เกาตีนา 27
27
ยาโคบ จุ เอิด แญง อวยพอน อิซอัก
1ญาม นัน อิซอัก ก็ มแบร็ห ซีเละ มัด นำ ก็ ไอ มี ปอ เลาะ นำ ดอม ซีวะ ก็ ไอ มี ปอ ตาด เตาะ นำ ก็ งกรอ เอซาว โตะ และ ออ “ควัน เฮย” นำ อัง เอซาว ก็ ซวัล นำ “ซีวะ บ็อห เอา” นำ อัง
2อิซอัก ก็ ไล นำ ฮุนเน “มัห เม็จ แลว นอ เอา ก็ มแบร็ห แลว เอา เปิล งิ นเดย ฮุ ก็ ไอ มี เม็จจึด เตาะ 3มัห เอิด ทะนู เอิด ลูกซอน ทะนู เริล โละ ปัด ตัก นโจ ดาย 4กัน มัห กุญ ปัด แลว ก็ ครอ ระ มัห แอง เลาะๆ ป็อง ตี เอา ซอบ นัน ครอ ระ มัห ซับ อน ตัก เอา ป็อง วาล ไอ ตัน เอา เปิล เน ดาย แลว เอา ป็อง อิม แลว เอา ก็ อวยพอน อน มัห งวะ” นำ อัง
5ญาม อิซอัก จ็อก เคิบ เอซาว นัน เรเบคา ก็ เม็จ แญง ปาม เรเบคา พก ปัง แญง ปาม อุ นัน ปน เอซาว เริล โละ นโจ แลว 6เรเบคา ก็ เล็ง โตะ ไล ยาโคบ ฮุนเน “มันเน เคิน เอิญ เม็จ แญง เอา มัห จ็อก เคิบ เอซาว ดาย 7นำ ไล เอซาว เริล และ ปัด ตัก นโจ นำ ก็ ไล เอซาว แอง ซะ ป็อง เลาะๆ อน ออ ป็อง แลว นำ ป็อง อิม แลว นำ ก็ อง อวยพอน อน เอซาว เคิบ มัด เยโฮวา วาล ไอ ตัน นำ เปิล เอา มัห ไล เอซาว คือนะ ดาย
8ควัน เฮย มัห ปัง แญง เม ดาย 9มัห เริล เอิด ควัน แปะ เอิด นัง เคิญๆ เปียะ นัง ซับ ตัก เม เม แอง ซะ ป็อง เลาะๆ อน ตัก เอา มัห ฮุน นำ ซอบ ป็อง จู ลบ นัน 10เม แอง อน ตัก มัห มัห ก็ ซับ ตัก เอา ป็อง กัน อิม เอา มัห แลว นำ ก็ อวยพอน อน มัห วาล ไอ ตัน นำ เปิล ดาย” เรเบคา อัง เค็ย ยาโคบ
11ยาโคบ ก็ ไล เม ฮุนเน “เม เอซาว ดก นโซก นำ ดาย ดอม เอิญ เน เอิญ เป็น ครำ เมียล ไอ มี ดก นโซก ฮุน เอซาว ดุห 12กัน เอา โลด นัง เอิญ นำ ก็ เม็จ ดุห กัน นำ เม็จ เอิญ จุ ออ นำ ก็ จม งวย เอิญ วัล นำ ก็ ไอ มี อวยพอน เอิญ เตาะ” ยาโคบ อัง
13เรเบคา ก็ ไล นำ ฮุนเน “ควัน เฮย ครอ ระ แญง จม งวย นัน เล็ห ตัก เม ฮัก ดาย ควัน มานะ เน มัห ต็อง ปัง แญง เม ดาย มัห เจ็ย เริล เอิด แปะ ซับ ตัก เม เน” เม นำ อัง
14ยาโคบ ก็ เริล เญ็บ เอิด แปะ ซับ ตัก เม ออ เม นำ ก็ แอง ซะ ป็อง เลาะๆ แจ็ดๆ ตี อิซอัก มัก ป็อง จู ลบ นัน 15เจ็นนัน เรเบคา ก็ เอิด โกบ เอซาว ตี อุ ใน เจิง นัน อน ตัก ยาโคบ จึห เป็น โกบ คอง เอซาว ตี เลาะ ทีซุด นัน 16นำ ก็ เอิด ซวัห ควัน แปะ ซิห ตัก ที ตัก งคอ ยาโคบ เคิง ตี ไอ มี นโซก นัน ระ อิซอัก ไอ มี เม็จจึด เค็ย เป็น ยาโคบ 17เจ็นนัน นำ ก็ เอิด ซะ ป็อง เคิบ คนมปัง อน ตัก ยาโคบ ซับ ตัก เอา ป็อง
