Yoane 19

1Nkako Pilato aokola Yesu ko aolokunda la njiji. 2Ko soldats baotonga likuka jʼaeke ko baolafya liko ndʼotsaʼokande, ko baololotsa bonkoto wʼaliko wa pourpre. 3Bayaki elʼende ko baolokela, Wandao, Roi ea Ba-Yuda, ko baolosakola ntaka. 4Pilato aolola lenkina, ko aolakela, Bala, njolozʼende elʼinyo, wae inyo lea wetʼemi mpenʼekwa ea likambo elʼende. 5Koko Yesu aolola, ayolote likuka jʼaeke ndʼotsa, ko ayolote bonkoto wa pourpre. Ko Pilato aolakela, Bala, bonto! 6Aki nkanga ya joso lʼasaliʼakiyo oenakʼende, baobeleza, bakela, Baka ndʼekulusu, baka ndʼekulusu. Pilato aolakela, Inyo mongo lokolʼende ko loake ndʼekulusu; elʼemi mpenʼekwa ea likambo elʼende. 7Ba-Yuda baoloamba, Iso tole lʼEsekyelo, ko lʼEsekyelo eko ende eji lʼiwa, ekiʼndʼokelaka ende mongo Bona owa Nzakomba. 8Aki Pilato okaka joi line aangaki o mbaanga mongo; 9ko aolotswa lenkina nda Pretoire ko akela Yesu, Oya lima nko? Lolo Yesu ntoamba nye. 10Ndʼewelʼeko Pilato aolokela, Ofontefeelʼemi nde? Ofea wae emi nde la mpifo wae nkotungole ko nde la mpifo okoaka ndʼekulusu? 11Yesu aoloamba, Siki ofa la mpifo elʼemi nye, imola nko eko eokaema ele we limʼaliko. Ndʼewelʼeko ondekyaki ele we, ale la bobe bolekola.

12Limʼako, Pilato aolasa wae otungole; lolo Ba-Yuda baobeleza, bakela, Nga wʼotungola bontʼone ofa lilongo ja Kaisala; wengiʼonto okelʼende mongo Roi, aswela la Kaisala. 13Aki Pilato okaka baoyiʼako, aoloza Yesu ndanza, ko aokitase nda ngwende ea boteni owʼakambo, ndʼitenela itangema Le Pavé lolo nda Loebele, Ngabata. 14Mbilʼeko wae mbile ea ezelo ea elambo ea Efendelo ko liki nga jefʼotoa. Koko aokela Ba-Yuda, Bala, Roi ekinyo! 15Iyo baobeleza, Wʼoimole, wʼoimole, wʼoake ndʼekulusu. Pilato aokela, Na! Mbake Roi ekinyo ndʼekulusu? Nkanga ya joso baolamba, Tofa la Roi emo, imola nko Kaisala. 16Nkako aololekya elʼiyo, wae aakeme ndʼekulusu.

Yesu aakema ndʼekulusu

(Mt 27.32-44; Mk 15.21-32; Lk 23.26-43)

17Ko baolola la Yesu, ende ayotombe ekulusu ekae mongo, aokenda ndʼitenela itangema itenela ya Loelenge, lolo nda Loebele, Ngolongota; 18ko baoloaka eko ndʼekulusu ende la bamʼafe, oi wiji, oi wiji, ko Yesu ndʼatei. 19Pilato aokota ekotelo, ko aakʼeko ndʼekulusu. Ekotelo eko eki wae: YESU OWA NAZALETA ROI EA BA-YUDA. 20Bouke wʼa-Yuda baandaki ekotelo ene, eki itenela ikiʼndʼoakemaka ndʼekulusu ikotutsi lʼonanga; ko ekotelo eko eokotama nda lofoso ja Loebele, ko la Loelene, ko la ja Loma.

21Nkanga ya joso ya Ba-Yuda baokela Pilato, Tokotake Roi ea Ba-Yuda; lolo kota, ende akelaki, Emi nde Roi ea Ba-Yuda. 22Pilato aokaola, Joi likiʼmʼokotaka njokota.

