Bikambelo biki bikima 9
9
Ekengwanelo ea Saula
(Bik 22.6-16; 26.12-18)
1Lolonde Saula aokongʼooza biano la baoyi bʼiwa ele bakimi ba Nkolo. Ko aocwʼele nkanga ea joso mongo, 2Ko aolouola benkanda ele bamongo sunangonga nda Damaseke, wete anya-ngʼotana ba Mboka eko, lʼaende lʼamato, mpanga ayelʼiyo ntungama nda Yelusalema. 3Akendʼende, aotutama la Damaseke. Nkako sasimo, ngangi mongo lima loola eolongangela kio sama-nyu. 4Ende aokwa ndʼokili, ko aoloka lolaka londokela, Saula, Saula, onyokola, lae? 5Ko ende aokela, Nkolo we ole na? Ko ende aolamba, Emi nde Yesu, ende onyokola we. 6Lolo emala ko ke-nda ndʼonanga, ko wifolakema joi lindeji wae okele. 7Banto bakendaki lʼende bolongo bakemi o wai la booma, baoloka lofoso, lolo ntabenʼonto. 8Saula aolemala limʼamoci, lolonde akiʼndʼolifolaka baiso ntena yomba nye. Baolokita la likata ko baoloyela nda Damaseke. 9Bembilʼesato ntena nye, ko ntala yomba ko ntamela.
Anania la Saula nda Damaseke
10Bokimi omo aki nda Damaseke oki la lina Anania. Ko Nkolo aolokela ndʼenelo, Anania. Ko ende aokela, Emʼone Nkolo. 11Ko Nkolo aolokela, Emala, kenda nda bolongo botangema Ci, ko uola ndʼilombe ya Yuda bontʼole bosi Taluseu otangema Saula, ele, bala ayoonde, 12ko ndʼenelo aolena bonto otangema Anania, ayotswa ko oafezʼende bakata, wae ene lenkina. 13Lolo Anania aolamba, Nkolo njoloka limʼelʼantʼauke lokumo jʼontʼone, wete bouke wʼaoyiʼobe bakiʼndʼokeelaka ba-boeko bake nda Yelusalema. 14Ko endoko ale la mpifo limʼele nkanga ya joso wae atungya ndʼonyolo bantʼauma bandeta lina like ndʼoondo. 15Lolonde Nkolo aolokela, Kenda, elʼende ale efeko esona-mi lʼemi wae atombe lina likami nda joso ja Bafaya la rois, la bana ba Yisalaele. 16Elʼemi njoleneyʼende bilenge bia bielo biʼendʼene ndʼeloko ea lina likami. 17Nkako Anania aokenda, aolotswa ndʼilombe, ko aolafezʼende bakata bakae, aokela, Lilongo Saula, Nkolo, wae Yesu onjenyaki ele we nda mboka eki wʼoyaka aontoma wae wene lenkina, ko oyole la Bolimo wʼoeko. 18Nkakoyoko baimaka ngole bifaso baokwa limʼaiso bakae, ko aolena lenkina. Ko aolemala, aolinama. 19Ko akiʼndʼoleka toma, aokema nda jonge.
Ende aoyala la bakimi nda Damaseke bembile bemo. 20Ko nkakoyoko nda sunangonga aokumya Yesu wae ende ale Bonʼowa Nzakomba, 21Ko bantʼauma bandookaki baokamwa, baokela. One afa bontʼoko onyokolaki banto bandetaki lina line nda Yelusalema nde? Ko aoya endo la ncina wae atungyʼiyo, ko atombʼiyo ele nkanga ya joso? 22Lolo Saula aokongʼokaka lʼekemo, ko aolu-mba Ba-Yuda bafetsaki nda Damaseke nda bikoji bikiyo, ekiʼndʼoakaka la nkaso mongo wete Yesu ene ale Masiya.
Saula aangʼonyokwa lʼa-Yuda
23Aki bembile beuke olekaka, Ba-Yuda baolanga wango wete boomʼende. 24Lolo wango bokiyo boleana ele Saula. Iyo besanyaki biiso la mbile lʼotso, wae boome. 25Lolo bakimiʼakae baolokola, baolokiteza wijʼa etutu eʼonanga lʼotso ndʼefole eʼonene.
Saula nda Yelusalema la nda Taluseu
26Akiʼndʼokitaka nda Yelusalema aomeka oamana la bakimi. Ko iyʼauma baololota, ntabimeza wae aki bokimi. 27Lolo Balunaba aolokola, aoloyela ele bikima, ko aolasangela elengʼekiʼndʼenaka Nkolo nda mboka, ko ngoki Nkolo otefelaka lʼende, ko la elenge ekiʼndʼolakaka nda lina ja Yesu, nkʼofolu, nda Damaseke. 28Ko aki lʼiyo nda Yelusalema, aolotswa ko aolola, 29ko alakaki nkʼofolu nda lina ja Nkolo; aosoola ko aolikyana bikoli la Ba-Elene; lolo iyo basaki okanda wae boome. 30Aki balongo eaka ngoko, baolokitsa nda Kaisalia, ko baolokenza nda Taluseu.
31Nkako ekelesia eki la kuci nda Yudea euma, ko la nda Ngalilaya la nda Samalia, ko eokeme lʼekemo mongo. Ko akiʼyʼosalaka ndʼoangi wa Nkolo, la nda ncicima ea Bolimo wʼoeko, baofula o mpafula.
Petelo aikya Ainea
32Ko aki Petelo okaanaka wiji la wiji, aokitela ele ba-boeko bafetsaki nda Luda. 33Ko aotanʼeko bonto otangema Ainea, okeci nda ntange mbula mwambi, aki la nkangi ea nkataana. 34Petelo aolokela, Ainea, Yesu Masiya akoikya: emala ko tanda ntange eke. Ko nkakoyoko aolemala. 35Ko bantʼauma bafetsaki nda Luda la nda Salona benaki, ko baokengwana ele Nkolo.
Petelo aikya Doluka
36Bokimi omo aki nda Yafo oki la lina Tabita (ncina ea lina liko, Doluka, wae mboloko); ende aki bokambi oleki owa belemo biʼolotsi la biʼisei. 37Ko ndʼembilʼeko aokona nkangi, ko aowa. Akiʼyʼosolaka, baolocika nda ntena eʼaliko. 38Eki Luda ntutama la Yafo, ko aki bakimi okaka wete Petelo alʼeko, baotoma bantʼafe elʼende, baoloonda wete; Totemake loya endoko elʼiso. 39Ko Petelo aolemala, aokenda lʼiyo. Akiʼndʼokite, baoloyela nda ntena eʼaliko. Bituka biuma bakemi, ndengama lʼende, bayolele, baoloeneya benkoto la belotswaka beki Doluka akeelaka akiʼnde lʼiyo. 40Lolonde Petelo aolaoza nkʼiyʼauma. Nkako aokusʼaongo ko ayoonde; nkako aokengwanʼelʼilaka ko aokela, Tabita, emala. Ende aolifolʼaiso, ko akiʼndʼene Petelo, aosongongala. 41Petelo aolokita la likata, ko aoloemaza. Ko aoleta ba-boeko ko la bituka, ko aololekya elʼiyo ayoike. 42Joi line joleana nda Yafo euma, ko bantʼauke baolimeza Nkolo. 43Nkako Petelo aoyala bembile beuke nda Yafo eka Simona, boaki owa bikoto.
Currently Selected:
Bikambelo biki bikima 9: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
