GŨCOKERITHIA MAATHANI 2
2
1 #
Ndar 21.4. Thutha ũcio tũgĩkĩhũndũka, tũkĩgwata rũgendo ruitũ, tũkĩgera werũ-inĩ tũrorete Iria Itune o ta ũrĩa Jehova aanjĩrĩte; tũgĩgĩtũũra tũcangaga kũu gũkuhĩ na kĩrĩma gĩa Seiru matukũ maingĩ. 2Jehova agĩgĩcoka akĩnjarĩria, akiuga atĩrĩ, 3Ihinda rĩrĩa mũthiũrũrũkangĩte gũkũ kĩrĩma-inĩ gĩkĩ nĩrĩiganĩte; rĩu garũrũkai, mũrore mwena wa gathigathini. 4#Kĩam 36.8.Gĩathe andũ, ũmere atĩrĩ, Rĩu nĩguo mũgũtuĩkanĩria bũrũri wa ariũ a ithe wanyu, ciana cia Esau, iria itũũraga kũu Seiru, nacio nĩikũmwĩtigĩra; tondũ ũcio wĩmenyererei mũno ũrĩa mũgwĩka; 5mũtigaciũgite, nĩ ũndũ ndikũmũhe bũrũri wacio o na hanini; aca, ndikũmũhe o na handũ ha gũkinyithia ikinya rĩmwe rĩa kũgũrũ kwa mũndũ; nĩ gũkorũo nĩ’heete Esau kĩrĩma kĩu gĩa Seiru gĩtuĩke gĩake. 6Nĩ kũgũra mũrĩgũraga irio kũrĩ o na mbia, nĩguo mũcirĩe; o namo maĩ mwĩgũrĩre kũrĩ o na mbia, nĩguo mũmanyue. 7Nĩ gũkorũo Jehova Ngai waku nĩakũrathimĩte mawĩra-inĩ maku mothe marĩa ũrutĩte na moko maku; na nĩamenyete ũhoro wa ng’endo ciaku ũgĩtuĩkania werũ ũyũ mũnene; mĩaka ĩo mĩrongo ĩna mĩthiru-rĩ, Jehova Ngai waku akoragwo arĩ o hamwe nawe, na gũtirĩ kĩndũ o na kĩ ũrĩ waaga. 8Tondũ ũcio, tũgĩkĩhĩtũkĩra kũu kwa ariũ a ithe witũ, ciana icio cia Esau, o icio ciatũire kũu Seiru, tũgerete njĩra ya Araba, na Elathu, o na Ezioni-geberi.
Thutha wa ũguo tũkĩgarũrũka, tũkĩgera njĩra ya werũ wa Moabi. 9#Kĩam 19.37.Nake Jehova agĩkĩnjĩra atĩrĩ, Menya ũnyarire Moabi, kana ũmũũgite nĩguo mũrũe nake; nĩ ũndũ hatirĩ handũ ha bũrũri wake ingĩkũhe hatuĩke haku; nĩ gũkorũo nĩndaheire ciana cia Loti gũkũ Ari, gũtuĩke gwacio. 10(Nao Aemi nĩo maatũũrĩte kuo tene, na maarĩ andũ me hinya mũno, na makaingĩha, o na makaraiha o ta Aanaki; 11nao acio maatuĩtwo Arefai, o ta Aanaki; no rĩrĩ, Amoabi mametaga Aemi. 12O nao Ahori maatũũraga Seiru tene; no rĩrĩ, ciana cia Esau nĩcio ciacokire gũtũũra kuo thutha wao; nacio igĩkĩmanina, nĩguo mehere mbere yacio, igĩgĩtũũra kuo ithenya rĩao; o ta ũrĩa Isiraeli ekire bũrũri ũrĩa aaheetwo nĩ Jehova ũtuĩke wake.) 13Rĩu gĩũkĩrei mũringe karũũĩ ga Zeredi. Tũgĩkĩringa karũũĩ kau ga Zeredi. 14#Ndar 14.28-35.Na rĩrĩ, gwata rĩrĩa twoimire Kadeshi-barinea, tũgĩkaringa karũũĩ kau ga Zeredi-rĩ, twaninire mĩaka mĩrongo ĩtatũ na ĩnana, naruo rũciaro rũu ruothe rũa andũ acio maathiaga ita rũkĩninwo rũgĩthira kĩraaro-inĩ, o ta ũrĩa Jehova ehĩtire akĩmera atĩ noguo gũgatuĩka. 15Guoko kwa Jehova gũgĩkĩmokĩrĩra kũmanine mathire kĩraaro-inĩ, o nginya magĩkĩninũka biũ.
