1 AKORINTHO 13
13
1ATĨRĨRĨ, o na ingĩtuĩka atĩ nĩ’thiomaga thiomi cia andũ o na cia araika, na ngorũo itarĩ na wendani-rĩ, no njikare ta ndĩ o kĩndũ kĩa rũthuku kĩrĩa kĩnegenaga kĩaringwo, kana ta thani iria ihũrithanagio ikagamba karagaca! 2#Mat 17.20; 21.21; Mar 11.23.O na ingĩkorũo nĩ’menyaga kũratha mohoro, na ngamenya maũndũ mothe ma hitho o na maũndũ mothe marĩa mangĩmenyeka, na ngorũo ndĩ na wĩtĩkio o ũrĩa mũthungĩru kinya ngahota gũthamia irĩma, no rĩrĩ, nduĩke ndirĩ na wendani-rĩ, ndirĩ bata o na hanini. 3O na ingĩtũũra ndutaga indo ciakwa ciothe cia gũtuga athĩni, o na ingĩheana mwĩrĩ wakwa ũcinwo, na ngorũo ndirĩ na wendani-rĩ, ndirĩ harĩa ingĩgunwo. 4Wendani-rĩ, nĩ gũkiranĩrĩria ũkiranagĩrĩria na nĩũtuganaga; ningĩ wendani ndũrĩ ũiru; wendani ndwĩgathaga, na ndũrĩ mwĩtĩo, 5na ningĩ ndũrĩ rũtũrĩko, na ndũcaragia ũrĩa ũngĩĩguna guo mwene, o na ndũrĩ marakara, na ndwĩcokagia; 6ningĩ ndũkenagĩra maũndũ marĩa matarĩ ma ũthingu, no ũhoro ũrĩa ũkenanagĩra naguo no ũrĩa wa ma. 7Wendani-rĩ, nĩwĩtiiragĩrĩria maũndũ mothe, na ũgetĩkia maũndũ mothe, na ũkerĩgĩrĩra maũndũ mothe, o na ũgakirĩrĩria maũndũ mothe.
8Wendani ndũrĩ hĩndĩ ũngĩng’atĩka; no korũo nĩ ũrathi-rĩ, ũcio nĩũkeherio ũthire; na korũo nĩ gũthioma thiomi, icio nĩigatiga gũthiomwo; na korũo nĩ ũmenyi wa maũndũ, ũcio o naguo no kweherio ũkeherio ũthire. 9Nĩ ũndũ rĩu tũmenyaga maũndũ icunjĩ icunjĩ, o na kũratha tũkaratha ũhoro o gĩcunjĩ: 10no hĩndĩ ĩrĩa ũhoro ũgakorũo ũũkĩte ũrĩa mũkinyanĩru, ũhoro ũcio mũtingiaru nĩ kweherio ũkeherio ũthire. 11Rĩrĩa ndarĩ kaana-rĩ, ndaaragia ta kaana, mũiguĩre wakwa wa ũhoro naguo warĩ o wa kaana, o na gũtarania ndaũtaranagia ta kaana: no rĩu ndanatuĩka mũndũ mũgima-rĩ, nĩndĩkĩtie gũte maũndũ ma wana. 12Amu rĩu tuonaga maũndũ na mairia, ta kuona na gĩcicio; no hĩndĩ ĩo-rĩ, tũkonaga ta andũ makĩonana ũthiũ na ũthiũ; rĩu njũĩ ũhoro o gĩcunjĩ, no hĩndĩ ĩo ngakorũo ngĩũmenya o kũũmenya, o ta ũrĩa niĩ na niĩ ndũire ’menyetwo o kũmenyũo. 13Na rĩu maũndũ maya, gwĩtĩkia, na kwĩrĩgĩrĩra, na kwendana, mo matatũ-rĩ, nĩmo megũtũũra o ho; na ũrĩa mũnene wamo-rĩ, nĩguo kwendana.
Currently Selected:
1 AKORINTHO 13: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019