Bikambelo biki bikima 4
4
Ekandelo ea bakimi
1Nkʼatefelʼiyo lʼanto, nkanga la capitaine ea Tempelo ko la Basadoke, baoyʼelʼiyo, 2baoloka nkele ekiʼyʼolakakʼanto ko baokumya la Yesu eetswelo limʼele bawei. 3Ko baolakanda ko baolaila ndʼilombe ya njanga elaka nko mbile ea lobi, eki bokolo osilʼokita. 4Lolonde bouke wʼanto bandokaki Joi baolimeza; ko boanji wʼanto bʼaende bokita ngole nkotʼitano.
Likenya ja Petelo lʼokakaano wa ba-mpifo
5Lolo nda mbile ea lobi bantʼakiyo ba mpifo la bingambi lʼakoci bʼenkanda baotakana nda Yelusalema, 6ko la Anasa, nkanga ea joso mongo, la Kayafa la Yoane la Alesandulo, ko la basʼaumabakosangi la nkanga ea joso mongo; 7ko baolemya bikima ndʼetei ekiyo, ko baolauola, Inyo lokelaki joi line nda mpamba ea na? La nda lina ja na? 8Nkako Petelo ayokame la Bolimo wʼoeko, aolakela, Inyo bampifo ko la bingambi, 9ngʼiso tengelama mbilʼene ndʼewelʼea bolemo wʼolotsi bokelama ele bontʼowʼotengu, wae elenge ekiʼndʼoikyamaka, 10kela joi jeana elʼinyo lʼanto ba Yisalaele bauma, wete nda lina ja Yesu Masiya, owa Nazaleta, endʼokiʼnyʼoomaka ndʼekulusu, lolo oki Nzakomba oetolaka limʼele bawei, o lʼende, bontʼone emi la bolo wa kolongo nda joso likinyo. 11Yesu one ale ekenje etonama lʼinyo batongi, lolonde eoyala ncina ea likono. 12Ko loiko lofʼelʼonkina nye, la ncina wae, nko lina linkina likaemʼelʼanto ndʼase ba loola litoikyeya. 13Akiʼyʼenaka nkaso ea Petelo la Yoane, ko baokotola wae baki banto batafekela bianya bia ecoles, baki nko banto nko loswele, iyo baokamwa; ko baolalongoza wete baki banto bakendaki la Yesu. 14Lolo andenʼiyo bonto oikyamaki njemala lʼiyo, ntabakusa oikya ekoli nye. 15Ko baotoma wete bole lima nteke ekiyo fele, ko nkako baolanga wango, 16baokela Mpa tokele lʼantʼane na? Ele bolemo bone wʼofilo bokelama lʼiyo boleana fole elʼanto bauma bakitase nda Yelusalema, ko iso tofokusa jangana joi liko. 17Lolonde ndʼewela wae joi line lifokongʼofanzwa elʼanto, kela taane iyo wano wete bafautʼotefela lʼonto nko loswele nda lina line seko. 18Nkako baolaeta, ko baolaaka la bolo mongo wete bafautʼotefela ko bafaolaka nda lina ja Yesu nye. 19Lolonde Petelo la Yoane baolamba, baolakela, Inyo mongo lezaka, nkina lile ci ndʼaiso ba Nzakomba wae iso tokozʼinyo, afa Nzakomba. 20Lolo iso, tofokusa jambya losanga baoyi bako bakʼisʼenaka la bakʼisʼokaka. 21Akiʼyʼaanaka lenkina la njaana, baolatungola, ekʼiyo ntabakuseya otana elenge eʼiyʼosisozʼiyo, ndʼewelʼeʼanto; ele bantʼauma baokumya Nzakomba la ncinʼea joi likelamaki. 22Ele bonto oki lotaza lone jʼeikyelo okelamaka aolekana mbula ntuku inei.
Boondo boki ekelesia lʼutezelo ea Bolimo wʼoeko ele bikima
23Akiʼyʼotungwaka baocwa ele bakiyo mongo ko baolasangela baoyiʼako baki nkanga ea joso la bingambi otefelaka. 24Ko iyo, akiʼyʼokaka, baosangya lolaka bolongo ele Nzakomba, baokela, Nkolo, we ondemaki loola lʼokili la lieke jʼokwa la toma touma tole ndʼako bauma, 25We otefelaki nda Bolimo wʼoeko lʼomwa wʼosali oke, ise ekiso Dawidi, okela.
Banto ba bise baotongola etongo lae,
Ko banto bakakaza baoyi ba mpampa la ncina na?
26Bakulaka bʼokili baolemala bolongo,
Ko bakiyo ba mpifo baotakana isanga
Wae basuke Nkolo ko la Masiya ekae isuki.
27Ele ndʼonangʼone Elode la Pontio Pilato ko la Bafaya la banto ba Yisalaele baotakana, o nsosolo, wete basuke Yesu, Bona oke oki wʼouzaka ndʼoeko, 28wae bakele baoyiʼauma baki likata like la wango boke oezaka nda joso wae bakelame. 29Ko aeyoko, Nkolo, bala biano bekivo, ko kaya bakwala bakawe nkaso eleki wete basange Joi like, 30asembola we likata wae oikyʼanto, ko akelama ntaza lʼelemo bia nkakamwa o la lina jʼona oke owʼoeko Yesu. 31Nkʼaondʼiyo, itenela ikiʼyʼotakanaka yofukyama. Ko iyʼauma baoyola to la Bolimo wʼoeko. Ko baosanga Joi ja Nzakomba la nkaso esambʼofolu.
Esangano ea baumba bʼekelesia
32Linyenga jʼanto bandimezaki baki lʼotema bomoko lʼolimʼomoko. Nkʼomo okiyo otangaki toma tokiʼnde tokae mongo, lolonde baosanganya toma touma. 33Ko bikima baokumya eetswelo ea Nkolo Yesu limʼiwa la mpamba mongo, ko boya wʼonene boki elʼiyo bauma. 34Lakʼonto okiyo ondelaka wela, ele bako baki lʼasala la tolombe baotekya bako, baoyela baumba bakiʼyʼoataka, 35ko baolambya bako ndʼakaka ba bikima; ko iyo baolakafela o ngoki wengiʼontʼokiyo elenganaka. 36Ndʼelengʼeko, Yosefa, oki bikima otangaka Balunaba (wete Bona owa ndombola) Bo-Lewi, bosi Kupulio, 37aki la lisala. Ko aotekya liko, ko aoyela baumba ko aolambyʼako ndʼakaka ba bikima.
Currently Selected:
Bikambelo biki bikima 4: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
