THAMA 4

1Nake Musa agĩcokia, akiuga atĩrĩ, No rĩrĩ, andũ acio matikanjĩtĩkia, o na kana maigue ũrĩa ngũmera, nĩ ũndũ makoiga atĩrĩ, Jehova ndakuumĩrĩire. 2Nake Jehova akĩmũũria atĩrĩ, Nĩ kĩ kĩu ũgwete na guoko? Nake akiuga atĩrĩ, Nĩ rũthanju. 3Agĩcoka akiuga atĩrĩ, Ta rũikie rũgũe thĩ. Nake akĩrũikia thĩ, naruo rũgĩtuĩka nyamũ-ya-thĩ; nake Musa akĩmĩũrĩra. 4Nake Jehova akĩĩra Musa atĩrĩ, Tambũrũkia guoko ũmĩnyite gĩtong’oe. (Nake agĩtambũrũkia guoko, akĩmĩnyita, ĩgĩcoka gũtuĩka rũthanju ĩĩ guokoinĩ gwake.) 5Nake Jehova agĩcoka akĩmwĩra atĩrĩ, Nĩũgeka ũguo nĩguo metĩkie atĩ Jehova, o we Ngai wa maithe mao, o we Ngai wa Iburahimu, Ngai wa Isaaka, Ngai wa Jakubu, nĩakuumĩrĩire. 6O na ningĩ Jehova agĩcoka akĩmwĩra atĩrĩ, Ta tonyia guoko gĩthũri-inĩ. Nake agĩgũtonyia gĩthũri-inĩ, na rĩrĩa aacokire gũkũruta-rĩ, nĩ atĩrĩ, gũgĩkorũo kũrũarĩte mangũ gũkerũha o ta ira. 7Nake agĩcoka akiuga atĩrĩ, Ta cokia guoko gĩthũri-inĩ. (Agĩgĩcokia guoko gĩthũri-inĩ, na atĩrĩ, hĩndĩ ĩrĩa aakũrutire gĩthũri-inĩ, gũgĩkorũo kũgarũrũkĩte gũgatuĩka o ta ũrĩa mwĩrĩ ũrĩa ũngĩ wake ũtariĩ.) 8Na nĩgũgatuĩka atĩrĩ, atĩ mangĩkorũo matigagwĩtĩkia, o na kana mathikĩrĩrie ũira wa kĩama kĩa mbere, nĩmagetĩkia ũira wa kĩama kĩu gĩa thutha. 9Na nĩgũgakinya atĩrĩ, atĩ o na mangĩkaaga gwĩtĩkia ciama icio igĩrĩ, o na kana mathikĩrĩrie mũgambo waku-rĩ, no nginya ũgathiĩ ũtahe maĩ rũũĩ, ũmaite thĩ kũrĩa kũniaru, namo maĩ macio ũtahĩte rũũĩ nĩmagatuĩkĩra thakame o hau thĩ haniaru. 10Nake Musa akĩĩra Jehova ũũ: Atĩrĩrĩ, Mwathani, niĩ ndirĩ mũndũ mwaria mũno, o na kuuma o tene, o na kana kuuma o hĩndĩ ĩrĩa waaririe na niĩ ndungata yaku, nĩ ũndũ mwarĩrie wakwa nĩ wa hora mũno, o na ningĩ rũrĩmĩ rũakwa nĩ rũritũ. 11Nake Jehova akĩmũũria atĩrĩ, Nũ wathondekire tũnua twa andũ? Kana nũ ũtũmaga mũndũ aremwo nĩ kwaria, o na kana kwaga kũigua, kana kuona, o na kana gũtuĩka mũtumumu? Githĩ ti niĩ Jehova? 12Tondũ wa ũguo ũkĩra ũthiĩ o rĩu, na nĩngũikara hamwe na kanua gaku, ngũmenyithagie ũhoro ũrĩa ũrĩaragia. 13Nake akiuga atĩrĩ, Mwathani, ta tũma mũndũ o wothe o ũrĩa ũrĩtũma. 14Nake Jehova agĩcinwo nĩ marakara mũno nĩ ũndũ wa Musa, akĩmũũria atĩrĩ, Kaĩ mũrũ wa nyũkwa ũcio wĩtagwo Haruni, Mũlawii, atakĩrĩ ho? Nĩnjũĩ mũno atĩ aahota kwaria wega. O na ningĩ atĩrĩ, nĩegũũka agũthaganie, na aakuona, nĩarĩigua akenete mũno na ngoro yake. 15Nawe nĩwe ũrĩmwaragĩria, ũkamũtaara ũmwĩre ũrĩa ekuuga, na niĩ nĩndĩrĩikaraga hamwe na kanua gaku, o na kanua gake, ngamũmenyithia maũndũ marĩa mũrĩĩkaga. 16Nake nĩwe ũgatuĩka mũndũ waku wa kwaragĩria andũ; na nĩgũgakinya atĩrĩ, atĩ we nĩegũtuĩka ta arĩ we kanua gaku, nawe ũtuĩke ta ũrĩ Ngai harĩ we. 17Naruo rũthanju rũu, thiĩ naruo ũrũnyitĩte na guoko, nĩguo ũringage ciama naruo.