16Gũgĩgĩkinya atĩrĩ, atĩ andũ acio othe a ita maarĩkia kũninwo, magĩkua, makĩeherera andũ arĩa angĩ-rĩ, 17Jehova agĩkĩnjarĩria, akiuga atĩrĩ, 18Ũmũthĩ nĩguo ũkũhĩtũka Ari, kũu bũrũri wa Moabi; 19#Kĩam 19.38.na rĩrĩa ũgakuhĩhĩria ciana cia Amoni ũng’ethanĩre nacio, ndũkanacinyarire, kana ũciũgite nĩ gũkorũo ndirĩ kũndũ o na kũmwe ngũkũhe bũrũri wa ciana cia Amoni atĩ gũtuĩke gwaku; nĩ gũkorũo nĩndakũheire ciana cia Loti gũtuĩke gwacio. 20(Bũrũri ũcio o naguo wonagwo o ta ũrĩ wa Arefai, na nĩkuo Arefai maatũũrĩte tene; no rĩrĩ, Aamoni mametaga Azamuzumi; 21na nĩ andũ anene, na makaingĩha, na makaraiha o ta Aanaki; no rĩrĩ, Jehova nĩaamaninithirie harĩ andũ acio, makĩninwo biũ, nao magĩgĩcoka gũtũũra kuo ithenya rĩao, 22o ta ũrĩa Jehova ekire nĩ ũndũ wa ciana cia Esau, iria ciatũũraga Seiru, hĩndĩ ĩrĩa aaninire Ahori, mehere mbere yacio; igĩgĩcoka gũtũũra kuo ithenya rĩao, na itũire kuo o na ũmũthĩ. 23Nao Aavi, arĩa maatũũraga tũmĩciĩ o tũmĩciĩ o nginya Gaza, makĩninwo nĩ Akafitori, arĩa moimĩte kũu Kafitori, nao magĩgĩtũũra kuo ithenya rĩao.) 24Rĩu gĩũkĩrei mũgwate rũgendo rũanyu, mũringe mũrĩmo ũrĩa wa kĩanda kĩa Arinoni; na atĩrĩrĩ, Sihoni, Mũamori, mũthamaki wa Heshiboni, hamwe na bũrũri wake, nĩndĩmũrekereirie ngamũneana guoko-inĩ gwaku; ambĩrĩria kwĩgwatĩra bũrũri wake ũtuĩke waku, ũkĩhũrane mbaara nake. 25Ũmũthĩ nĩguo ngwambĩrĩria gũtũma atĩ andũ arĩa matũire gũkũ thĩ mũhuro wa igũrũ rĩothe mamakio nĩwe, na magwatwo nĩ guoya nĩ ũndũ waku, o arĩa othe marĩigua ngumo ya ũhoro waku; nao nĩmarĩinaina, na magwatwo nĩ kĩeha mũno, nĩ ũndũ waku.
26Hĩndĩ ĩo ngĩkĩrekia andũ gwĩ Sihoni, mũthamaki wa Heshiboni, twĩ hau werũ wa Kedemoshu, maarie nake, mamũhe ũhoro wa atĩ maare ũhoro kũgĩe thayũ, ngiuga ũũ: 27Njĩtĩkĩria nduĩkanĩrie bũrũri waku; na rĩrĩ, ngũgera o njĩra ĩrĩa nene ya gĩtwari, na ndikerũra na mwena wa ũrĩo, kana wa ũmotho. 28Irio cia kũrĩa-rĩ, ũrĩnyendagĩria na mbia, o namo maĩ ma kũnyua ndĩmarutagĩre mbia; njĩtĩkĩria ’hĩtũke o ro ũguo na magũrũ, 29o ta ũrĩa ciana cia Esau iria itũũraga Seiru, o na Amoabi arĩa matũũraga Ari o nao, maanjĩtĩkĩririe; wĩtĩkĩre njĩke ũguo o nginya ninge Jorodani, nginye bũrũri ũrĩa Jehova Ngai witũ atũheaga. 30No rĩrĩ, Sihoni, mũthamaki wa Heshiboni, ndaigana gũtwĩtĩkĩria tũhĩtũkĩre kwao; nĩ gũkorũo Jehova Ngai witũ nĩaamũũmĩtie ngoro, agatũma ngoro yake ĩreme, nĩ getha amũrekererie amũneane guoko-inĩ gwaku, o ta ũrĩa gũtariĩ ũmũthĩ. 31Nake Jehova agĩkĩnjĩra ũũ: Atĩrĩrĩ, nĩnjitĩkĩte kũrekereria Sihoni, ngamũneana mbere yaku, o na bũrũri wake ngaũneana ũtuĩke waku; ambĩrĩria kũwĩgwatĩra arĩ wee ũtuĩke waku, nĩ getha bũrũri ũcio wake ũtuĩke igai rĩaku. 32Hĩndĩ ĩo Sihoni, me na andũ ake othe, magĩkiuma matũũra mao, magĩtũthengerera, nĩ getha maaranie ita mahũranĩre na ithuĩ o kũu Jahazi. 33Nake Jehova agĩkĩmũrekereria akĩmũneana moko-inĩ maitũ, na ithuĩ tũgĩkĩmũhũra tũkĩmũtoria, we mwene o na ariũ ake, o na andũ ake othe. 34Tũgĩkĩthũtunya matũũra make mothe hĩndĩ ĩo, tũgĩkĩananga matũũra mothe biũ, na tũkĩnina andũ othe arĩa maarĩ kuo, arũme o na andũ-a-nja, o na twana tũnini; na tũtiatigaririe mũndũ o na ũmwe; 35no ng’ombe ciiki twatahire ituĩke ciitũ ithuene, hamwe na itaha rĩa indo cia matũũra macio twatunyanire. 36Na rĩrĩ, kuuma Aroeri, itũũra rĩrĩa rĩrĩ ngiki-inĩ cia kĩanda kĩa Arinoni, o na itũũra rĩrĩa rĩrĩ kĩanda-inĩ, nginya o Gileadi-rĩ, gũtiarĩ itũũra, o na rĩrĩa rĩarĩ rũirigo rũraya mũno na igũrũ, rĩatũremire gũtunyana; Jehova Ngai witũ nĩaarekereirie indo ciothe, agĩcineana moko-inĩ maitũ; 37no rĩrĩ, bũrũri wa ciana cia Amoni wiki, noguo wee ũtaathengereire, o bũrũri ũcio wothe wĩ hũgũrũrũ-inĩ cia rũũĩ rũa Jaboku, na matũũra marĩa marĩ bũrũri ũrĩa wĩ irĩma nyingĩ, o na kũndũ kũrĩa guothe Jehova Ngai witũ aatũkaanirie tũtigagũkuhĩhĩrie.
Currently Selected:
GŨCOKERITHIA MAATHANI 2: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019