Bikambelo biki bikima 2
2
Ekitelo ea Bolimo wʼoeko
1Aki mbile ea ntuku itano osilʼokita, iyʼauma baotakana ndʼitenela imoko. 2Ko sasimo lofoso lolokana lima loola, ngʼompompo wʼonene bokumba, ko loko lokaka ndʼilombe iuma ikiʼyʼokokitase. 3Ko ndeum iki nga ndeum ya tsa yenyaki elʼiyo, iko ikafwanaki, lomo lokitase ele wengiʼontʼokiyo. 4Ko iyʼauma baokama la Bolimo wʼoeko, ko baangʼotefela la ndaka inkina, ngoki Bolimo akaaka etefeelo.
5Ko Ba-Yuda, bamemyi ba Nzakomba, bakokitase nda Yelusalema, bayaki lima wengi ese ndʼase ba loola. 6Aki lofoso loko okanaka, etukuluku eotakana, ko baokalanganya ndʼatoi, eki wengiʼonto okakʼiyo wae batefela nda lofoso lokae mongo. 7Baokakaza ko baokamwa, baokela, Na, bane bauma batefela bafa nde basi Ngalilaya? 8Na, iso taoka, wengiʼontʼokiso, nda lofoso lokiʼsʼootswaka ngamo? 9Ba-Palutia la Ba-Madia, Ba-Elama ko lʼiyʼakitase nda Mesopotamia, Ba-Yudea la Kapadokia, la Ponto la Asia, 10Ba-Fulungia la Ba-Pampulia, Ba-Ejipeto la wiji wa Libya etongi la Kulene, bafaya la Loma, Ba-Yuda mongo la bantʼafaningwa ndʼa-Yuda, 11Ba-Kulete ba Ba-Alaba – iso taoka wae batefela nda mposo ikiso mongo belemo biʼofilo bia Nzakomba! 12Iyʼauma baokamwa ko baokakaza, baotefelana wae, Ncina ea joi line na? 13Lolonde bankina baolalengola, baokela, Iyo baolangwa la basanga bʼaeyoko.
Lilako ja Petelo nda Pentecote
14Lolonde Petelo aolemala, ende la bajom Iʼomoko, aosangya lolaka, aolakela, Banto Ba-Yuda lʼantʼauma bafetsa nda Yelusalema, kela lea joi line, ko lokoza baoyiʼane bakami. 15Ele bantʼane bafolangwa ngʼokanelʼinyo, ele jefa jokita jefʼibwa kika; 16lolonde joi line lile liko liki boteli Yoele otelaka, wae; 17Nzakomba akela,
Joi lifiela ndʼembile bia nsukela,
Njifuteza Bolimo bokami ele bantʼauma;
Ko banʼakinyo, lʼaende lʼamato, bifotelʼaoyi,
Ko basekota bakinyo bifena bienelo,
Ko bingambi bikinyo bifolota baloto.
18O nde, ndʼembilʼeko njifuteza
Bolimo bokami ele bakwala bakami,
lʼaende lʼamato, ko bifotelʼaoyi.
19Ko njifeneya bikamwelo nda loola ndʼaliko,
Ko la ntaza ndʼokili ndʼase,
Wete balongo la tsa la lomonge jʼolinga,
20Jefa lifofaningwa wilima
Ko nsonge ifofaningwa balongo,
Atafa mbile ea Nkolo olela.
Wae mbilʼeko eʼenene lʼea lokumo.
21Ko nkako wengiʼonto ondeta lina ja
Nkolo ndʼoondo ifoika o mbaika.
22Banto ba Yisalaele, lokoza baoyiʼane: Yesu, bosi Nazaleta, bontʼoki Nzakomba okumyaka elʼinyo lʼelemo bia mpamba la bikamwelo la ntaza iki Nzakomba okelaka lʼende ndʼetei ekinyo o ngʼondea inyo; 23nkʼende, akiʼndʼolekyamaka la wango la njea eki joso ea Nzakomba, nkʼinyo mongo loomaki ndʼekulusu o lʼakata bʼanto bafea Esekyelo. 24Lolo Nzakomba aoloetolʼende, aolotungola lima bielo biʼiwa, ekiʼnde ntatungameya lʼiwʼiko. 25Ele Dawidi akela ndʼeloko ekande,
Njenaki Nkolo nda joso jʼelongi ekami bikeke biuma,
Elʼende ale nda lo lokami jʼelome wae mpoyofukyama;
26La ncinʼeko botema bokami bokumyʼekumya, ko loleum lokami losalangana;
Ko jonge likami josekwa la lolendezo:
27Ele we ofaosundola bolimoʼokami nda Adese,
Ko ofaocika okawe obuji ndʼoeko wae enʼefonju.