18Nake Musa agĩcokerera Jethero mũthoniwe, akĩmwĩra atĩrĩ, Ta reka ’thiĩ njokerere andũ aitũ arĩa marĩ Misiri, ’thiĩ ngamenye kana no matũire muoyo. Nake Jethero akĩĩra Musa atĩrĩ, Thiĩ na thayũ. 19Nake Jehova akĩarĩria Musa e kũu bũrũri wa Midiani, akĩmwĩra atĩrĩ, Thiĩ ũcoke bũrũri wa Misiri, nĩ ũndũ andũ arĩa maagũcaragia makũũrage, othe nĩmakuĩte. 20Nake Musa akĩoya mũka, o na ihĩĩ ciake, akĩmahaicia ndigiri, agĩgĩcoka bũrũri wa Misiri; ningĩ Musa agĩthiĩ na rũthanju rũu rũa Ngai, arũgwete na guoko. 21Nake Jehova akĩĩra Musa atĩrĩ, Wona wacoka Misiri-rĩ, maũndũ macio mothe ma kũgegania ngũnengerete, ndũkanaage kũmeka wĩ harĩ Firauni; no rĩrĩ, nĩngamũũmia ngoro, nake nĩakarega gwĩtĩkĩria andũ mathiĩ. 22Nawe nĩũkera Firauni atĩrĩ, Jehova ekuuga ũũ: Isiraeli nĩwe mwana wakwa wa irigithathi, 23#Thama 12.29.na nĩngwĩrĩte atĩrĩ, Reka mũrũ wakwa athiĩ, nĩguo akandungatĩre, nawe nĩũregete kũreka athiĩ; atĩrĩrĩ, nĩngũkĩũraga mũrũguo, o ũrĩa wa irigithathi. 24Na gũgĩkinya atĩrĩ, atĩ rĩrĩa maarĩ njĩra magĩthiĩ, maakinya kĩraaro-inĩ, Jehova akĩmũtũnga, akĩenda kũmũũraga. 25Nake Zipora akĩoya kahiga ka mũthemba wa rũenji-rũa-ngoma, akĩruithia mũriũ nako, nako gakonde kau agĩgaikia magũrũ-inĩ ma Musa, akiuga atĩrĩ, Nĩwagĩtuĩka mũ’hikia na njĩra ĩo ya thakame. 26Na tondũ wa ũguo, Jehova agĩgĩtigana nake. Nĩkĩo mũtumia ũcio wake oigire atĩrĩ, Nĩwagĩtuĩka mũ’hikia na njĩra ĩo ya thakame, nĩ ũndũ wa ũhoro ũcio wa kũrua.

27Nake Jehova akĩĩra Haruni atĩrĩ, Ũkĩra ũthiĩ o kũu werũ-inĩ ũthaganie Musa nakuo. Nake agĩũkĩra agĩthiĩ, akĩmũkora kĩrĩma-inĩ kĩrĩa kĩa Ngai, akĩmũmumunya. 28Nake Musa akĩhe Haruni ũhoro wothe ũrĩa watũmĩte Jehova amũrekie, o na ũhoro wothe wa ciama iria aamũtaarĩte akaringe. 29Nao Musa na Haruni magĩthiĩ makĩũngania athuri othe a ciana cia Isiraeli; 30nake Haruni akĩheana ũhoro wothe ũrĩa Jehova aaheete Musa, nake akĩringa ciama icio kĩrĩndĩ gĩkĩonaga. 31Nakĩo kĩrĩndĩ gĩgĩĩtĩkia, nakĩo rĩrĩa kĩaiguire atĩ Jehova nĩokĩte kũrora ciana cia Isiraeli, o na ningĩ atĩ nĩonete mĩnyarirĩko yakĩo, gĩgĩkĩinamĩrĩria mĩtwe gĩkĩmũgooca.

Currently Selected:

THAMA 4: OGKBIBLE

Highlight

Compare

Copy