GŨCOKERITHIA MAATHANI 9
9
1Atĩrĩrĩ, wee Isiraeli, ta thikĩrĩria ũigue ũhoro ũyũ; rĩu nĩguo ũkũgwata kũringa Jorodani nĩ getha ũthiĩ ũkegwatĩre kũndũ kwa ndũrĩrĩ nene, na irĩ hinya gũgũkĩra, o kũndũ kũrĩa kwĩ matũũra manene mairige na thingo ikinyĩte o igũrũ matu-inĩ, 2kũndũ kũrĩ andũ anene na araya, nao nĩo ariũ a Anaki, arĩa wee ũũĩ ũhoro wao, na arĩa wanaigua ũĩioro wao ũkĩĩrũo atĩrĩ, Nũ ũngĩhota gwĩtiiria ariũ a Anaki? 3Tondũ ũcio, menya o mũthenya ũyũ wa ũmũthĩ atĩ Jehova Ngai waku, nĩwe ũkwamba kũringa mũrĩmo agũtongorie ahaana ta mwaki wa kũninana, na nĩwe ũkũmanina biũ, na amatorie makĩonwo nĩwe; na tondũ ũcio nĩũkamaingata, na ũtũme mathire o gũthira narua, o ta ũrĩa Jehova akwĩrĩte. 4Na rĩrĩ, wĩmenyerere atĩ hĩndĩ ĩrĩa Jehova agakorũo amathinĩkanĩtie, mehere mbere yaku, ndũkanearĩrie wĩĩre na ngoro yaku atĩrĩ, Ũthingu wakwa nĩguo watũmire Jehova andehe bũrũri ũyũ ndĩwĩgwatĩre ũtuĩke wakwa; nĩ gũkorũo nĩ waganu wa ndũrĩrĩ icio ũtũmĩte Jehova aciingate, ciehere mbere yaku. 5Ti-itherũ ri ũthingu waku, kana ũndũ wa werekereru wa ngoro yaku, ũgũtũma ũthiĩ kuo ũkegwatĩre bũrũri wacio; no rĩrĩ, tondũ wa waganu wa ndũrĩrĩ icio nĩkĩo Jehova egũciingata ciehere mbere yaku; o na ningĩ nĩ getha Jehova atũme kiugo gĩake gĩikare kĩrũmĩte, o kĩu erire mathoguo Iburahimu, na Isaaka, na Jakubu, na mwĩhĩtwa. 6Tondũ ũcio menya wega atĩ Jehova Ngai waku ndakũheete bũrũri ũcio mwega ũwĩgwatĩre ũtuĩke waku nĩ ũndũ wa ũthingu waku; nĩ ũndũ inyuĩ mũrĩ andũ aremu mũno. 7Ririkanaga, ũtige kũriganĩrũo nĩ ũrĩa warakaririe Jehova Ngai waku o kũu werũ-inĩ; kuuma mũthenya ũrĩa woimire bũrũri wa Misiri, o nginya hĩndĩ ĩrĩa mwakinyire kũndũ gũkũ-rĩ, mũtũire mũremete Jehova. 8O na ningĩ kũu Horebu nĩmwarakaririe Jehova, nake Jehova akĩrakario nĩ inyuĩ o nginya akĩenda kũmũnina. 9#Thama 24.18.Gũgĩgĩtuĩka atĩrĩ, atĩ hĩndĩ ĩrĩa ndaambatire kĩrĩma-inĩ nganengerũo ihengere iria cia mahiga, o ihengere iria cia kĩrĩkanĩro kĩrĩa Jehova aarĩkanĩire na inyuĩ-rĩ, ndaikarire kũu kĩrĩma-inĩ matukũ mĩrongo ĩna, mũthenya o na ũtukũ; na ndiigana kũrĩa irio, kana ngĩnyua maĩ. 10Nake Jehova akĩ’nengera ihengere icio cierĩ cia mahiga ciandĩkĩtwo na kĩara kĩa Ngai; narĩo igũrũ rĩacio ciaandĩkĩtwo ũhoro wothe o ta ũrĩa Jehova aarĩirie na inyuĩ kĩrĩma-inĩ, arĩ mwaki-inĩ thĩinĩ, mũthenya ũrĩa mwagomanĩte. 11Na gũgĩkinya atĩrĩ, atĩ hĩndĩ ĩrĩa matukũ mĩrongo ĩna, mũthenya o na ũtukũ, maathirire, Jehova akĩ’nengera ihengere icio cierĩ cia mahiga, o ihengere icio cia kĩrĩkanĩro. 12Nake Jehova agĩkĩnjĩra atĩrĩ, Ũkĩra ũikũrũke narua uume gũkũ; nĩ ũndũ andũ aku arĩa warutire Misiri nĩmethũkĩtie; nĩmagarũrũkĩte narua, magatiga gũthiĩ na njĩra ĩrĩa ndamaathire mathiage nayo; magethondekera mũhianano wa gũtwekio. 13Ningĩ Jehova akĩnjarĩria akiuga ũũ: Atĩrĩrĩ, andũ aya nĩndĩmonete, ngona atĩ nĩ andũ aremu mũno. 14Tigana na niĩ, ũreke ndĩmanine o kũmanina, ’huure rĩĩtwa rĩao rĩũre o kũũra rĩehere gũkũ thĩ mũhuro wa igũrũ; njoke ngũtue wee rũrĩrĩ rũnene, o na rũĩ hinya mũno kũmakĩra. 