28Onjeanyakʼemi mboka ea loiko, Wifonkinza lʼosalangano o lʼelongi ekawe.
29Balongo bakami, nkusʼosangelʼinyo, nkʼekoji, ndʼeloko ea nkoko Dawidi, wete awaki, akundamaki, ko ekundelo ekae ele lʼiso elaka nko mbilʼene. 30Ekiʼnde boteli, ko ekiʼnde eaka wae Nzakomba osimbelakʼende nsimbi wete bontʼowa lioci likae ifokitase nda ngwende ekae ea roi, 31nkʼekiʼndʼenaka joi liko nda joso, atefelaki ndʼeloko ea eetswelo ea Masiya limʼiwa, wete ende ntasundolama nda Adese, ko jonge likae ntenakʼefonju. 32Nzakomba aetolaki Yesu one limʼiwa, ko isʼauma tole temoins ba joi liko. 33Ko ekiʼndʼosangemaka nda lo jʼelome ja Nzakomba, ko ekiʼndʼambaka limʼelʼIse elaka ea Bolimo wʼoeko, nkʼende aolutezʼone ondenʼinyo ko ondokʼinyo. 34Ele Dawidi ntaunda nda loola, lolo ende mongo aotefela,
Nkolo akela Nkolo ekami,
Kitase nda lo lokami jʼelome,
35Elaka nko njile baini bake ebonga eʼakaka bake.
36Ndʼewelʼeko, kela ilongo ya Yisalaele iuma bea nsosolo, wae Nzakomba aosilʼoila Yesu one, okiʼnyʼoomaka ndʼekulusu, o la Nkolo la Masiya.
Imezelo ea banto nkoto isato
37Akiʼyʼokaka ngoko, betemʼekiyo beotenya se, ko baokela Petelo la bikima bimo, Balongo, mpa tokele na? 38Ko Petelo aolakela, Loututalaka ndʼe-tema ko linamaka, wengi bontʼokinyo, nda lina ja Yesu Masiya, ele etungwelo lima baoyiʼobe bakinyo, ko lifamba nganji ea Bolimo wʼoeko. 39Ele elaka eko ele nkʼelʼinyo, lʼanʼakinyo, lʼelʼantʼauma, o lʼako bale ndʼesi, wae bako bae Nkolo Nzakomba ekiso oetʼelʼende. 40Ko lʼaoyiʼamo bauke aolakama, aolaaka, aokela, Loikyʼinyo mongo limʼeotswelo ene eʼokakatano. 41Nkako iyʼandambaki joi likande baolinama, ko banto ngole nkotʼisato baoamana lʼiyo nda mbilʼeko.
Ekendelo ea Ba-Masiya
42Ko iyo baokatemela lilako ja bikima la bolo, ko la esanganelo ekiyo, lʼetenelo ea mampa, ko la beondo. 43La ngoko wengiʼonto aolokʼooma. Ko belemo bia nkakamwa beuke ko la ntaza baokelama la bikima. 44Ko iyʼauma bandimezaki baoamana bamba, ko baosanganya toma tokiyo touma, 45wete baotekya liaci likiyo ko la toma tokiyo, ko baokafa eatelo eko ele bauma, nkʼelenge eki bontʼokiyo elenganaka. 46Ko cu mbile, la botemʼomoko, baoamana nda Tempelo, ko baotena mampa nda tolombe tokiyo, baleki toma la bosalangano ko lʼetema bia nsosolo. 47Bayomemya Nzakomba, ko baosimama losimo lʼantʼauma. Ko wengi mbile Nkolo aoamanya lʼiyo bantʼaso baikyamaki.
Currently Selected:
Bikambelo biki bikima 2: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
