KĨAMBĨRĨRIA 23

1Na rĩrĩ, Sara-rĩ, gũtũũra kũrĩa aatũũrire, aakinyirie mĩaka igana na mĩrongo ĩĩrĩ na mũgwanja; ĩo nĩyo mĩaka ĩrĩa Sara aatũũrire muoyo. 2Nake Sara agĩkuĩra Kiriathu-ariba (na nokuo Hebironi), o kũu bũrũri wa Kanaani, nake Iburahimu agĩtonya nĩguo amũcakaĩkĩre na amũrĩrĩre. 3Ningĩ Iburahimu agĩcoka agĩũkĩra, akiuma hau mũndũ ũcio wake mũkuũ aarĩ, akĩarĩria ciana cia Hethi, akiuga atĩrĩ, 4#Ahib 11.9,13; Atũm 7.16.Niĩ ndĩ mũgeni, na ndĩ mũthamĩri kwanyu; ta kĩ’hei handũ o gũkũ kwanyu, ha gũthikana, hatuĩke hakwa kĩũmbe, nĩ getha ’thike mũndũ ũcio wakwa mũkuũ, ndige kũmuona. 5Nacio ciana cia Hethi igĩcokeria Iburahimu, ikĩmwĩra atĩrĩ, 6Ta tũthikĩrĩrie, mũthuri ũyũ, wee wĩ mũnene mũige nĩ Ngai gũkũ thĩinĩ witũ; thika mũndũ ũcio waku mũkuũ mbĩrĩra-inĩ ciitũ o ĩrĩa ya ũthuro; ithuĩ hatirĩ mũndũ ũngĩkũgiria mbĩrĩra yake, tiga o ũthike mũndũ ũcio waku mũkuũ ho. 7Nake Iburahimu agĩũkĩra, akĩinamĩrĩra andũ acio ene bũrũri, ciana icio cia Hethi. 8Agĩkĩaria nao, akiuga atĩrĩ, Mũngĩkorũo nĩmuonete arĩ wega ’thike mũndũ ũcio wakwa mũkuũ, ndige kũmuona-rĩ, ta gĩ’thikĩrĩriei mũigue ũrĩa nguuga, mũ’thaithĩre Efironi, mũrũ wa Zoharu, 9nĩ getha a’he ngurunga ĩrĩa yake ya Makipela, ĩĩ gĩturi-inĩ gĩa gĩthaka gĩake; na nĩanyenderie o ta ũrĩa thogora wayo wothe ũigana, ĩtuĩke handũ hakwa kĩũmbe ha gũthikanaga o gũkũ thĩinĩ wanyu. 10Nake Efironi ũcio aakorirũo aikaire thĩ o hau gatagatĩ-inĩ ga ciana icio cia Hethi, ningĩ Efironi o ũcio Mũhiti agĩcokeria Iburahimu ũhoro, andũ acio ciana cia Hethi makĩĩiguagĩra, o arĩa othe a gũtonya na kĩhingo gĩa itũũra rĩu rĩake, akiuga atĩrĩ, 11Aca-ni, mũthuri ũyũ, ta ’thikĩrĩria, mũgũnda ũcio-rĩ, nĩndakũhe, o gwata ngurunga ĩo ĩrĩ ho, o nayo nĩndakũhe; ndakũhe ciana ici cia andũ aitũ ikĩĩonagĩra; thika mũndũ ũcio waku mũkuũ ho. 12Nake Iburahimu agĩkĩinamĩrĩra andũ acio ene bũrũri arorete o thĩ. 13Agĩcoka akĩarĩria Efironi, andũ acio ene bũrũri makĩĩiguagĩra, akiuga atĩrĩ, No rĩrĩ, ũngĩkorũo wetĩkĩra ũhoro wakwa-rĩ, ndagũthaitha ũ’thikĩrĩrie; mũgũnda ũcio waku, nĩ kũgũra ngũũgũra; iyũkia kĩgũri, na niĩ njoke ’thike mũndũ ũcio wakwa mũkuũ ho.

14Nake Efironi agĩcokeria Iburahimu, akĩmwĩra atĩrĩ, 15Mũthuri ũyũ, ta ’thikĩrĩria; gathaka kangiuma o cekeri magana mana cia betha-rĩ, gakĩrĩ kĩ, harĩ ithuĩ nawe? No ũthike mũndũ ũcio waku mũkuũ ho. 16Nake Iburahimu akĩiguana na Efironi, Iburahimu agĩkĩgerera Efironi betha, ĩo aagwetete ciana icio cia Hethi ikĩĩiguagĩra, o cekeri icio magana mana cia betha, cia mũthemba ũrĩa wonjorithanagio naguo. 17Mũgũnda ũcio wa Efironi, ũcio warĩ Makipela, o kũu kwang’ethanĩire na Mamure, mũgũnda ũcio, na ngurunga ĩo yarĩ kuo, o na mĩtĩ yothe ĩrĩa yarĩ kũu mũgũnda ũcio, o ĩrĩa yakorirũo ĩrigicĩirio na mũhaka waguo o kũrĩa wakinya mĩena yothe, icio ciothe-rĩ, 18igĩkĩrĩkĩrĩrio atĩ nĩ cia Iburahimu kĩũmbe, andũ acio ciana cia Hethi makĩĩonagĩra, o acio othe maarĩ a gũtonya na kĩhingo gĩa itũũra rĩu rĩake marĩ ho. 19Na thutha ũcio Iburahimu agĩthika mũtumia wake Sara ngurunga thĩinĩ, ĩo yarĩ mũgũnda ũcio kũu Makipela kwang’ethanĩire na Mamure (na nokuo Hebironi), o kũu bũrũri wa Kanaani. 20Mũgũnda ũcio, o na ngurunga ĩo yarĩ kuo, gũgĩkĩrĩkĩrĩrio nĩ ciana cia Hethi atĩ nĩ kwa Iburahimu kĩũmbe gũtuĩke gwake gwa gũthikanaga.

Currently Selected:

KĨAMBĨRĨRIA 23: OGKBIBLE

Highlight

Copy