15Ngĩkĩhũndũka ngĩikũrũka ngiuma kĩrĩma-inĩ, nakĩo kĩrĩma kĩu gĩgĩakana mwaki; nacio ihengere icio cierĩ cia kĩrĩkanĩro ndacinyitĩte na moko makwa merĩ. 16Na niĩ ngĩgĩcũthĩrĩria ngĩona atĩ nĩmwĩhĩtie mbere ya Jehova Ngai wanyu, mũgethondekera njaũ ya gũtwekio, na mũkagarũrũka o narua mũgatiga kũrũmĩrĩra njĩra ĩrĩa Jehova aamwathĩte mũthiage nayo. 17Hĩndĩ ĩo ngĩkĩnyita ihengere icio cierĩ cia mahiga, ngĩcinyuguta inyume moko makwa merĩ, ngĩciũraganga mũkĩĩyonagĩra na maitho manyu. 18Ngĩcoka ngĩĩgũithia thĩ mbere ya Jehova, matukũ mĩrongo ĩna, mũthenya o na ũtukũ, o ta ũrĩa ndekĩte rĩa mbere; na ndiigana kũrĩa irio, kana ngĩnyua maĩ, nĩ ũndũ wa mehia manyu mothe marĩa mwehĩtie mũgĩĩka maũndũ marĩa monagwo marĩ moru nĩ Jehova, mũkĩmũthirĩkia nĩguo arakare. 19#Ahib 12.21.Nĩ gũkorũo nĩndetigagĩra marakara, o marakara marĩa Jehova aacinĩtwo nĩmo, akamũrakarĩra akenda kũmũnina. No rĩrĩ, o na ihinda rĩu narĩo Jehova no aanjiguire. 20Ningĩ Jehova akĩrakarĩra Haruni mũno, akĩenda kũmũnina; o nake Haruni ngĩkĩmũhoera hĩndĩ o ro ĩo. 21Ngĩkĩoya rĩĩhia rĩu rĩanyu, narĩo nĩrĩo njaũ ĩo mwathondekete, ngĩmĩcina na mwaki, ngĩmĩhũranga, ngĩmĩmenderanga mũno, o nginya ĩgĩtuĩka ta rũkũngũ rũhinyu naruo rũkũngũ rũu ngĩrũikia karũũĩ-inĩ karĩa gaathereraga koimĩte kĩrĩma-inĩ. 22#Ndar 11.3; Thama 17.7; Ndar 11.34.O na ningĩ mũgĩthirĩkĩria Jehova kũu Tabera, o na Masa, o na Kibirothuhataava, mũgĩtũma arakare. 23#Ndar 13.17; Gũcok 1.21; Ndar 13.31; Gũcok 1.26; Ahib 3.16.Ningĩ hĩndĩ ĩrĩa Jehova aamũrekirie muume Kadeshi-barinea amwĩrĩte ũũ: Atĩrĩrĩ, ambatai mũthiĩ mũkegwatĩre bũrũri ũrĩa ndĩmũheaga ũtuĩke wanyu; hĩndĩ ĩo mũgĩgĩũkĩrĩra Jehova Ngai wanyu mũkĩrega kũrũmĩrĩra watho wake, na mũtiigana kũmwĩtĩkia, kana mũigue uuge wake. 24Kuuma o mũthenya ũrĩa ndaambĩrĩirie kũmũmenya-rĩ, mũtũire o mũũkagĩrĩra Jehova mũkaamũrema. 25Na tondũ ũcio ngĩĩgũithia thĩ mbere ya Jehova matukũ mĩrongo ĩna macio ndegũithirie thĩ, mũthenya o na ũtakũ, nĩ gũkorũo Jehova nĩoigĩte atĩ nĩekũmũnina. 26Na niĩ ngĩkĩhoya Jehova, ngĩmwĩra atĩrĩ, Wee Mwathani Jehova, tiga kũnina andũ aya aku, o andũ aya aku kĩũmbe, arĩa ũkũũrĩte na hinya waku mũnene mũno, na ũkamaruta Misiri na ũndũ wa gwĩka maũndũ na guoko kwĩ hinya mũno. 27Ririkana ndungata ciaku Iburahimu, na Isaaka, na Jakubu; tiga kũrora ũrĩa ngoro cia andũ aya ciũmĩte, kana ũrore waganu wao, o na kana mehia mao; 28nĩ getha bũrũri ũrĩa watũrutire ndũkoige atĩrĩ, Tondũ Jehova nĩaaremirũo nĩ kũmakinyia bũrũri ũrĩa aamerũre, na ningĩ tondũ nĩamathũũrĩte-rĩ, nĩkĩo aamarutire gũkũ, akamoragĩre werũ-inĩ. 29No rĩrĩ, andũ aya nĩo andũ aku, o andũ aku kĩũmbe, na nĩo warutire Misiri na hinya waku mũnene mũno, o na ũndũ wa gwĩka maũndũ na guoko gũtambũrũkĩtio.
Currently Selected:
GŨCOKERITHIA MAATHANI 9: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019