Luka 6
6
Yesu ni Bwana wa Siku ya Sabato
(Mat 12.1-8; Mk 2.23-28)
1Siku moja ya Sabato, Yesu akapita katika mashamba ya ngano, wanafunzi wake wakaanza kuchumachuma masuke ya ngano, wakayasiritasirita katika mikono yao na kuyakula. 2Wamoja kati ya Wafarisayo wakawauliza: “Sababu gani munafanya mambo yanayokatazwa kufanya kwa siku ya Sabato?”
3Yesu akawajibu: “Hamujasoma bado vile Daudi alivyofanya wakati yeye mwenyewe na watu wake waliposikia njaa? 4Aliingia ndani ya nyumba ya Mungu, akakamata mikate mitakatifu iliyotolewa kwa Mungu, akaikula na kuwapa watu wake vilevile, ijapokuwa mikate ile iliruhusiwa kukuliwa na makuhani wenyewe tu.”
5Halafu Yesu akawaambia: “Mwana wa Mutu ndiye Bwana wa siku ya Sabato.”
Yesu anaponyesha mwenye mukono unaokauka
(Mat 12.9-14; Mk 3.1-6)
6Siku ingine moja ya Sabato, Yesu akaingia katika nyumba ya kuabudia na kuanza kufundisha. Na mule ndani mulikuwa mutu mumoja mwenye kukauka mukono wa kuume. 7Walimu wa Sheria na Wafarisayo wakamuchunguza Yesu kusudi waone kama ataponyesha mutu kwa siku ya Sabato. Walifanya vile kusudi wapate sababu ya kumushitaki. 8Lakini kwa kuwa Yesu alijua mawazo yao, akamwambia yule mutu mwenye mukono unaokauka: “Simama pale mbele ya watu.”
Naye akaenda kusimama pale. 9Kisha Yesu akawaambia: “Ninawauliza: Sheria inaturuhusu kufanya mema au mabaya kwa siku ya Sabato? Kuponyesha mutu au kumwua?”
10Yesu akawaangalia wote waliokuwa pale, kisha akamwambia yule mutu: “Nyoosha mukono wako.”
Naye akafanya vile, na mukono wake ukakuwa muzima tena. 11Lakini wale wakubwa wakakasirika sana, wakaanza kusemezana wao kwa wao juu ya namna watakavyomutendea Yesu.
Yesu anawachagua mitume kumi na wawili
(Mat 10.1-4; Mk 3.13-19)
12Katika siku zile, Yesu akapanda juu ya kilima kwenda kuomba na kukesha usiku wote akiomba Mungu. 13Kulipokucha, akawaita wanafunzi wake, na kuchagua hawa kumi na wawili katikati yao, akawapanga jina la mitume: 14Simoni (Yesu aliyemupa jina la Petro) na ndugu yake Andrea, Yakobo na Yoane, Filipo na Bartolomayo, 15Matayo na Toma, Yakobo mwana wa Alfayo na Simoni (wa kikundi cha Wazeloti), 16Yuda mwana wa Yakobo na Yuda Iskariota aliyemutoa Yesu.
Yesu anafundisha na kuponyesha wagonjwa
(Mat 4.23-25)
17Yesu akashuka toka kilima pamoja na wanafunzi wake, na kusimama kwenye uwanja. Pale kulikuwa wanafunzi wake pamoja na kundi kubwa sana la watu waliotoka Yerusalema, katika Yudea yote na pande za miji Tiro na Sidona pembeni ya bahari. 18Watu hao walikuja kumusikiliza na kuponyeshwa magonjwa yao. Na wale walioteswa na pepo waliponyeshwa. 19Watu wote walitaka kumugusa, kwa sababu uwezo ulikuwa ukitoka ndani yake na kuwaponyesha wote.
Baraka na laana
(Mat 5.1-12)
20Kisha Yesu akawaangalia wanafunzi wake na kusema:
“Heri kwenu munaokuwa wamasikini,
maana Ufalme wa Mungu ni kwenu.
21Heri kwenu munaokuwa wenye njaa sasa,
maana mutashibishwa.
Heri kwenu munaolia sasa,
maana mutacheka.
22“Heri ninyi wakati watu wanapowachukia, wanapojitenga nanyi, wanapowatukana na kuchafua jina lenu kwa ajili ya Mwana wa Mutu! 23Mambo hayo yatakapotokea, mufurahi na kurukaruka, maana munawekewa zawadi kubwa mbinguni. Ni hivi babu zao walivyowatendea manabii.
24Lakini ole kwenu ninyi munaokuwa watajiri,
maana hamutapata raha ingine.
25Ole kwenu ninyi munaoshiba sasa,
maana mutasikia njaa.
Ole kwenu ninyi munaocheka sasa,
maana mutahuzunika na kulia.
26Ole kwenu ninyi wakati watu wote watakapowasifu,
maana ni hivi babu zao walivyowatendea manabii wa uongo!
