Okong’anya 15

Ogoteera kwa Musa

1 # Okom 15:3 Erio Musa na Abaisraeli bakamoterera Omonene ogoteera oko, bagoteeba:

Nimoterere Omonene, ekiagera ere obuire ase okobua okonene;

chibarasi amo nabachiriinete obarimeirie ase enyancha ime.

2 # Zab 118:14; Isaya 12:2 Omonene nere chinguru chiane, nimoterere ere, ere nogotooreka kwane.

Ere Nyasae one, nimotogie; ere Nyasae o tata, ninterere obonene bwaye.

3Omonene nomorwani bwe chiseegi, Omonene nario erieta riaye.

4Orutire chigari chia Farao amo nomoganda oye ase enyancha ime;

abarwani baye abachore obarimeirie ase enyancha embariri#15:4 Enyancha Embariri: erieta rinde enyancha y’emekendo.

5Amache abatubire, barimeire chindiba ime buna rigena rikorutwa.

6Omonene, okoboko kwao gw’okorio nkore nokobua okonene,

Omonene, okoboko kwao gw’okorio ngosenyente ababisa.

7Ase okobua kwao okonene nigo okobaiyeria inse abagokoimokera;

endamwamu yao ekobera, nigo ekobasamba buna chimboba chinyomo.

8Ase omoika korwa ase chimioro chiao amaache akaimoka,

agatenena buna orwaki,

enyancha egakamoka goika inse kegima.

9Omobisa agateeba, “Nimbabwatie, mbaikeere,

mbiatanane ebi ndasakore, omoyo one oisaneke;

ninsomore omoyio one o birende, nimbasirie nokoboko kwane.”

10Naboigo ekero aye kwagusete buna omwaga, amaache akabamera;

bakamerwa buna embunde ekorimera ase amaache amange ime, yarika inse.

11Omonene, ning’o onga buna aye ase egati ye chinyasae?

Ning’o onga buna aye ore nobonene na obochenu?

Naye ogwenerete koirokwa na gotogigwa, aye naye oyogokora amakumia.

12Ekero kwaramborete okoboko kwao gw’okorio, ense ekabamera.

13Ase chiira chiao chi’obwanchani chiria kwabarierete okaraa abanto aba kwabooretie,

ase chinguru chiao okabaikia ase obomenyo bwao obochenu.

14Abanto b’ebisaku bakayaigwa, bagatengechigwa ase omoondoko,

omoichano na obororo bikabwata abamenyete Bofilisti.

15Abagaambi b’Edomu bakaondoka, abanto abanene ba Moabu bakabwatwa nomotengecho,

na abanto bonsi ba Kaanani bakerusia moyo.

16Omoondoko na obwoba bikababwata;

ase engencho y’okobua gw’okoboko kwao bagatenena,

bagakira‐kiri buna amagena,

goika abanto bao baetire, ee, Omonene,

goika abanto bao kwabooretie baetire.

17Nobasoyie na kobabeeka ase egetunwa kiao aye omonyene,

aase aria kweroiseretie, aye Omonene,

obomenyo obochenu kwaagachete namaboko ao.

18Omonene nagaambe kare na kare.

19Ekero chibarasi chia Farao, amo ne chigari na abariini basoete nyancha ime, Omonene akairania amaache igoro yabo, akabatuba; korende Abaisraeli bagaeta egati y’enyancha ase ense enkamoku.

Ogoteera kwa Miriamu

20Na Miriamu omobani, omoiseke omwabo Aroni, akaimokia ekebangarara#15:20 Ekebangarara: Egento kenga buna chindege kiaye, na abakungu bonsi bakamobwatia bakobugia ebibangarara biabo na goteenga. 21Miriamu akabaterera ogoteera kogoteeba,

“Moterere Omonene, ekiagera ere obuire ase okobua okonene,

chibarasi amo nabachiriinete obarimeirie ase enyancha ime.”

Chinsoko chire namaache amaroro

22Erio Musa agatang’ana Abaisraeli kogenda orogendo korwa ase Enyancha Embariri gochia erooro ya Suri. Bagataara ase engaki y’amatuko atato ase erooro, na tibanyora maache. 23Erio bagaika aase are korokwa Mara,#15:23 Mara: engencho yaye: obororo tibanyara konywa amaache arengeo, ekiagera arenge amaroro mono. Nakio kiagerete aase aria akarokwa Mara. 24Agwo abanto bakemurunganeria Musa, bakamobooria, “Ninki tokonywa?” 25Musa akarera ase Omonene, n’Omonene akamworokia ekeng’ese kio omote. Omote oyio Musa akayoruta amaache ime, na amaache aria akaba amaansu.

Agw’Omonene akabeekera abanto amaachiko akobaraa, na agwo akaba okobateema. 26Akabora, “Oise koigwera aya inche Omonene oo ngokwana, na koyakora ayare boronge ase amaiso aane, na gotegerera amaachiko aane, na kobwata emeroberio yane yonsi, rirorio inche tingokobekera amarwaire ande onsi buna aria nabeekerete Abamisiri; naki ninche Omonene oo, oyogokogwenia.”

27Erio abanto bagaika Elimu; agwo chinsoko nchiarengeo ikomi na ibere, na emekendo emerongo etan’abere (70). Bagatoora agwo ang’e namaache.

Currently Selected:

Okong’anya 15: EKGE

Highlight

Copy