Ruka 22

Yuda akusi Yesu

(Mt. 26:1-5,14-16; Mk. 14:1-2,10-11; Yo. 11:45-53)

1Rago pumbo gu kpokuta adu nga na agbooro ti ni ya ki mbedi, nga gu i aya ti ni Pumbo Susiri. 2Abairamotumo ki saki pai na abakeapai ya i awira pa imo Yesu wãi; bambiko i agunde be aboro.

3Satana ki rimi ku vuru Yuda yo nga gu ko i aya ti ko Keriota, nga gu ko nadu dagba agu yo nanidu bawe na ue. 4Ko ki ndu ki nifura na abairamotumo na abanyaki ya, ko awira pa kusa Yesu fu yo wãi. 5Si ki ngba angba ti yo, i ki idi pa fu marã fu ko. 6Ko ki idi he, ki nigbata rago ho ko ka kusa Yesu ni fu yo, ho rimbasa ka adu nga yo ni ya.

Yesu ari pumbo susiri na gako abawiriki

(Mt. 26:17-25; Mk. 14:12-21; Yo. 13:21-30)

7Rago gu kpokuta adu nga na agbooro ti ni ya, ki da, ho i ka tumo ni na kandoro pumbo susiri. 8Yesu ki kedi aPetero na Yoane, ki ya, “Oni ndú ka mbakada pumbo susiri fu rani, ani ri he.” 9I ki ya fu ko, “Mo nakpi nyemu ani mbakadi he wari?” 10Ko ki ya fu yo, “Oni ngére, ho oni ka rima ni ku bakporo yo, kumba agbía roni naaka ime rogo akoro; oni péke ko ku rogo gu bambu ko ka rima ku rogo. 11Oni ki ya fu irabambu, ‘Ya Bayugupai foro, Bambu agino wari, mi ka ri pumbo susiri rogo na gimi abawiriki?’ 12Koayugo bakere vuru bambu fu roni na ahe kina yo dũ; oni mbákadi he yo.” 13I ki ndu ki nibi he wa ko agumba ha fu yo; i ki mbakadi pumbo susiri.

14Ho ragoho ada ni, Yesu ki sungu, amokedi ki sungu na ko.

Pa Ziazia Ngbanya

(Mt. 26:26-30; Mk. 14:22-26; 1 Kor. 11:23-26)

15Yesu ki ya fu yo, “Mi akpi nyemu ka ri pumbo susiri na oni ni bakere nyemu he mbata mi nikahi pai; 16bambiko ya mi fu roni, mi ari nga ha te, daho si ka diga ni rogo ga Mbori ngbi yo.” 17Ko ki di inga, ho ko afu tambuahe ni tipa ha, ko ki ya, “Oni dí gere, ki kparaka ha dagba roni; 18bambiko ya mi fu roni, mi ambira nga rindi bakakue berewe te, daho ga Mbori ngbi ka da ni.” 19Ko ki di kpokuta, ho ko afu tambuahe ni tipa ha, ko ki kuadi he, ki fu he fu yo, niya, “Borore nga gere [du ni fufu he tipa roni. Oni mangi gere nitingidi pa re.” 20Ko ki di inga kina wo fuo riahe, niya, “Gi inga re, si nga vovo ndika rogo kurere, nga kina gu nauka tipa roni.] 21Ono oni ngére, be gu ni nakusa re du na mi pati mbisa. 22Bambiko Wiri boro nandu, a wa i aringbisi he ni rengo; ono si agbérã tipa gu kumba nakusa ko!” 23I ki tona ka sana he dagba yo, ya da nga gu ni dagba yo nikamanga gi pai re.

Da nga bakumba boro

24I ki tona ka ti kangu, ya da dagba yo du ni bakumbayo. 25Yesu ki ya fu yo, “Ga aGendiria abakindo nazoga yo azoga; agu yo nakindo yo i naya ti yo betedi aboro. 26Ono oni adú nga wo te; ono gu ni du ni bahe dagba roni, ni ka du wa kina tame; gu ni du ni gbia, ni ka du wa gu ni namanga pa aboro. 27Bambiko watadu gu ni nasunga ka ri riahe na gu ni nafu he fu ni, da nga bakumba? a nga gu ni nasunga ka ri riahe te? Ono mi dagba roni wa gu ni namanga pa aboro.

28“Ono oni nga agu yo naadu na mi ho i aasadi re ni. 29Mi nafu ngbi fu roni a wa Buba afu he fere, 30oni arí riahe ki mbiri he pati gi mbisa rogo gi ngbi; oni asúnga auru ambataabakindo nisapu ngbanga fu rika aYisaraere bawe na ue.

Yesu ayugu pa ga Petero tigo

(Mt. 26:31-35; Mk. 14:27-31; Yo. 13:36-38)

31“Ako Simona, Simona, mo bi, Satana akpi nyemu ka dia roni ka igita roni wa tunga, 32ono mi akpari tipa ro, ya ka ga idapase paya nga ya. Mo tigamo, ho mo ka sa tiro ni berewe, mo nyákasi awirinamo.” 33Petero ki ya fu ko, “Gbia, mi idi ka ndu na mo ka si vura du ku rogo bambukisa yo na fu kpio vuru.” 34Yesu ki ya, “Mi nagumba ha foro, Petero, mbata bakondo nikakua areme, mo atí kangu bara biata ya mo aina nga re te.”