Kuwapenda waadui
(Mat 5.38-48; 7.12a)
27“Lakini kwa ngambo yenu ninyi munaonisikiliza ninawaambia: muwapende waadui zenu. Muwatendee mema wale wanaowachukia. 28Muwaombee baraka wale wanaowalaani. Muwaombee wale wanaowaonea. 29Kama mutu akikupiga kofi kwa shavu moja, umugeuzie lingine vilevile. Kama mutu akikunyanganya koti yako, umwachie shemizi yako vilevile. 30Mutu akikuomba kitu umupe nacho, na anayekunyanganya vitu vyako, usiombe akurudishie. 31Muwatendee wengine sawasawa munavyotaka wawatendee ninyi vilevile.
32“Muko na shukrani gani kama munawapenda tu wale wanaowapenda? Kwa maana hata wenye zambi wanawapenda wale wanaowapenda. 33Muko na shukrani gani kama munawatendea mema tu wale wanaowatendea mema? Hata wenye zambi wanafanya hivi vilevile. 34Tena, muko na shukrani gani kama munawakopesha tu wale munaowatumainia kwamba watawarudishia? Hata wenye zambi wanawakopesha wenye zambi wenzao kusudi warudishiwe tena mali ile ile! 35Lakini muwapende waadui zenu, muwatendee mema na muwakopeshe pasipo kutumainia kurudishiwa kitu. Halafu mutapewa zawadi kubwa na mutakuwa kweli watoto wa Mungu Mukubwa kwa sababu yeye ni mwema kwa watu waovu wasiokuwa na shukrani. 36Mukuwe wenye huruma, kama vile Baba yenu anavyokuwa mwenye huruma.
Kutokuhukumu wengine
(Mat 7.1-5)
37“Musiwahukumu wengine, na Mungu hatawahukumu ninyi. Musikuwe wenye kukatia wengine azabu, naye hatawaazibu ninyi. Muwasamehe wengine, na Mungu atawasamehe ninyi vilevile. 38Muwape wengine, na Mungu atawapa ninyi. Mutapokea kipimo kikubwa kilichojaa zaidi. Kwa maana mutapimiwa na kipimo kile munachotumia kwa wengine.”
39Yesu akawaambia tena wanafunzi wake mufano huu akiwauliza: “Kipofu anaweza kumwongoza kipofu mwingine? Wote wawili hawatatumbukia ndani ya shimo? 40Mwanafunzi hamupiti mwalimu wake akili, lakini kila mwanafunzi anayetimiza mafundisho yake, atakuwa kama mwalimu wake.
41“Namna gani unaona vumbi inayokuwa ndani ya jicho la ndugu yako, lakini haufikiri juu ya nguzo inayokuwa ndani ya jicho lako? 42Au, namna gani unaweza kumwambia ndugu yako kwamba aache umwondoe vumbi inayokuwa ndani ya jicho lake, wakati ndani ya jicho lako mungali ile nguzo. Wewe munafiki, ondosha kwanza nguzo kutoka ndani ya jicho lako, kisha utaweza kuona waziwazi na kuweza kuondosha ile vumbi inayokuwa ndani ya jicho la ndugu yako.
Muti na matunda yake
(Mat 7.16-20; 12.33-35)
43“Hakuna muti muzuri unaoweza kutoa matunda mabaya, wala hakuna muti mubaya unaoweza kutoa matunda mazuri. 44Kwa maana kila muti unajulikana kwa njia ya matunda yake. Watu hawachumi matunda ya tini au mizabibu juu ya miti ya miiba. 45Mutu muzuri anasema maneno mazuri kutokana na uzuri wa moyo wake. Na mutu mubaya anasema maneno mabaya kutokana na ubaya wa moyo wake. Kwa maana kinywa cha mutu kinasema maneno yanayojaa ndani ya moyo wake.
Wajengaji wa namna mbili
(Mat 7.24-27)
46“Sababu gani munaniita ‘Bwana, Bwana,’ nanyi hamufanyi yale ninayowaamuru? 47Nitawaonyesha mufano wa mutu anayenifuata, anayesikia maneno yangu na kuyashika: 48anafananishwa na mutu aliyejenga nyumba, akaichimbia musingi chini sana mpaka kwenye jiwe, na kuujenga pale. Mvua kubwa iliponyesha, muto ukajaa na maji yakashambulia nyumba ile, lakini hayakuweza kuitikisa, kwa sababu ilikuwa imejengwa vizuri. 49Lakini yule anayesikia maneno yangu pasipo kuyashika, anafananishwa na mutu aliyejenga nyumba juu ya udongo bila kuchimba musingi. Maji kutoka muto yakaishambulia, na mara moja ikaanguka na kubomoka kabisa.”
Currently Selected:
Luka 6: SWC02
Highlight
Share
Copy
Want to have your highlights saved across all your devices? Sign up or sign in
Bible in Swahili Congo © Bible Society of the Democratic Republic of Congo (DRC), 2002.
