Yoane 11

Yesu aetola Lazalo limʼiwa

1Bontʼomo aki la nkangi, Lazalo owa Betania, bonanga wa Malia lʼotomolo okae Malata. 2Lazalo okonaki nkangi, aki nkana ea Malia oko oisaki Nkolo lʼalasi ba mpimbo, ko oluolaki bakakʼakae lʼabwoʼakande. 3Ndʼewelʼeko, bankana bakʼafe baotomela Yesu ekima, bakela, Nkolo bala ende ondoka we eefe ale la nkangi. 4Lolo aki Yesu okaka, akela, Nkangi ene efosukela ndʼiwa lolo ele ndʼewela ea lokumo ja Nzakomba, wete Bona owa Nzakomba akumyame lʼeko.

5Yesu okaki Malata lʼokune okae la Lazalo eefe. 6Aki Yesu okaka wae ale la nkangi aokongoyala bembile bemʼefe ndʼitenela ikiʼnde. 7Ko ndʼafeka, aokela bakimiʼakae, Kela tute lenkina nda Yudea. 8Bakimi baolokela, Labi, Ba-Yuda mpanga basaka okonya bikenje: ko ocwʼeko lenkina nde? 9Yesu aolamba, Mbile emoko efa lʼaefa jom lʼafe nde? Nga bonto alanda la mbile afokunumwela, elʼende ena fole ea bokilʼone. 10Lolo nga bonto alanda lʼotso, akunumwela efʼende la fole. 11Atefelaki baoyiʼako ko ndʼafeka aolakela, Lilongo likiso Lazalo eci; lolo nkende wae ndoetole limʼaisilo. 12Bakimiʼakae baolokela, Nkolo ngʼende eci, ifoika. 13Lolonde Yesu aotefela la ncina ea iwa ikande: lolo iyo baotanga wae atefela ndʼewela ea jomo jʼaisilo. 14Nkako Yesu aolasangela fole, Lazalo aowa; 15koko ndokʼekemo ndʼeloko ekinyo, ekiʼmi nciki eko, ncina wete limeza; lolo kelʼiso tocwe elʼende. 16Toma, otangema Ja-sa, aokelʼaebiʼakae bʼakimi, Kelʼiso tocwe ngoko wae towe iso lʼende.

17Aki Yesu okitʼeko aotana wae Lazalo aomonga ndʼekundelo bembile benei. 18Ndatsa Betania la Yelusalema esi nga kilométres isato. 19Ba-Yuda bauke baoyʼele Malata la Malia wae balombwelʼiyo lokeseli, ndʼewela ea nkana ekiyo. 20Nkako aki Malata okaka wae Yesu aoya, aocwʼokumana lʼende, lolo Malia aokitase ndʼilombe. 21Malata aokela Yesu, Nkolo nga wʼoki ane, siki nkana ekami ntawaki. 22Koko o lʼaeyoko mongo, njea wete joi nko loswele linduola we Nzakomba, ifokokaya. 23Yesu aolokela, Nkana ekawe ifoetswa lenkina limʼiwa. 24Malata aolokela, njea ifoetswa ndʼeetswelo nda mbile ea nsukela. 25Yesu aolokela, Emi nde eetswelo, ko la loiko; onjimezʼemi mpeka lʼaowa, ifoika: 26bonto nko loswele oyoike ko anjimezʼemi, afaowa nye. Wimeza nde joi line? 27Aokela, O nde Nkolo: njolimeza wae we ole Masiya, Bona owa Nzakomba, nkʼende ondoya ndʼokili.