Amangu na basape

35Yesu ki ya fu yo, “Ho mi akedi roni ni, ka mangu adu nga be roni na mangu marã na rakata ya, zingo he amangi roni?” I ki ya, “Wa sa te.” 36Ko ki ya fu yo, “Ono awere, gu ni du na mangu be ni ni dí he na mangu marã a. Gu ni adu nga basape be ni ya, ni bági gani gbanga remu ki ngbe basape na ni. 37Bambiko ya mi fu roni, gu pai dũ ni keke he si ka du ni digisidigisi he ti re re, ‘I agedi ko na atindika’; bambiko gu pai dũ tipa re si adú ni digidigi he.” 38I k ya, “Gbia, mo bí, basape erẽ ue.” Ko ki ya fu yo, “Si nyasi.”

Yesu akpari Getesemane yo

(Mt. 26:36-46; Mk. 14:32-42)

39Yesu ki kuru ki ndu, wa sinoko adu, ku pati bagangara Aeraya; abawiriki ki peke ko a. 40Ho ko ada ni, ko ki ya fu yo, “Oni kpári akpara ka oni ndu nga ku rogo asada ya.” 41Ko ki guari pati yo toni wa ba yo mbia; ko ki kuku ki nikpari, 42niya, “Buba, ka mo nakpi nyemu he, mo dí gi inga be re re. Ono ka si du nga wa mi akpi nyemu he ya, ono wa kina mo akpi nyemu he.” 43Maraika ki ye koyo du ko ni, ki ninyakasi ko. 44Imisiripai ki mangi ko ko ki kpari akpara kakaka gbe; gako randimo ki du wa kina bakere togoro kure nitotogo ku sande. 45Ho ko aguari ni pati gako kpe, ko ki ye koyo du gako abawiriki ni, ko ki bi yo i nira ara mbiko rungo, 46ko ki ya fu yo, “Tipagine oni nara ti ni? Oni gúari ki kpari ka oni ndu nga ku rogo asada ya.”

Zia Yesu

(Mt. 26:47-56; Mk. 14:43-50; Yo. 18:2-11)

47Ho ko agumba gi pai ni re, oni ngére, rimbasa ki ye na gu ko nadu dagba agu yo nanidu bawe na ue nangia Yuda, ko ningbe mbata yo fu yo; ko ki mbedi koyo du Yesu ni ka dungo ko. 48Ono Yesu ki ya fu ko, “Yuda, kusi mo Wiri boro ni dungo ko?” 49Ho agu aboro nadu pati ko abi gu pai nikamanga ni, i ki ya, “Gbia, ani ta yo ni basape?” 50Gu ni dagba yo ki ta ga gbiamotumo moyambu, ki kati kumbatuko. 51Ono Yesu ki karaga ha ki ya, “Oni he he kuti gere.” Ko ki zadi tuko, ki nihusi ko. 52Yesu ki ya fu abairamotumo, na agu abanyaki nga ga yekaru yo, na ga aYudo abaakumba, nga agu yo naye kuti ko, “Sa oni re ni batuka, ye oni ti ni na abasape na angbondo? 53Ho ani adu ni na oni yekaru yo na uru, oni atãa nga beroni kuti re te. Ono gaoni rago nga gere na gu tandu nga ga bitimo.”

Petero aoro rimo Yesu

(Mt. 26:57-58,69-75; Mk. 14:53-54,66-72; Yo. 18:12-18,25-27)

54I ki zi ko, ki ndu na ko, ki ye na ko ku rogo ga gbiamotumo bambu. Ono Petero ki pe ko tuturu. 55Ho i aginda we ni rogo vuru bambu, ki mongo sungu, Petero ki sungu dagba yo. 56De pangbadimo ki bi ko wa ko asungu ima we, ri ki bi ko nganganga, ki ya, “Gi kumba re adu na ko a.” 57Ono ko ati kangu, niya, “De, mi aina nga ko te.” 58Fuo gere toni kura boro ki bi ko, ki ya, “Ngbatungayo nga mo a.” Ono Petero ki ya, “Kumba, mi te.” 59Saa sa ki susi fuo gere kura boro ki gumba ha nizunga he, niya, “Gi kumba re nidu na ko a ni rengo; bambiko boro Gariraya nga ko.” 60Ono Petero ki ya, “Kumba, mi aina nga gu pai mo agumba te re.” Wa ko agumba ha, bakondo ki kua akua ni ba sa. 61Gbia ki sa tiko, ki ngere koyo du Petero ni. Petero ki tingidi ga Gbia pai, wa ko agumba ha fu ko, “Mbata bakondo nikakua areme, mo aora rimore bara biata.” 62Petero ki kuru ki kpari akpara ni aume gbe.

I asawia Yesu ki ta ko

(Mt. 26:67-68; Mk. 14:65)

63Agu akumba nazadi Yesu i ki sawia ko ki nita ko. 64Ho i avo bangiriko ni, I ki sana ko, niya, “Mo gúmba ha! Da nga gu ni nata ro?” 65Dungu kura apai i agumba ha kuti ko, nisenge ko a.

Yesu barangba ga aboro abaakumba

(Mt. 26:59-66; Mk. 14:55-64; Yo. 18:19-24)

66Ho rago agiri ni, rimbasa ga aboro abaakumba ki tiria, abairamotumo na abakeapai a; i ki ndu na ko ku rogo gayo barondo yo, niya, 67“Si ngia Kristo nga mo, mo gúmba ha fu rani.” Ono ko ki ya fu yo, “Ka mi agúmba ha fu roni, oni aida nga paha te; 68ka mi asána roni, oni akáraga nga pai te. 69Ono fuo gi rago re Wiri boro asúnga ku kumbabe ga Mbori tandu.” 70I ki ya dunduko, “Atika Wiri Mbori nga mo?” Ko ki ya fu yo, “A si oni agumba ha re ya mi nga ko.” 71I ki ya, “Gini pai ani akpi nyemu aboro gumba ha kuti ko berewe? Bambiko ani nigi he tigaani ngbako yo.”

Currently Selected:

Ruka 22: ZB1978

Highlight

Copy