GŨCOKERITHIA MAATHANI 20
20
1Hĩndĩ ĩrĩa ũkuumagara ũthiĩ ita-inĩ ũkarũe na thũ ciaku-rĩ, ũngĩkona mbarathi, na ngari, o na andũ maingĩhĩte magagũkĩra, ndũkanametigĩre; nĩ ũndũ Jehova Ngai waku e hamwe nawe, o we ũrĩa wakwambatirie, agĩkũruta bũrũri wa Misiri. 2Na nĩgũgagĩtuĩka atĩrĩ, atĩ hĩndĩ ĩrĩa mũgathengerera ita-inĩ, mũthĩnjĩri-Ngai nĩagakuhĩhĩria andũ aarie nao, 3amere atĩrĩ, Inyuĩ Aisiraeli aya, ta thikĩrĩriai mũigue; ũmũthĩ nĩguo mwathengerera ita-inĩ mũhũrane na thũ cianyu; mũtikanareke ngoro cianyu ciũrũo nĩ hinya, na mũtigetigĩre, kana mũinaine, kana mũgwatwo nĩ kĩmako nĩ ũndũ wao; 4nĩ gũkorũo Jehova Ngai wanyu nĩwe ũthiaga hamwe na inyuĩ akamũhũranĩre harĩ thũ cianyu, nĩguo amũhonokie. 5Nao atongoria a andũ macoke maarie nao, mamorie atĩrĩ, Nĩ mũndũ ũrĩkũ wanyu wakĩte nyũmba njerũ, na ndarĩ aramĩrugũria? Mũndũ ũcio nĩainũke, nĩ getha ndagakuĩre ita-inĩ hihi, nayo nyũmba ĩo yake ĩrugũrio nĩ mũndũ ũngĩ. 6Ningĩ-rĩ, nĩ mũndũ ũrĩkũ wanyu ũhandĩte mũgũnda wa mĩthabibu, na ndarĩ aarĩa maciaro maguo? Nĩ wega mũndũ ũcio o nake ainũke gwake mũciĩ, nĩ getha ndagakuĩre ita-inĩ hihi, namo maciaro macio marĩo nĩ mũndũ ũngĩ. 7Ningĩ-rĩ, nĩ mũndũ ũrĩkũ wanyu ũgũrĩte mũirĩtu na ndarĩ aramũhikia? Mũndũ ũcio o nake nĩainũke, nĩ getha hihi ndagakuĩre ita-inĩ, nake mũirĩtu ũcio ahikio nĩ mũndũ ũngĩ 8Ningĩ anene acio macoke maarĩrie andũ rĩngĩ, mamere atĩrĩ, Nĩ mũndũ ũrĩkũ wanyu wĩ na guoya, na ũkũigua ngoro yake yũrĩtwo nĩ hinya? Mũndũ ũcio nĩarekwo athiĩ, acoke gwake mũciĩ, nĩ getha ngoro cia ariũ a ithe wao itikaringĩke, ciũrũo nĩ hinya o ta yake. 9Na nĩgũgakinya atĩrĩ, atĩ hĩndĩ ĩrĩa atongoria acio magakorũo marĩkĩtie kwaria na andũ, hĩndĩ ĩo nĩmagathura anene a mbũtũ cia ita a gũtongoria andũ magĩthiĩ ita.
10Hĩndĩ ĩrĩa ũgakuhĩhĩria itũũra nĩguo ũhũrane narĩo, nĩũkaamba kwaria na andũ arĩo nĩ getha mware ũhoro nao kũgĩe thayũ. 11Na nĩgũgatuĩka atĩrĩ, atĩ andũ arĩo mangĩgagũcokeria ũhoro wa atĩ kũgĩe thayũ, na makũhingũrĩre ihingo ciao, nĩgũgatuĩka atĩ andũ othe arĩa me kuo thĩinĩ ũmatue a gũkũrutagĩra wĩra o ta ũrĩa ũkameraga, magĩgũtungatĩre. 12No rĩrĩ, mangĩkaaga kwara ũhoro wa thayũ nawe, no mende o mbaara, nĩũgakĩrĩrigicĩria ũrĩtunyane; 13na rĩrĩ, hĩndĩ ĩrĩa Jehova Ngai waku akarĩrekereria arĩneane moko-inĩ maku, nĩũkahũra mũndũ mũrũme o wothe ũrĩa ũgakorũo kuo na rũhiũ rũa njora, ũmũnine; 14no rĩrĩ, andũ-a-nja, na twana, na ũhiũ, o na indo ciothe iria irĩ kũu itũũra-inĩ rĩu thĩinĩ, naguo ũguo nĩ ta kuuga indo ciothe iria itahĩtwo kuo, wahota gũthiĩ nacio ituĩke itaha rĩrĩa wĩtahĩire; nawe ũkĩrĩage indo icio ũtahĩte cia thũ ciaku, o icio Jehova Ngai waku akũheete. 15Ũguo nĩguo ũgekaga matũũra mothe marĩa maraihanĩrĩirie nawe mũno, o matũũra marĩa matarĩ ma ndũrĩrĩ ici. 16No rĩrĩ, thĩinĩ wa matũũra ma ndũrĩrĩ ici, o maya Jehova Ngai waku egũkũhe matuĩke igai rĩaku-rĩ, ndũkanahonokie kĩndũ o na kĩ gĩtigwo muoyo thĩinĩ wa indo ciothe iria irĩ muoyo; 17no rĩrĩ, andũ a kuo nĩũkamanina biũ, nao nĩ Ahiti, na Aamori, na Akanaani, na Aperizi, na Ahivi, na Ajebusi, o ta ũrĩa Jehova Ngai waku aagwathire; 18nĩ getha matikanamũrute gwĩka maũndũ mao mothe marĩa me thahu mũno, o macio maatũire mekaga ngai ciao; nĩ gũkorũo mũngĩgeka maũndũ macio, mwehia Jehova Ngai wanyu.
19Hĩndĩ ĩrĩa ũkarigicĩria itũũra hĩndĩ ndaya ũkĩhũrana mbaara narĩo, nĩguo ũrĩtunyane, ndũkanatemenge mĩtĩ ĩrĩa ĩrĩ kuo ũkĩmĩoera ithanwa; tondũ hihi waya kũrĩa maciaro mayo, na tondũ ũcio ndũkanamĩtemenge; nĩ ũndũ-rĩ, kaĩ mũtĩ wa gĩthaka arĩ mũndũ, atĩ nĩkĩo ũkũrigicĩrio nĩwe, ũwanange? 20No mĩtĩ ĩrĩa ũkũmenya atĩ ndĩngĩrĩo-rĩ, wahota kũmĩtemenga ũmĩgũithie, na ũcoke wĩthondekere mwĩgito wa rũirigo wa gũtũma itũũra rĩu rĩendaga kũhũrana nawe rĩtunyanwo, o nginya thingo ciarĩo igũe.
Currently Selected:
GŨCOKERITHIA MAATHANI 20: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019