Toango 12
12
Abalama akita nda Kanana. Asimba nda Ejipeto
1Ko Yawe aosangela Abalama, “Imana lima esʼeke, limʼele ilongo ike, ko lima bola wʼise eke, ko kenda ndʼokili boʼemʼokeneya. 2Ko njifokokela booci wʼonene, ko njifokosakela bokako wa swa, ko njifokoatela we lina jʼonene ja lokumo, ko wifoyalema bokako wa swa elʼanto. 3Iyʼakosakela we bokako wa swa, emi njifasakelʼiyo bokako wa swa; ko iyʼakamba we wambo wa tu, emi njifambʼiyo wambo wa tu, ko baoci bauma bʼokili bifosakema bokako wa swa o la we.”
4Ko Abalama aokenda ngoki Yawe otomakʼende; ko Loto aocwa lʼende. Abalama aokita mbula ntuku nsambo lʼitano akiʼndʼimanaka lima Alana. 5Abalama aokola Salai waji okae, ko la Loto, bonʼowʼokune okae, ko la toma tokʼiyʼoataka touma, ko la banto bakʼiyʼoataka nda Alana. Baolemala wae bacwe ndʼokili wa Kanana, ko baoya ndʼese ea Kanana. 6Abalama aotuwana bokiliʼoko elaka nko aokita Sekeme, ndʼotamba wa boele wa Mole. Ba-Kanana baki ndʼese eko ndʼekeke eko.
7Nkako Yawe aolenya ele Abalama, aokela, “Njifokaya bana bake bokiliʼone.” Ko aotongela Yawe, ondenyaki elʼende, nkinda ea mbeka ndʼitenelʼiko. 8Limʼeko aokongokenda wiji wa ngongo nda est ea Bete le, ko aolemyʼilombe ikae ya bito eko, aki la Bete le nda ouest, ko la Ai nda est. Ko aotongela Yawe nkinda ea mbeka eko, ko aoleta lina ja Yawe ndʼoondo. 9Ko Abalama aokongokenda wiji wa sud.
10Ko eto ea nzala eokwela bokiliʼoko, ko Abalama aokitela ndʼEjipeto, wae ayalʼeko, eki eto ea nzala olekolaka ndʼokiliʼoko. 11Akiʼnde otutama lomotswa ndʼEjipeto, aosangela Salai waji okae, “Bala, ndea wae ole bomoto oleki lituka ndʼaiso; 12ndʼewelʼeko ae Ba-Ejipeto okena, bifokela, ‘One ale waji okae’; nkako bifomboma, lolo bifokoikya we. 13Nkoonda wae wʼasangele ole nkana ekami, kela bankeele bolotsi ndʼeloko eke, ko emi mbike la ncinʼeke.” 14Aki Abalama okitaka ndʼEjipeto, Ba-Ejipeto baolena wae Salai aki bomoto oleki lituka. 15Ko aki chefs ba Falo oenaka, baolokumya ele Falo. Ko bomotʼoko aotombama ndʼilombe ya Falo. 16Falo aokeela Abalama bolotsi la ncina ekae; ko Abalama aolamba mpate la ngombo la mpunda yʼaende, lʼasali bʼaende la bʼamato, la mpunda yʼamato, ko la ngamela. 17Lolo Yawe aokonya Falo la ba-ilombe ikae nkangi ya bolo ndʼewelʼea Salai, waji owa Abalama. 18Nkako Falo aoleta Abalama, ko aolokela, “Joi line liki wʼonkeelaka na? Ntonsangela wae ale waji oke ncina na? 19Otefelaki wae ale nkana ekami lae? Siki njolokola ngole waji okami. Aeyoko, bala waji oke, wʼokole ko imanʼesʼene!” 20Ko Falo aotoma bantoʼakae lotomo wae bakenza Abalama la waji okae, la belemo bekande beuma.
Currently Selected:
Toango 12: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
