Ruka 11
11
Ga Yesu yugopai tipa kparakpe
(Mt. 6:9-15; 7:7-11)
1Si ki ta du wa gere, wa Yesu akpara rogo gu ba, ho ko ambu he ni, gu ni sa dagba gako abawiriki ki ya fu ko, “Gbia, mo rába rani ani kpari wa kina Yoane araba gako abawiriki.” 2Ko ki ya fu yo, “Ho oni ka kpara ni, oni ya:
“Barani du ngbangbaturũ yo, ani irisi rimoro airisa. Ga ngbi yé. 3Mo fú gaani riahe fu rani na uru. 4Mo vú rani ti gaani ingaapai; bambiko ani a tigaani navu agu yo ninainga pai fu rani. Ka mo ngbé nga fu rani mbata yo sa asada ya.”
5Yesu ki ya fu yo, “Da du na badiangba dagba roni, ni ki ndu koyo du ni ni bebere yuru, ki ya fu ni, ‘Badiare, mo fú kpokuta biata fere; 6bambiko gu badiare ye kono du mi ni ngba gani nunguro, a nga he be re ka mi fu he fu ni wa sa te’. 7Gu ni du dimo yo ki karaga ha ki ya, ‘Ka mo fúdi nga re ya; ngbadimo du ni kisikisi he awere, awire du na mi barame no; ka si adu nga wa ka mi guari ka fu he foro ya.’ 8Ya mi fu roni wẽ, ka ni aguari nga ka fu he fu ni bambiko badiani nangia ni ya, ono mbiko gani zadapai ni aguari ka fu gu he fu ni a wa ni akpi nyemu he. 9Ya mi fu roni wẽ, Oni sána he tipa he, i ki fu he fu roni; oni gbáta he, oni ki bi he, oni ngóka ngbadimo, i ki uru he fu roni. 10Bambiko gu ni nasana he tipa he ni adía ha adia; gu ni nagbata he ni abí he abi; gu ni nangoka ngbadimo i aúra ha fu ni. 11Gini bakumba du dagba roni, ka wirini sana ni tipa kpokuta, ni ki fu mbia fu ni? si ngia tipa tĩo, ni ki fu wo fu ni? 12Ka ni sana he tipa parakondo ni ki fu ngerembia fu ni? 13Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama Ziazia Toro fu agu yo nasana ko, te?”
Yesu na Barazebuba
(Mt. 12:22-30; Mk. 3:19-27)
14Wa Yesu adanda daimona nangia irangoianga, si ki ta du wa gere, ho daimona akuru ni, irangbianga ki fura; rimbasa aboro ki kigi akiga. 15Agu aboro ki ya, “Ko nadanda adaimona vurube Barazebuba nga gbia adaimona.” 16Akura yo ki ta asada ko, nidarĩ ko ko yugu gu pai i aina pai ti ni ngbangbaturũ yo fu yo. 17Ono ko ata ina gayo aberã, niya fu yo, “Gu ngbi dunduko du ni kparakpara ha ni sa ha si apáya apaya; gu bambu du ni kparakpara ha ni sa ha si atí ati. 18Si ngia Satana du ni kparakpara ko ni tiko, gako ngbi arú wãi? bambiko ya oni mi nadanda adaimona vurube Barazebuba. 19Were ka mi dandi adaimona vurube Barazebuba, awironi nadanda ra vurube da? were kina yo ka du ni gaoni abasapungbanga. 20Ono ka mi dandi adaimona ni wirinzaga Mbori, ga Mbori ngbi ima da fu roni. 21Ho gu ngangara boro du na gani marã vura ti ni dunduko nabanda gani kporo ni, gani ahe ki du ku baha. 22Ono ho gu ni du ni bahe ti ni ka ye ni fuo ni, ki di be ni, ni ki rogo gani úvura aroga dunduko nga gu ni afu tini ku be he, ki kparaka gani ũdĩ. 23Gu ni ka du nga na mi ya vurare nga ni; gu ni ka dungura nga ahe wa sa na mi ya ni nagbandaka ha agbandaka.
Gbigbita toro akaraga tiru
(Mt. 12:43-45)
24“Ho gbigbita toro akura ni kpotoboro yo, u ki merẽ ngbakungba yo, ka gbata ba ongoda; ka u abi nga ha ya, u ki ya, ‘Mi akáraga tire ku rogo gi bambu ho mi akuru ni?’ 25Ho u ada ni, u abi he ni wegewege he ni tata ha. 26U ki ndu ki nirogo kura atoro fuo ru saba susi ru na gberã; ami ki rimi ki sungu yo. Gu kusa pai nga ga gu boro re si ki gberẽ ti gu nadu mbata.”
Ndikidi aboro maku
27Si ki ta du wa gere, wa Yesu agumba agi apai re de dagba rimbasa aboro ki poi ku ari, ki niya fu ko, “Maku ti gu rukumbu nabatika ro na gu mai mo aha.” 28Ko ki ya, “Aboro maku nga agu yo ti gure, nagia ga Mbori pai, ki nika kuti ni!”