28Akiʼndʼotefelaka ngone, aocwʼoeta Malia bokune okande la lokuko, aolokela, Bolaki alʼane ko aketa. 29Akiʼndʼokaka joi line aolemala nkaola, ko aocwʼelʼende. 30Yesu atafoya ndʼonanga, lolo aki ndʼitenela iko iki Malata okumanaka lʼende. 31Ba-Yuda baki ndʼilombe la Malia, ko balombwelakʼende lokeseli, baolena wae Malia aolemala nkaola ko aolola, ko baolokima, ekiʼyʼotangaka wae aocwʼolela ndʼekundelo. 32Aki Malia okitaka ndʼitenela iki Yesu, ko aoloena, aokwa ndʼakaka bakande, ko aolokela, Nkolo, nga wʼoki ane, siki nkana ekami ntawaki. 33Aki Yesu oenʼende ayolele, ko Ba-Yuda baki lʼende bayolele ngoko, aosaana ndʼotemaʼokande, ko aonyangimwa la lokeseli, 34ko aokela, Loambyaki nko? Baolokela, Nkolo, yaka yene. 35Yesu aolela mpisali. 36Ndʼewelʼeko Ba-Yuda bakela, Bala, elenge ekiʼndʼookaka eefe! 37Lolo bamʼakiyo bakela, Bontʼone olifolaki baiso bʼonto oweiʼai-so, ntasukeya nde iwa ya bontʼone?

38Yesu aosaana lenkina ko aokita ndʼekundelo; eko eki ntoka eʼekenje ko ekenje eolekama nda wiso. 39Yesu akela, limolʼekenje. Malata nkana ea owei, aolokela, Nkolo, lʼelingi ngone, aokela jei elʼende aowa bembile benei. 40Yesu aolokela, Ncikokela nde, nga wimeza, wifena jilangi ja Nzakomba? 41Koko baolimola ekenje. Koko Yesu aounzʼaisoʼakae, ko akela, Fafa, nkosima boya, eki wʼondokaka. 42Ko emi ndeaki wae ondokaka wengiʼaefa, lolonde ntefelaki ngoko ndʼeloko ea banto ba linyenga bandengama, wae bimeza wete we ontomaki. 43Akiʼndʼotefelaka baoyiʼane, aobeleza la lolaka ja lonene, Lazalo, ola! 44Ende owaki, aolola, lʼakata lʼakaka mbombama la bito bia ilaka, ko elongi ekande eolingama lʼitambala. Yesu aolakela, Loombole, akende.

Nkanga ya joso bayase looma Yesu

(Mt 26.1-5; Mk 14.1-2; Lk 22.1-2)

45Ba-Yuda bauke bayaki eka Malia, ko benaki bolemo boki Yesu okambaka, baoloimeza. 46Lolo bamo baocwʼele Bafalusi, ko baolasangela baoyi baki Yesu okelaka. 47Nkako nkanga ya joso, la Bafalusi baotakanya nteke, ko baokela, Joi likelʼiso na? Ele bontʼone ayokele ntaza iuke. 48Nga tolocika ngone, bantʼauma bifimezʼende; koko Ba-Loma bifoyʼoimola Tempelo ekiso ko lʼantʼakiso. 49Omo okiyo, Kayafa, oki nkanga ea joso mongo nda mbulʼeko, aolakela, Inyo lofea joi limoko nye: 50ko lofokanela wae eongʼolotsi lʼinyo wete bontʼomoko awe ndʼeloko ea bantʼane, nyango lioci likiso liuma lifofofyama. 51Atefelaki ngone afa limʼelʼende mongo; lolo ekiʼnde nkanga ea joso mongo nda mbulʼeko, ko atelaki lotelo wae Yesu awe ndʼeloko ea bantʼauma bʼese eko; 52ko afa ndʼeloko ea bantʼako kika, lolo ncina wae atakanya ndʼotongaʼomoko bana ba Nzakomba bafalangai. 53Lima mbilʼeko baolanga wango wae boome.

54Ndʼewelʼeko, Yesu ntutʼolanda ndʼesayenge ea Ba-Yuda, lolo limʼako aocwa nda bise bikotutsi lʼetekeleke, ndʼonanga botangema Efulaima, ko aoyalʼeko ende lʼakimiʼakande.

55Koko elambo ea Efendelo ea Ba-Yuda eotutama; ko bouke wʼanto baocwa nda Yelusalema lima bise bitutsi, bayauza ndʼoeko. 56Bayase Yesu, ko akiʼyʼokemi nda Tempelo, baotefelana, bakela, Okanelʼinyo na? Lʼafaoya ndʼelambo? 57Nkanga ya joso la Bafalusi baosisʼosise wae nga bonto nko loswele ea itenela ilʼende, asange, wae bokande.

Currently Selected:

Yoane 11: LOL87

Highlight

Copy