KĨAMBĨRĨRIA 50

1Nake Jusufu agĩkĩĩgũithia ũthiũ-inĩ wa ithe akĩrĩrĩra ho, o na akĩmũmumunya; 2agĩcoka agĩatha athondekani arĩa maarĩ ndungata ciake mathondeke mwĩrĩ wa ithe na mũthaiga wao wa kũgiria ũbuthe; nao athondekani acio magĩgĩthondeka Isiraeli o ro ũguo na mũthaiga ũcio wao. 3Magĩkĩhingia matukũ mĩrongo ĩna nĩ ũndũ nĩmo maahingagio nĩ ũndũ wa ũthondeki ũcio. Nao andũ a Misiri makĩmũrĩrĩra matukũ mĩrongo mũgwanja.

4Namo matukũ ma kũmũrĩrĩra maathira, Jusufu agĩkĩaria na andũ a nyũmba ya Firauni, akĩmera atĩrĩ, Ingĩkorũo nĩnjĩtĩkĩrĩkĩte nĩ inyuĩ-rĩ, ndamũthaitha mũkamenyithie Firauni atĩ 5#Kĩam 47.29-31.baba nĩeĩ’hĩtithirie akĩnjĩra atĩrĩ, Rĩu ngiriĩ gũkua, na rĩrĩ, mbĩrĩra-inĩ yakwa ĩrĩa ndeyenjeire bũrũri wa Kanaani, noyo ũga’thika. Rĩu ndagũthaitha njĩtĩkĩria nyambe ngathike awa, na nĩngũcoka njũke. 6Firauni agĩkiuga atĩrĩ, Ambata ũgathike thoguo, o ta ũguo aakwĩhĩtithirie. 7Jusufu agĩkĩambata, agĩthiĩ gũthika ithe; nacio ndungata cia Firauni ciothe ikĩambatania na Jusufu, na athuri a nyũmba ya Firauni, na athuri othe a bũrũri wa Misiri, 8na andũ othe a nyũmba ya Jusufu, na ariũ a ithe, o na andũ a nyũmba ya ithe; no twana twiki na mbũri ciao, na ng’ombe, ciatigirũo kũu bũrũri wa Gosheni. 9Agĩkĩambatania na andũ mahaicĩte makari na mbarathi, me gĩkundi kĩnene mũno. 10Na rĩrĩ, maakinya kĩhuhĩro-inĩ kĩa ngano gĩa Atadi, mũrĩmo ũrĩa ũngĩ wa Jorodani, makĩrĩrĩra kĩrĩro kĩnene ho; nake Jusufu agĩgĩathana atĩ ithe arĩrĩrũo mĩthenya mũgwanja. 11Na rĩrĩ, Akanaani arĩa maatũũraga bũrũri ũcio, mona kĩrĩro kĩu kĩarĩragĩrũo kĩhuhĩro-inĩ kĩu gĩa Atadi, makiuga atĩrĩ, Hee! Kaĩ kĩrĩro gĩkĩ nĩkĩraiguithia Amisiri kĩeha mũno-ĩ! Na tondũ ũcio hau hagĩĩtwo Abeli-miziraimu, naho he mũrĩmo ũcio ũngĩ wa Jorodani. 12Nao ariũ a Jakubu magĩkĩmwĩka o ta ũrĩa aamaathire; 13#Atũm 7.16.nĩ gũkorũo nĩmaamũkuuire makĩmũtwara bũrũri wa Kanaani, magĩkĩmũthika ngurunga-inĩ ĩo yang’ethanĩire na Mamure, gĩthaka-inĩ kĩa Makipela, o ĩo Iburahimu aagũranĩirie na gĩthaka kĩu harĩ Efironi ũcio Mũhiti, nĩguo ĩtuĩke handũ hake ha gũthikanaga.

14Nake Jusufu aarĩkia gũthika ithe, agĩcoka Misiri, we mwene, o na ariũ a ithe, o na andũ othe arĩa maambatanĩtie nake magathike ithe. 15Nao ariũ a ithe na Jusufu mona atĩ ithe wao e gũkua, makĩĩrana atĩrĩ, Hihi rĩu Jusufu nĩegũitĩka gũtũthũũra, erĩhĩrie ũũru wothe ũrĩa twamwĩkire. 16Magĩkĩrekeria Jusufu mũndũ akamũhe ũhoro, makĩmwĩra ũũ: Thoguo atanakua nĩaathanire akiuga atĩrĩ, 17Ĩrai Jusufu ũũ: Ndagũthaitha ũkirĩre ariũ a thoguo ihĩtia rĩao, o na rĩĩhia rĩao; nĩ ũndũ ti-itherũ nĩmaagwĩkire ũũru. Tondũ ũcio, rĩu twagũthaitha ũtũkirĩre, ithuĩ ndungata cia Ngai wa thoguo, ihĩtia rĩu riitũ. Nake Jusufu agĩgĩitĩka kũrĩra maaria nake. 18Ariũ a ithe magĩgĩcoka magĩthiĩ makĩĩgũithia thĩ mbere yake, makiuga ũũ: Atĩrĩrĩ, ithuĩ tũrĩ ndungata ciaku. 19Nake Jusufu akĩmera atĩrĩ, Tigai gwĩtigĩra, nĩ ũndũ-rĩ, kaĩ arĩ niĩ ndĩ ithenya rĩa Ngai? 20Inyuĩ-rĩ, mwacirĩire kũnjĩka ũũru; no rĩrĩ, Ngai aacirĩire ũndũ mwega woneke, nĩ getha gũtuĩke o ta ũũ gũtariĩ ũmũthĩ, nĩguo andũ aingĩ mahonokio matũũre muoyo. 21Tondũ ũcio menyai mwĩtigĩre; nĩ niĩ ndĩrĩmũheaga irio cia kũrĩa, inyuene o na ciana cianyu. Agĩkĩmahoreria, akĩmaarĩria ndeto njega.

22Jusufu agĩgĩtũũra Misiri, we mwene, o na andũ a nyũmba ya ithe; nayo mĩaka ĩrĩa Jusufu aatũũrire muoyo yarĩ igana rĩa ikũmi. 23Nake Jusufu nĩonire ciana cia Efiraimu cia rũciaro rũa gatatũ, o nacio ciana cia Makiru, mũrũ wa Manase, ciarereirũo ndu-inĩ ciake. 24Ningĩ Jusufu agĩkĩĩra ariũ a ithe atĩrĩ, Ngiriĩ gũkua; no rĩrĩ, ti-itherũ Ngai nĩagoka kũmũrora, na nĩakamũruta bũrũri ũyũ amũhire bũrũri ũrĩa erĩire Iburahimu na Isaaka na Jakubu na mwĩhĩtwa. 25#Thama 13.19; Josh 24.32; Ahib 11.22.Jusufu agĩgĩtũma ciana cia Isiraeli ciĩhĩte, agĩciĩra ũũ: Atĩrĩrĩ, ti-itherũ Ngai nĩagoka kũmũrora, na inyuĩ-rĩ, hĩndĩ ĩo nĩmũgakuua mahĩndĩ makwa mũmarute gũkũ. 26Jusufu agĩgĩkua aninĩte mĩaka igana na ikũmi; nao magĩthondeka mwĩrĩ wake na mũthaiga wa kũgiria ũbuthe, agĩgĩĩkĩrũo ithandũkũ rĩa gũthikwo narĩo o kũu Misiri.

Currently Selected:

KĨAMBĨRĨRIA 50: OGKBIBLE

Highlight

Compare

Copy