23Aki soldats oakaka Yesu ndʼeku lusu, baokola benkoto bekande, ko baokafa beko nda baondo banei, wengi soldat wengi liondo, ko la bonai. Bonai boko ntaboki lʼesambelo, lolo bofomama bokʼouma limʼasoko kita ndʼase. 24Ngoko baotefelana, Totatake boko njaata, lolo tota mbesi wae tea osʼoata boko; wae ekotelo ea Nzakomba ekokyame: Baolakafelʼiyo mongo benkoto bekami, Ko baota mbesi ndʼeloko ea bonkotoʼokami wʼaliko. Soldats baokela baoyiʼako.

Lokai ja Yesu ele nyango

25Ko nyango ea Yesu, lʼokune owa nyango, la Malia waji owa Keliopa, ko la Malia Mangandala bakemi eko ntutama lʼekulusu ea Yesu. 26Aki Yesu enaka nyango ekae, lʼokimi okiʼndʼokaka eefe akemi ntutama lʼende, aokela nyango ekae, Bomoto, bala, bonʼoke! 27Nkako aokela bokimi oko, Bala nyango eke! Koko limʼekekʼeko bokimi oko aolotomba ndʼolaʼokae mongo.

Iwa ya Yesu

(Mt 27.45-56; Mk 15.33-41; Lk 23.44-49)

28Ndʼafeka ba joi liko, Yesu aolea wae baoyiʼauma baosilʼokokyama, ko la ncina wae ekotelo ea Nzakomba ekelame, ende akela, Ndoka mposa eʼasi. 29Ijwa ikemi eko, ikama la vinaigre to, baolongya linyuku likama la vinaigre ndʼokombe, ko baolokitsa ndʼomwa. 30Ko aki Yesu ambaka vinaigre, akela, Joi josila: ko aosunyʼotsa ko aok-enzʼolimoʼokande.

Baokiteza Yesu limʼekulusu

31Ba-Yuda baondaki Pilato wae baune bekolo bekiyo, ko bakiteza, la ncina wae mbilʼeko eki ezelo ea Sabata eʼenene, ko tolaka totacikalake nda bikulusu nda Sabata. 32Ko soldats baoyʼouna bekolo bia owa joso ko bia omo oakemaki ndʼekulusu lʼende; 33lolo akiʼyʼokitaka ele Yesu ko baolena wae aosilʼowa, iyo ntabauna bekolo bekae; 34lolo omo owa soldats aolooka nda lofanje lokae la likonga, ko nkako balongo lʼasi baolola. 35Koko endʼondenaki aosanga, ko nsango ekae ele nsosolo: ko ende ea wae atefela nsosolo, wae inyo limeza ngoko. 36Baoyiʼane baoliela wete ekotelo ea Nzakomba ekelame, Nko wese bokande bomoko ounya. 37Ko lenkina, emo ekotelo ea Nzakomba ekela, Bifoalʼende okiʼyʼookaka.

Yesu aokundama

(Mt 27.57-61; Mk 15.42-47; Lk 23.50-56)

38Ndʼafeka bʼaoyiʼako, Yosefa bosi Alimataya, oki bokimi owa Yesu, lolo la ndisama, ekiʼndʼoangaka Ba-Yuda, ende alombaki Pilato ilaka ya Yesu, wae atombʼiko; ko Pilato aolokaya elekelo. Koko aoyʼotomba ilaka ya Yesu. 39Koko Nikodemo, oko oyaki ele Yesu nda joso lʼotso, aoya ngoko, ko aoyela mula esangana la baimi, nga kilos ntuku isato lʼatano. 40Ko baokola ilaka ya Yesu, ko baoombʼiko lʼaimi la bito bia mbenza, elengʼele ekundelo eki Ba-Yuda. 41Ko lisala liki eko ndʼitenela iki Yesu oakemaka ndʼekulusu ko ekundelo eʼaeyoko eki eko nda lisala, ko nkʼonto ondambemaki eko joso. 42Baolambya Yesu eko, ndʼewela ea mbile ea ezelo ea Ba-Yuda, eki ekundelo eko eki o ntutama.

Currently Selected:

Yoane 19: LOL87

Highlight

Copy