18ทาเน ยาโคบ ก็ เริล โตะ และ เอา นำ ก็ งกรอ เอา เอา นำ ก็ ซวัล คือเน “ซีวะ ควัน มัห เป็น ซีเอ นะ ควัน” เอา นำ อัง 19ยาโคบ ก็ ลด ไล เอา คือเน “เอิญ เป็น เอซาว ควัน เกา มัห ดาย เอา เอิญ ก็ แอง มอก มัห ไล นะ เอิญ โละ ปัด แอง ซะ ป็อง เลาะๆ อน มัห แลว เอา ร็อห เนอ ป็อง ปัด ตัก เอิญ แอง ซับ เน แลว มัห ป็อง แลว มัห ก็ อวยพอน เอิญ ดาย เอา” ยาโคบ อัง
20อิซอัก ก็ ซ็วน นำ คือเน “มัห โละ จังนัก ควัน เวิด ไบ มัห กุญ” นำ อัง ยาโคบ ก็ ซวัล เอา ออ คือเน “เยโฮวา งกีจ็อง คอง มัห นัน จวย ระ เอิญ เวิด กุญ ดาย เอา” ยาโคบ อัง 21อิซอัก ก็ ไล นำ ติ โตะ ตัก ออ “มัห โตะ ติๆ แต็ห เน ดาย ควัน เอิญ ลอง คอบ อ็อญ นัง มัห อ็อญ เจือ มัห กิว เป็น เอซาว นังเลาะ อัน” นำ อัง
22ยาโคบ ก็ ติ โตะ และ เอา เอา นำ ก็ คอบ อ็อญ นัง นำ เอา นำ ก็ เค็ย “บัห นเซิง มัห เพาะ ยาโคบ ดาย แต ที มัห เพาะ เอซาว” นำ อัง 23อิซอัก ก็ เยา เอซาว นังเลาะ ที วะ ก็ ดก นโซก เพาะ เอซาว อิซอัก ก็ บัก และ อวยพอน นำ 24แต อิซอัก ก็ ลบ วัล ซ็วน นำ คือเน “แมน มัห นังเลาะ นะ อัน เอซาว” อิซอัก อัง ยาโคบ ก็ ซวัล เอา “เออะ เอิญ เอซาว นังเลาะ นะ เอา” นำ อัง
25อิซอัก ก็ ไล ยาโคบ ฮุนเน “นเดย ปัด นะ ซับ แต็ห อน เอา ป็อง กา อิม เอา งวะ เอา ก็ อวยพอน มัห” นำ อัง ยาโคบ ก็ เอิด ปัด อน ตัก เอา ป็อง นำ ก็ อน ปุจ องุน ตัก เอา ออก 26แลว อิม นำ แลว นำ ก็ ไล ควัน ออ ฮุนเน “มัห ติ โตะ แต็ห กา ควัน มัห โตะ จูบ คาง เอา เน ดาย” นำ อัง
27ยาโคบ ก็ ติ โตะ จูบ คาง เอา เอา นำ ก็ มุก อ็อญ งกอด ควัน นำ เม็จ ซาบ งกอด โกบ เอซาว ตัก ยาโคบ จึห นัน นำ ก็ ลด อวยพอน ยาโคบ ฮุนเน “งกอด ควัน เอิญ เน ซียุม มอก แซ มอก ซวน ตี เยโฮวา อวยพอน นัน” อิซอัก อัง
