KĨAMBĨRĨRIA 15

1Na rĩrĩ, maũndũ macio maathira, ndũmĩrĩri ya Jehova ĩgĩkinyĩrĩra Aburamu na njĩra ya kĩoneki, akĩĩrũo atĩrĩ, Aburamu, ndũkanetigĩre. Niĩ nĩ niĩ ngo yaku, naguo ũtungati ũrĩa ũkaheo nĩ mũnene mũno. 2Nake Aburamu akĩũria atĩrĩ, Mwathani Jehova, ũka’he kĩ hihi, kuona atĩ ngũtũũra itarĩ mwana, na atĩ mũndũ ũrĩa ũgatuĩka mũgai wa mũciĩ wakwa nĩ Mũdameski ũyũ wĩtagwo Eliezeri? 3Nake Aburamu agĩcoka akiuga atĩrĩ, Ndũgũkĩona? Nĩũnjagĩtie mbeũ; na rĩ’, mũndũ ũcio ũciarĩirũo gwakwa nĩwe ũgatuĩka wa kũngaya. 4Na atĩrĩ, ndũmĩrĩri ya Jehova ĩgĩkĩmũkinyĩrĩra, akĩĩrũo atĩrĩ, Mũndũ ũcio tiwe ũgatuĩka mũkũgai; no rĩrĩ, mũndũ ũrĩa ũkoima mũthimo waku wee mwene nĩwe ũgatuĩka mũkũgai. 5#Rom 4.18; Ahib 11.12.Agĩcoka akĩmuumia nja, akiuga atĩrĩ, Rĩu ta tiira maitho, ũbare igũrũ, ũtare njata, okorũo wakĩhota gũcitara; ningĩ akĩmwĩra atĩrĩ, Ũguo noguo mbeũ yaku ĩkaigana. 6#Rom 4.3; Gal 3.6; Jak 2.23.Nake akĩĩhoka Jehova; naguo ũndũ ũcio Jehova akĩmũtuĩra ta arĩ ũthingu e naguo. 7Agĩcoka akĩmwĩra atĩrĩ, Niĩ nĩ niĩ Jehova ũrĩa wakũrutire bũrũri wa Uru-gwa-Akalidei, nĩ getha ngũhe bũrũri ũyũ ũtuĩke igai rĩaku. 8Nake akĩũria atĩrĩ, Mwathani Jehova, ngũmenyithio nĩ kĩ atĩ nĩũgatuĩka igai rĩakwa?

9Nake akĩmwĩra atĩrĩ, Ta njoera mori ya mĩaka ĩtatũ, na harika ya mĩaka ĩtatũ, na ndũrũme ya mĩaka ĩtatũ, na ndirahũgĩ, na kĩana kĩa ndutura.

10Nake agĩkĩmuoera icio ciothe, agĩciatũranga na gatagatĩ njatũ igĩrĩ igĩrĩ, nacio njatũ icio agĩciara mĩhari, akĩringanagia o rũatũ na rũrĩa rũngĩ; no rĩrĩ, nyamũ icio cia njoya ndaigana gũciatũranga. 11Nacio nderi igĩitĩka gũcuhũkĩra nyamũ icio thĩnje, nake Aburamu agaciũmbũra. 12#Ayub 4.13,14.Na rĩrĩa riũa rĩatuire gũthũa, Aburamu akĩgwatwo nĩ toro mũnene; na atĩrĩ, agĩtebeba nĩ ũndũ wa gũtumanĩrũo nĩ nduma nene. 13#Thama 1.1-14; Atũm 7.6.Nake Jehova akĩĩra Aburamu atĩrĩ, Menya na ma o ma atĩ mbeũ yaku nĩĩgatũũra ũgeni-inĩ bũrũri wene, na ĩtungatagĩre ene kuo; nao nĩmagatũũra mamĩnyariraga mĩaka magana mana; 14#Thama 12.40,41; Atũm 7.7.na ningĩ atĩrĩ, rũrĩrĩ rũu rũgatungatĩrũo nĩyo nĩ niĩ ngarũcirithia; na thutha wa ũguo nĩĩgacoka kuuma kuo ĩĩ na ũmathi mũingĩ. 15No wee-rĩ, nĩũgakua wĩthiĩre na thayũ na kũrĩa mathoguo marĩ; gũthikwo ũgathikwo ũkuĩte o wĩkinyĩirie. 16Na rĩrĩ, mbeũ ĩo yaku ĩgacoka gũkũ hĩndĩ ya rũciaro rũayo rũa kana, amu rũruka rũa Aamori rũtirĩ rũrakinyia waganu waruo harĩa ho. 17Na gũgĩkinya atĩrĩ, atĩ riũa rĩathũa, na kwagĩa nduma-rĩ, atĩrĩrĩ, gũkĩgĩa na kĩmwaki kĩnene gĩgũtoga ndogo, o na gĩcinga gĩkũrĩrĩmbuka, nakĩo gĩkĩhĩtũkĩra gatagatĩ inĩ ka njatũ icio cia nyama. 18#Atũm 7.5.Na rĩrĩ, mũthenya o ro ũcio Jehova agĩĩkĩra kĩrĩ-kanĩro na Aburamu, akiuga atĩrĩ, Bũrũri ũyũ-rĩ, nĩ’heete mbeũ yaku, warũma rũũĩ rũa Misiri o nginya rũũĩ rũrĩa rũnene rũĩtagwo Farati, 19o bũrũri ũyũ wa rũruka rũa Akeni, na rũa Akenizi, na rũa Akadimoni, 20na rũa Ahiti na rũa Aperizi, na rũa Arefai, 21na rũa Aamori, na rũa Akanaani, na rũa Agirigashi, o na rũa Ajebusi.

Currently Selected:

KĨAMBĨRĨRIA 15: OGKBIBLE

Highlight

Copy