkolo. 22Ko joi line jolokana ndʼatoi bʼekelesia nda Yelusalema, ko baotoma Balunaba nda Antiokia. 23Akiʼndʼokite, ko aolena boya wa Nzakomba, aosalangana. Ko aolakemya iyʼauma wete baamane la Nkolo la wango wʼotema. 24Ndʼewela wae ende aki bonto owʼolotsi, ko aoyola la Bolimo wʼoeko ko lʼimeezo. Ko etukuluku mongo eʼanto baoamana la Nkolo. 25Ko Balunaba aocwa Taluseu wae ase Saula. 26Ko akiʼndʼotanaka, aoloyela nda Antiokia. Ko baotakana lʼiyo ndʼekelesia mbula bonkunju, ko baolaka etukuluku mongo. Ko bakimi baotangema Ba-Masiya joso nda Antiokia.
27Ko nda bembilʼeko bateli baokitela lima Yelusalema nda Antiokia. 28Ko omo okiyo otangema Agabo aolemala, aolaeneya lʼeneyelo ea Bolimo wete eto ea nzala ifokwela bokili boko bouma. Ko joi liko joliela ndʼekeke eki Kulaudio. 29Ko bakimi, wengiʼonto ngokiʼndʼokuseyaka, baosangya wae basokoza nganji yʼoya ele balongo bakitase nda Yudea. 30Ko baokela ngoko, ko baosokoza nganji eko ele bampaka la likata ja Balunaba la Saula.
Currently Selected:
Bikambelo biki bikima 11: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
