Toango 19
19
Efitelo ea Sodomo la Amola. Iango ya Ba-Moaba la Ba-Amona
1Ko bikima biko bife bia loola baokita nda Sodomo lʼokolo; ko Loto akokitase nda wiso wʼonanga. Aki Loto aenaka, aolemala wete akumane lʼiyo, ko aokusama lʼelongi nsunama. 2Ko aokela, “Mbondʼinyo, bankolo bakami, leta ndʼilombe yʼosaliʼokinyo, loyalʼeko lʼotso, losolʼakaka; mpanga lemale la nkesa ko lokenda nda lokendo lokinyo.” Lolo iyo baolamba, “O nye, lolo tifoyala botsʼouma ndʼolongo.” 3Lolo ende aolakama o nkakama, ko baoletʼekaʼnde, ko baolotswa ndʼilombe ikae. Ko aolalambela elambo, aotumba mampa esamba nyango, ko iyo baleki. 4Lolo atafiyʼetama, baende bʼonanga, wae baende ba Sodomo, bampaka lʼanolu, nkʼanto bauma, baolengamela ilombe. 5Ko baoleta Loto, baokela, “Bantʼako bandotswaki eka we botsʼone bale nko? Waozʼiyo elʼiso, kela taale.” 6Ko Loto aolola ele bantʼako, ko aokombʼekuke ndʼafeka bakande. 7Ko aokela, “Mbondʼinyo, balongo bakami, talokelake bobe wʼelengʼene. 8Bala, nde lʼana bafe bʼamato batafoalana la jende; kela njelʼiyo elʼinyo wae lakeelʼiyo ngʼolangʼinyo; lolo talokeelake bantʼane joi limo, la ncina wae iyo baolotswa bafaya ndʼilombe ikami.” 9Ko iyo baokela, “Ekwa!” Ko baokela lenkina, “Siki bontʼone ayaki ekʼiso bofaya, ko aeyoko alanga oyala juge ekiso? Aeyoko tifokokeela we bobe bolekola bokʼisʼosangyaka okeelʼiyo.” Nkako baokamʼele Loto la bolo, ko baotutama wae baole ekuke. 10Lolonde bikima baoloza bakatʼakiyo, ko baobela Loto elʼiyo ndʼilombe, ko baokombʼekuke. 11Ko baomaki baiso bʼantʼako baki nda wiso, la ba tosisi la bʼanene, ko iyo baolembwa la njaasa ea ekuke. 12Nkako bikima baokeela Loto, “La wʼole la bantʼamo ane? Bakilo, bana bʼaende la bʼamato, nkina bontʼomo nko loswele ndʼonanga? Wʼaoza lima bonangʼone; 13elʼiso tocwʼomelenganya wiji bone, la ncina wae lilelo jʼobe wʼantʼane jolekola nda joso ja Yawe, ko Yawe aototoma wae tomelenganya bonangʼone.” 14Ko Loto aolola, aotefela la bakilo bakae, wae iyʼasangya lokola banaʼakae nda liala, “Lemalaka lima wijʼone; ele Yawe aoyʼomelenganya bonangʼone.” Lolo bakilo bakae bakanelaki wae aolaetola jeto.
15Aki nkesa okya, bikima bia loola baokamanya Loto, baokela, “Emala, kola waji oke lʼanaʼake bafe bʼamato, nyango lofofitana nda nsisoza eʼonangʼone.” 16Lolo Loto aolalinga. Nkako bantʼako baokita likata likae, ko lʼakata ba waji lʼanaʼakae bafe bʼamato, eki Yawe ookakʼende isei, ko baolaoza ko baolacika ndʼanza bʼonanga. 17Ko akʼiyʼaozaka ndʼanza, baokela, “Lotaka, kela oike! Tokelake ndʼafeka bake, ko tosilamake ndʼokili wa lambe nye: lotaka nda ngongo, nyango ofomelengana.” 18Ko Loto aolokela, “Nkolo ekami afa ngoko. 19Bala, bosali oke aotana boya ndʼaisoʼake, ko ondeneyaki isei ya ndekola eki wʼombikyaka; lolo mpoloteya nda ngongo nyango emelenganelo efombata nda mboka ko mpowa. 20Bala, bonanga bone botutsi bokoka wae ndotʼeko, ko bole bonanga wʼisisi; kela ndotʼeko oyei! Bofa nde bonanga wʼisisi? Mpanga mbike.” 21Ko aolokela, “Bala, njokookoza lʼoya nda joi line ngoko, wae mpaofita bonanga boko boki wʼoandaka. 22Kaola o nkaola, lotakʼeko, elʼemi mpokeleya joi limo nye, elaka nko okitʼeko.” Ndʼewelʼeko bonangʼoko botangema Soala. 23Jefa jofuwa aki Loto otswaka nda Soala.
24Nkako Yawe aojweya Sodomo la Amola mbula ea soufre la tsa limʼele Yawe nda loola. 25Ko aomelenganya benangʼeko, ko la bofoku bouma, ko lʼanto bauma bʼenangʼeko, ko la toma touma tomelaki ndʼamoci. 26Lolonde waji owa Loto akelaki ndʼafeka bakande, ko aofaningwa ekenje ea bokwa. 27Ko Abalayama aoetswa la nkesa mongo, ko aokenda ndʼitenela ikiʼnd’ emalaka nda joso ja Yawe. 28Ko aolenda ndʼase, wiji wa Sodomo la Amola, ko lʼokili bouma wʼofoku; ko aolena bolinga bofulela limʼokili ngʼolinga wʼetumbelo eʼonene mongo.
29Nkʼelengʼeko, aki Nzakomba omelenganyaka benangʼeko beki ndʼofoku, Nzakomba aolofwa Abalayama, ko aoloza Loto lima ntoku ea emelenganelo ekiʼndʼomelenganyaka benanga beki Loto ofetsaka. 30Ko Loto aolimana Soala, ko aoyala nda ngongo, ende lʼanaʼakae bafe bʼamato, ekiʼndʼoangaka boangi loyala nda Soala. Ko aoyala nda ntoka emo ea ngongo, ende lʼanaʼakae bafe bʼamato. 31Owa nsomi aokela bokune okae, “Ise ekiso aokita mpaka, ko nko jende lomo ociki ndʼokili wae otswʼelʼiso ndʼelenge ekela bokili bouma. 32Kela tomeza ise ekiso vina, mpanga tetame lʼende, wae tofongele ise ekiso booci.” 33Ko baomezʼise ekiyo vina botsʼoko; ko owa nsomi aolotswa, ko etamaki lʼise ekae; ise ntea aki bona etamaka, ko lʼakiʼndʼemalaka. 34Ko nda mbile ea lobi nsomi aokela owʼakuka, “Bala, nkeci lʼise botsʼoki lobi. Kela tomeza vina botsʼone ngoko, mpanga wʼotswa ko wʼetame lʼende, ko tifofonga booci wʼise ekiso.” 35Nkako baomeza ise vina botsʼoko ngoko. Ko owʼakuka aocwʼetama lʼende. Lolo ise ntea aki bona etamaka, lʼakiʼndʼemalaka. 36Nkʼelengʼeko banʼakʼafe ba Loto baofoswa jemi lʼise ekiyo. 37Owa nsomi aoota bona owa jende, ko aoloila lina Moaba; ende ale ise ea Ba-Moaba elaka nko mbilʼene. 38Ko owʼakuka aoota bona owa jende, ko aolotanga Ben-Ami; ende ale ise ea Ba-Amona o la mbilʼene.
Currently Selected:
Toango 19: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