Gu pai nga ga Yona i aina pai ti ni
(Mt. 12:38-42; Mk. 8:12)
29Ho rimbasa aboro azugadi ni pati Yesu, ko ki ya, “Gi rika aboro re nga gbegberẽ rika aboro; i nagbata gu pai i aina apai ti ni; ka i afú nga gu pai i aina apai ti ni fu yo ya kina gu pai nga ga Yona. 30Bambiko wa Yona adu ni gu pai i aina apai ti ni fu aboro Ninive, kina wo a Wiri boro ka du ni gu pai i aina apai ti ni fu gi rika aboro re. 31Nakindo pavururago yo nikamo ku ari rago sapangbanga kuti gi rika aboro re, ki gbarasi ngbanga fu yo; bambiko ri aye digida sende yo ka gia gu tatamana nga ga Soromo; oni bi nga, gu ko kina erẽ du ni bahe ti Soromo. 32Aboro Ninive nikaru ku ari rago sapangbanga na gi rika aboro re, ki gbarasi ngbanga fu yo: bambiko i asa gayo berã mbiko ga Yona tungusa pai fu yo; were oni bí nga, gu ko kina erẽ du ni bahe ti Yona.”
Ima boro
(Mt. 5:15; 6:22-23)
33“A nga boro sa ka tiga baro ki moi he ku rogo due yo na ni maduka yo a te, ono auru nguaha, ya agu aboro nikarima koyo i ki bi ima ha. 34Bangiro nga gu imarago nga ga kpotoro; ho du bangiro ni ni ruru he, harago nahisa kpotoro yo dunduko; ho du bangiro ni ni iraira ha, bitimo nahisa kpotoro yo. 35Were mo ngére ka ngia gu imarago du vuro yo nangia bitimo. 36Were ka kpotoro yo hi be imarago, ka bitimo du nga yo wa sa ya, si ahi be imarago dunduko, a wo baro niha ki fu imarago foro.”
Rungo tipa aFarusi na abainiparungute
(Mt. 23:1-36; Mk. 12:38-40; Rk. 20:45-47)
37Were wa Yesu agumba ha, Farusi ki sana ko i ri riahe na ko; ko ki rimi ki nisungu ka ri riahe. 38Ho Farusi abi he ni, si airiwo airiwo t i ko ya Yesu azunda nga tiko ka ri riahe te. 39Gbia ki ya fu ko, “Were oni nga aFarusi nazunda kina gii inga yo na gii kurungbu yo; ono vuroni ki hi ahi be gbu ahe na gbigbita apai. 40Airamungo nga oni! Gu ko namangi gii he yo kina ko namangi vuru he yo ate? 41Oni fú gamunihe a ni agu ahe du be roni; oni ngére, ahe dunduko ki du ni gigiri he fu roni.
42“Na gberẽ he fu roni aFarusi! bambiko oni nafu sa dagba bawe nga ga danda na anisi na akpepasio dunduko ki he sapangbanga na ga Mbori nyemuse. Gi ka oni amangi he re, ka oni ahe nga manga gu kura ha a ya. 43Na gberẽ he fu roni aFarusi! bambiko oni nakpi nyemu ambata irisa bambutiria yo, na paa aboro kuti roni bangbeahe yo. 44Na gberẽ he fu roni! bambiko oni wa agu amurã i abi nga ha ya, agu aboro nandu auru he ka i aina nga ha ya.”
45Gu ni sa dagba abainiparugute ki karaga ha ki ya fu Yesu, “Bayugupai, wa mo agumba gi pai re mo nagbarasa rimorani a.” 46Yesu ki ya, “Na gberẽ he fu roni abainiparugute a! bambiko oni namaa rõrõi tindiro ku ri aboro, oni tigaoni azada nga tindiro na wirinzagaroni wa sa te. 47Na gbẽre he fu roni: bambiko oni nadua agu amurã nga ga anebi, abaroni aimi yo. 48Were oni nga adezire he ki idi ga abaroni mangaapai: bambiko i aimi yo, oni ki dua amurãyo. 49Were ya ga Mbori tatamana a wẽ, ‘Mi akéda anebi na amokedi fu yo; i aímo agu yo ki rungosi yo.’ 50Kure anebi dunduko, nga gu i auka ha ho zegino aenge ni daku awere si adú ku ri gi rika aboro re; 51tona ti kure Ebere ki da ti kure Zakaraya, i aimi ko dagba bamotumo na ziazia bambu. Ya mi fu roni ni rengo, si adú ku ri gi rika aboro re. 52Na gberẽ he fu roni abainiparugute! bambiko oni adi gu wiri rifungura nga ga inahe ku sa yo; oni tigaoni arima nga koyo te, oni ki za agu aboro naye ka rima koyo.”
53Ho Yesu akuru yo ni abakeapai atona turã ko bakere na aFarusi, i ki darĩ ko ko gumba dungu apai; 54i ki nikparia ko, ka zia ko ti fugo ngbako yo.
Currently Selected:
Ruka 11: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