28อิซอัก ก็ ลด อวยพอน อน ตัก ยาโคบ เคิบ ควัน งา นำ มด จู ล็อง จู นัง ฮุนเน “ครอ ระ เยโฮวา งกีจ็อง จวย มัห ดาย ครอ ระ มี เมียะ มี อาก มอก จับ มอก แมน เป็น แซ เป็น ซวน เป็น ปุจ องุน ก็ ระ เลาะ มด เนอ 29ครอ ระ มัห เป็น เจา เป็น นาย มี อำนาด ดก กวา จู กรอก จู จาด ระ มัห เป็น นาย ควน นาย นไจ ออ ครอ ระ เอาซาง รักซา รักซม มัห กัน ซีเอ จม งวย มัห ก็ ครอ ระ เอาซาง จม งวย อัห ฮัก ระ อัห ตุก ญาก ลำบาก ฮัก กัน เอา นเดย แอง เลาะ ซิห มัห ก็ ครอ ระ เอาซาง แอง เลาะ ซิห อัห วัล ซาทุ เตาะ” อิซอัก อัง
เอซาว ไอ มี กุญ เลาะ
30แลว อิซอัก อวยพอน ยาโคบ แลว ยาโคบ ก็ เริล ออ นำ เริล ซม มี ญาม ก็ โตะ เอซาว เจ็น โละ นโจ 31นำ ก็ แอง ซะ ป็อง เลาะๆ แจ็ดๆ ซับ อน ตัก เอา นำ ก็ พร็อห เอา ฮุนเน “เอา ร็อห เนอ ร็อห ป็อง ปัด ตัก เอิญ โละ อน มัห เน ดาย อิม มัห แลว มัห ก็ อวยพอน อน เอิญ ดาย เอา” เอซาว อัง
32เอา นำ ก็ ซ็วน นำ เค็ย “ซัง ซีเอ นะ เออะ” เอา นำ อัง เอซาว ก็ ซวัล เค็ย “เอิญ เอซาว ควัน เกา มัห นัน ดาย เอา” เอซาว อัง 33อิซอัก เม็จ แญง เอซาว อัง ฮุนนะ นำ ก็ ญ็อก นโจ็ห มด ตึง นัง “ก็ ซัง ซีเอ แอง ซะ ป็อง อน เอิญ เคิน วะ เอิญ ป็อง อิม แลว วาล ไอ ตัน โตะ มัห เน เอิญ ก็ ลด อวยพอน อน นำ แลว พอน นัน ก็ ลด เป็น คอง นำ แลว เอิญ ลบ วัล เอิด คืน ก็ เก็ย จบ กุญ เตาะ” นำ อัง 34เอซาว เม็จ แญง เอา ออ ไล ฮุนนะ แลว นำ ก็ ลุหใจ ซีเละ นำ ก็ นซาก ครอ เคิบ เอา ซุด แร็ง “ครอ เตาะ เอา ครอ เคิบ มัห อวยพอน อน เอิญ แด กา เอา” นำ อัง
35อิซอัก ก็ ไล ควัน ฮุนเน “ฮีเอิห ควัน ควน มัห จุ เอิด แลว” นำ อัง 36เอซาว ก็ โป ยาโคบ ฮุนเน “ยาโคบ คีจุ คีวอก มอก ซือ นำ ฮัก เปียะ ลบ ตึง เน ตี นำ จุ เอิญ ลบ วาล นำ จุ เอิด ซิด ควัน เกา คอง เอิญ ลบ เน นำ ก็ ลบ วัล จุ เอิด พอน คอง เอิญ วัล” เอซาว อัง เอซาว ก็ ครอ เคิบ เอา วัล “ฮีเอิห เอา ไอ มี ควะ พอน ซีวะ ซัก มี ติด อน ตัก เอิญ เออะ เอา ไอ มี ตัน ซุด มัห อวยพอน อน นำ ตัน กา เอา” นำ อัง
37อิซอัก ก็ ไล เอซาว ฮุนเน “ฮีเอิห ควัน เอิญ อวยพอน อน นำ มด แลว เอิญ ระ นำ เป็น นาย มัห เอิญ ระ ควน ระ นไจ นำ เป็น ลูกนอง คอง นำ วัล เป็น แซ เป็น ซวน ปุจ องุน ซีวะ เอิญ ก็ อวยพอน อน นำ มด แลว ไอ มี ควะ ซีวะ ซัก มี ติด เตาะ ดาย ควัน” เอา นำ อัง 38เอซาว ก็ ซ็วน เอา ติกๆ “ครอ เคิบ มัห เตาะ เอา กัน ควะ มี แญง เลาะ มี แญง เดียว ก็ ครอ เคิบ มัห อวยพอน อน เอิญ ดาย เอา” เอซาว อัง เอซาว ก็ นซาก เญ็ม อุ
