Yoane 15

Bokoli wa vina la bitafe

1Emi nde bokoli wa vina wa nsosolo, ko Fafa ekami ale wesanyi owa bekoli bia vina. 2Wengi etafe elʼelʼemi efocwʼamuka, ende ofolʼeko ndofola, ko aongya wengi etafe ecwʼamukawae ecwe bamuka la mpafula. 3Inyo losilʼofetswa ndʼewelʼea joi likiʼmʼosangelakʼinyo. 4Loyarelʼemi elenge eyalʼemi elʼinyo. Ngole etafe ntecwekʼamuka eko mongo, imola nko eyale ndʼokoli wa vina: nkʼelengʼeko lʼinyo imola nko loyalʼelʼemi. 5Emi nde bokoli wa vina, inyo lole bitafe. Ende oyalʼelʼemi, ko emi njalʼelʼende, ende acwekʼamuka bauke. Ndʼewela wae ndalena lʼemi, lofokambeya bolemo bomoko. 6Ayakʼonto afoyalʼelʼemi, aobokama ngole etafe, ko aenga mbaenga, ko baotakanya biko, ko baolusa biko nda tsa, ko biolongola. 7Ayaka loyalʼelʼemi, ko baoyiʼakami bayala ndʼetemaʼekinyo, luola joi nko loswele lilangʼinyo, ko liko lifokelama elʼinyo. 8Fafa ekami aokumyama lʼelengʼene, wae locwʼamuka bauke; ko inyo lifoyalema bakimiʼakami. 9Nkʼele-ngʼeki Fafa onjokakʼemi eefe, emi njokakʼinyo eefe ngoko. Loyalaka ndʼeefe ekami. 10Nga lofonga besise bekami, li-foyala ndʼeefe ekami; o ngokiʼmʼofongaka besise bia Fafa ekami, ko njala ndʼeefe ekande. 11Njosangelʼinyo baoyiʼane wete esaza ekami eyale ndʼetemaʼekinyo, ko esaza ekinyo efule mpafula.

12Bone wete bosise bokami wae inyo lokanʼeefe, ngokiʼmʼokakʼinyo eefe. 13Nkʼonto ole la eefe elekolʼene wae bonto ambya loiko lokae ndʼeloko ea balongoʼakande. 14Inyo lole balongoʼakami, nkina lokela besise bekami. 15Mpetʼinyo lenkina bakwala, bokwala afea baoyi bakamba nkolo ekande, lolo njoletʼinyo balongo; ndʼewela wae nsoleanyʼinyo baoyiʼauma bakiʼmʼokaka limʼele Fafa ekami. 16Afʼinyʼansonakʼemi, lolondʼemi nsonakʼinyo, ko njolouzʼinyo wete lokende locwekʼamuka, ko bamuka bakinyo basekwa seko; wae joi nko loswele linduolʼinyo Fafa nda lina likami akayʼinyo. 17Nkayʼinyo bosise bone wae lokanʼeefe.

Ba-bokili la Bolimo wa Nsosolo

18Nkina banto bʼokili baolinʼinyo jino, lolea wae banjinakʼemi nda joso. 19Nga lole ba-bokili, siki ba-bokili boka bakiyo mongo eefe; lolo banto bʼokili binʼinyo jino, efʼinyo ba-bokili; ekiʼmʼosonakʼinyo limʼokili. 20Lofwa joi likiʼmʼosangelakʼinyo, wae bokwala ntalekolaka nkolo ekande. Nga bannyokolakʼemi bifonyokolʼinyo ngoko; nga bafongaki joi likami, bifofonga likinyo ngoko. 21Lolo bifokeelʼinyo baoyiʼane bauma ndʼeloko ea lina likami, efʼiyʼea ende ontomaki. 22Nga nciyaki ko ncitefeelʼiyo, siki ntabaki lʼobe; lolo aeyoko basambʼesengamelo ea bobe bokiyo. 23Onjinʼemi jino, aolina Fafa ekami o ngoko. 24Nga ncikela ndʼetei ekiyo belemo beki bontʼomo ntakelaka, sikʼiyo ntabaki lʼobe; lolo aeyoko baote-na, ko baotina, lʼemi la Fafa. 25Lolo jokelama ndʼewela wae joi likotami nda Bonkanda wa Nzakomba, likelame, wete, Banjinakʼemi nko ncina. 26Lolo ae Bokambisa oya, o emʼotomelʼinyo limʼele Fafa, wae Bolimo wa Nsosolo, ondola limʼele Fafa, ende ifosanga nsango ndʼeloko ekami: 27koko inyo lifosanga ngoko, ekiʼnyo lʼemi limʼiango.

Currently Selected:

Yoane 15: LOL87

Highlight

Copy