Bambata Pai 29
29
Pa manga Yakoba sunge fu Rabana tipa Raere na Rea
1Yakoba ki ndu gako nunguro, ki da ku rogo gu ringara nga ga aboro ku uroyo. 2Ko ki ya ngere, ki bi guga rogo kpasakpasa rago, rimbasa akandoro biata napiki pati he; bambiko i anafu ime ti kina gu guga re fu rimbasa anya. Gu mbia nadu ti ngba gu guga re si adu ni bakere he. 3Ho i anadungura rimbasa akandoro ku ho ni, ababanda akandoro ki niwirigi mbia ti ngba guga, ki nifu ime fu akandoro, i ki nimoi mbia ku ba ha berewe ti ngba guga.
4Yakoba ki ya fu yo, “Awirinami, oni naye wari?” I ki ya, “Aboro Arana nga ani.” 5Ko ki ya fu yo, “Oni ini Rabana nga wiri Naora?” I ki ya, “Ani ini ko.” 6Ko ki ya fu yo, “Ko zezeredi?” I ki ya, “Ko zezeredi; mo ngére, Raere nga wiriko ri gu naye na akandoro re!” 7Ko ki ya, “Were, wa du uru kina ku ari, rago ata mbeda nga ka dungura rimbasa anya te; oni fú ime fu akandoro, ki ndu ka riga ra.” 8I ki ya, “Ka ani mangi nga wo te, da kina ho rimbasa anya ka dungura tira ni dunduko, i ki wirigi mbia ti ngba guga; ani ki fu ime fu akandoro tie.”
9Wa ko afura na yo, Raere ki ye na ga bari akandoro; bambiko ri nanabanda ra.
10Ho Yakoba abi Raere ni nangia wiri Rabana nangia kawiri nako, na ga Rabana akandoro nangia kawiri nako, Yakoba ki ndu ki wirigi mbia ti ngba guga, ki fu ime fu rimbasa ga Rabana anya, nga kawiri nako. 11Yakoba ki nyoro pa ngba Raere, ki poi ku ari, ki nikpari ni aume. 12Yakoba ki gumba ha fu Raere ki ya wiri dawiri bari nga ko, nga wiri Rebeka; ri ki oro ki gumba ha fu bari.
13Ho Rabana agi agi apai ni re tipa Yakoba nangia wiri dawiriko, ko ki oro ka ngbisa ko, ki dungo ko, ki nyoro pa ngbako ki ye na ko ku rogo gako bambu yo. Yakoba ki gumba pa agi apai re dũ fu Rabana, 14Rabana ki ya fu ko, “Kina boro memere nga mo na pasiore ni rengo!” Ko ki sungu na ko wa diwi sa.
15Rabana ki ya fu Yakoba, “Wa du mo ni wiri dawire ngba ha angba mo mangi sunge fere gbua? Mo gúmba ha fere, ga mosoro sunge nikangia gine?” 16Awiri Rabana adu ni ade ue; rimo unvuru nangia Rea, rimo tame ki ngia Raere. 17Bangiri Rea adu ni bayee he, ono Raere tigari ngbanyari adu ni bawene he, ri adu ni betedi de. 18Yakoba ki nikpi nyemu Raere; ko ki ya, “Mi amánga sunge foro wa garã saba tipa wiro nga Raere nga tame.” 19Rabana ki ya, “Si ngba ka mi fu ri foro, ti fu mi ri fu kura kumba; mo súngu na mi.” 20Yakoba ki mangi sunge wa garã saba tipa Raere. Si ki du bangiriko ni kina toni rame, bambiko gu bakere nyemuri nadu ti ko.
21Yakoba ki ya fu Rabana, “Mo fú diare fere, bambiko gi rago rengbe, mi ndu fuo ri.” 22Rabana ki dungura agu aboro dunduko naadu rogo gu rago re, ko ki mangi pumbo diade. 23Ono nyemu ko ki di Rea nga wiriko, ki ye na ri fu Yakoba; ko ki ndu fuo ri. 24Rabana ki fu Zirepa, gako kanga, fu Rea nga wiriko, ri du ni gari kanga. 25Fuo gure wiso mo ngére, kina Rea nadu. Yakoba ki ya fu Rabana, “Gini pai nga gi mangi mo ti re re? Mi amanga nga sunge foro tipa Raere te? Tipagine biriki mo re ti ni?” 26Rabana ki ya, “A nga sinorani nga fu tame mbata fu unvuru te. 27Mo nyási ga gu ri poso re, ani ki fu gu kura ri foro a tipa gu sunge mo ka manga ha fere tipa kura garã saba.” 28Yakoba ki mangi wo, ki nyasi gari poso. Rabana ki fu Raere nga wiriko fu ko ni diako. 29Rabana ki fu Bira gako kanga fu Raere nga wiriko ni gari kanga. 30Yakoba ki ndu fuo Raere a, ki nikpi nyemu Raere ki susi Rea, ko ki mangi sunge fu Rabana tipa kura garã saba.
Pa agu agude i abatika yo fu Yakoba
31Ho Yekova abi he ni ya Yakoba nasoga Rea asoga, ko ki za ngba rukumburi; ono Raere adu ni irazangada. 32Rea ki du na mobara ki batika kumbagude ki yambu rimoko nga Rubena; bambiko ri aya, “Bambiko Yekova bi gi rungo; awere kumbami nikakpi nyemu re.” 33Ri ki du na mobara berewe, ki batika kumbagude, ki ya, “Bambiko Yekova gi he ya kumbami nasoga re asoga, si du ko fu gi ko re fere berewe.” Ri ki yambu rimoko nga Simona. 34Ri ki du na mobara berewe ki batika kumbagude, ki ya, “Were, ni gi rago re kumbami nikaka kuti re, bambiko mi batika akumbagude fu ko biata.” Si du i ayambu rimoko ti ni nga Revi. 35Ri ki du na mobara berewe, ki batika kumbagude. Ri ki ya, “Ni gi rago re mi nikatambua Yekova atambua”; si du ri ayambu rimoko ti ni nga Yuda. Ri ki mbu pa batika.
Currently Selected:
Bambata Pai 29: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