อิซอัก ไล เลือง ปาม บัดนะ นโดน
39ทาเน อิซอัก ก็ ไล เอซาว ฮุนเน “บัดนะ นโดน ตึง มัห ตึง ควัน นจะ ควัน ลาน มัห ก็ อุ ตัก ตี แลง ดาย เมียะ ก็ ไอ มี ปอ มี เป็น ซา เป็น ซีวะ คอง มัห ก็ ไอ มี ปอ เลาะ ดาย 40มัห ต็อง ฮบ ต็อง ซู อัห ติกๆ ซัง มัห กุญ อุ ตัก ตี ซิก นัน แต มัห ต็อง เป็น ลูกนอง ควน ออ แต มี มี งิ บัดนะ มัห ก็ ซู เคิบ ควน ออ วัล มัห ก็ ลด ปน แอ็ม เจ็น อำนาด คอง นำ” #ค 27 เกาตีนา 36:8 2 ปึง กซัด 8:20 ฮีบรู 11:20 เอา นำ อัง
เอซาว อ็อด อัง ยาโคบ
41เอซาว เม็จจึด เค็ย เอา อวยพอน อน ตัก ยาโคบ มด แลว ไอ มี ควะ ซีวะ ซำรับ นัง ออ นำ ก็ แร็ง อ็อด ซีเละ นำ ก็ กึด ใน ใจ ออ ฮุนเน “งเคาะ วาล เอา ก็ มแบร็ห แลว ฮัห ไอ มี ปอ อิง เอา ก็ เปิล เล็ห งิ เปิล เอา บัดนะ เอิญ ก็ มเบิล แอ็ม ยาโคบ” เอซาว อัง
42ทาเน เรเบคา เม็จ แญง เอซาว อง มเบิล ควน ออ นำ ก็ ไล อัห โตะ และ ยาโคบ นำ ไล ยาโคบ ฮุนเน “มันเน วะ เอิญ เม็จ แญง เอซาว อง ตอบติก มัห นำ อง มเบิล แอ็ม มัห ดาย 43มัห ปัง แญง เม ดาย ควัน มัห เจย ปัด เจ็น เน เริล อุ เคิบ ลุง ลาบัน นไจ เม ตัก เมือง ฮาราน#ค 43 ฮาราน เป็น เมือง เกิด คอง เรเบคา เมือง ฮาราน นัน อุ ตัก ปะเทด ปัดดาน-อารำ เป็น เมือง เครม ตี อับราฮัม พระ ควน นไจ ลด ญาย เริล คานาอัน งคม 44มัห เริล อุ เคิบ นำ วาล จำปอ งาล อ็อด นไจ มัห เน 45กัน งาล อ็อด นไจ มัห ญาม นเดย เอิญ ก็ ไล อัห เริล และ มัห โตะ อุ เคิบ เอิญ วัล เอิญ ไอ มี ซีรอก ตุกใจ เม็จ ปา เปิล เลิม มี งิ เดียว นัน” เรเบคา อัง
46ญาม นัน เอซาว ก็ เอิด ยัห เปียะ ล็อง แลว นำ เอิด ครำ ฮิดไท เรเบคา ก็ ไอ มี ซอบ ยัห เอซาว เตาะ นำ ก็ โตะ ไล อิซอัก ฮุนเน “ปืด ไบ เอิญ อัง นัง ออ จู งิ เน เป็น ตัก มี ซีมัน ครำ ฮิดไท นัน กัน ยาโคบ เอิด ครำ ฮิดไท พาเน วัล เอิญ ก็ เปิล ซีเละ” เรเบคา อัง
Currently Selected:
เกาตีนา 27: Prai
Highlight
Share
Copy
Want to have your highlights saved across all your devices? Sign up or sign in
Global Partners
