LUKA 3

1ATĨRĨRĨ, rĩrĩa Tiberio Kaisari aathamakĩte mĩaka ikũmi na ĩtano, o hĩndĩ ĩo, nĩ Pontio Pilato warĩ barũthi wa gwathaga Judea, nake Herode aarĩ mũthamaki wa Galili, na Filipu mũrũ wa ithe aarĩ mũthamaki wa mabũrũri ma Iturea na Tarakoniti, nake Lusania aarĩ mũthamaki wa Abilene. 2Hĩndĩ ĩo-rĩ, rĩrĩa Anasi na Kaiafa maarĩ athĩnjĩri-Ngai arĩa anene, Ũhoro wa Ngai ũgĩkinya kwĩ Johana mũrũ wa Zakaria, e werũ-inĩ. 3Nake agĩkinya ng’ongo ciothe iria ciarĩ hakuhĩ na Jorodani, akĩhunjagia atĩ andũ mabatithio, o arĩa merirĩte, nĩguo moherũo mehia mao; 4#Isa 40.3-5.o ta ũrĩa kwandĩkĩtwo ibuku-inĩ rĩa mohoro ma Isaia ũrĩa mũnabii, atĩrĩ,

He mũgambo wa mũndũ ũkwanĩrĩra werũ-inĩ, akoiga,

Thondekai kĩng’aratua kĩa Mwathani, Rũngariani njĩra ciake.

5Ihũhi ciothe nĩigathikwo, ciambatĩre,

Nacio irĩma ciothe o na ithũngũri ciothe inyihio ciaraganio;

Nakuo kũrĩa kuogomu kũrũngario,

Na kũrĩa gũtarĩ kwaraganu kwaraganio wega;

6O na andũ othe nĩmakona kũhonokania kũrĩa kwa Ngai.

7 # Mat 12.34; 23.33. Nĩ ũndũ ũcio akĩĩra andũ a kĩrĩndĩ arĩa moimĩte kwao magĩthiĩ kũbatithio nĩwe, atĩrĩ, Ciana ici cia nduĩra, nũ ũmũkinyĩirie inyuĩ ũhoro atĩ mũũrĩre marakara marĩa magoka? 8#Joh 8.33.Nĩ ũndũ ũcio-rĩ, ciarai maciaro marĩa maringaine na kwĩrira, na mũtigaitĩke kwĩĩra na ngoro cianyu atĩrĩ, Ithe witũ nĩ Iburahimu: nĩ gũkorũo ngũmwĩra atĩrĩ, Ngai aahota gũtũma ciana cia Iburahimu ciume mahiga-inĩ maya. 9#Mat 7.19.Na ningĩ rĩu ithanwa nĩrĩrĩkĩtie kũigwo itina-inĩ cia mĩtĩ: nĩ ũndũ ũcio-rĩ, mũtĩ o wothe ũrĩa ũtaciaraga maciaro mega, nĩ gũtemwo ũtemagwo ũgaikio mwaki-inĩ. 10Nao andũ a kĩrĩndĩ makĩmũũria atĩrĩ, Korũo nĩ ũguo-rĩ, twagĩrĩirũo nĩ gwĩkaga atĩa? 11Nake agĩcokia akĩmera atĩrĩ, ũrĩa wĩ na nguo igĩrĩ, nĩahe ũrĩa ũtarĩ; nake ũrĩa wĩ na irio-rĩ, nĩekage o ũguo. 12#Luk 7.29.Ningĩ gũgĩũka etia mbia cia igoti makabatithio, nao makĩmũũria atĩrĩ, Mũrutani, ithuĩ twagĩrĩirũo nĩ gwĩkaga atĩa? 13Nake akĩmera atĩrĩ, Mũtigetie andũ kĩndũ tiga o kĩrĩa mwathĩtwo mwĩtagie. 14Nao athigari makĩmũũria atĩrĩ, Na ithuĩ-rĩ, twagĩrĩirũo nĩ gwĩkaga atĩa? Akĩmera atĩrĩ, Mũtikananyarire mũndũ, o na kana mũtunye mũndũ kĩndũ nĩ kũmũigĩrĩra; na ningĩ mũiganagwo nĩ mũcara wanyu.

15Na hĩndĩ ĩrĩa kĩrĩndĩ gĩatanyaga, gĩgĩthanganagia, nao andũ othe mageciragia ngoro-inĩ ciao ũhoro wa Johana, kana hihi nĩwe Kristo-rĩ, 16Johana agĩcokia akĩmera othe atĩrĩ, Niĩ-rĩ, ndĩmũbatithagia na maĩ; no rĩrĩ, nĩgũgoka ũngĩ wĩ na hinya kũrĩ niĩ, nayo mĩkwa ya iratũ ciake, niĩ-rĩ, ndiigaine wa kũmĩohora; ũcio nĩwe ũkamũbatithagia na Roho Mũtheru o na mwaki: 17gĩtarũrũ gĩake arĩ nakĩo guoko, nĩ getha atherie wega kĩhuhĩro gĩake, nacio ngano acokererie aciite ikũmbĩ rĩake; no acine mũũngũ na mwaki ũrĩa ũtangĩhoreka.

18Ũguo noguo aahunjagia Ũhoro-ũrĩa-Mwega, agĩtaaraga andũ na maũndũ mangĩ maingĩ; 19#Mat 14.3,4; Mar 6.17,18.no rĩrĩ, Herode ũrĩa mũthamaki, aakaanio nĩwe nĩ ũndũ wa Herodia, mũtumia wa mũrũ wa ithe, na ningĩ nĩ ũndũ wa maũndũ marĩa mothe moru ekĩte, we Herode-rĩ, 20akĩongerera macio mothe na ũndũ ũyũ ũngĩ, wa kuohithia Johana korokoro-inĩ.

21Na gũgĩkinya atĩrĩ, andũ othe maarĩkia kũbatithio, o nake Jesu aarĩkia kũbatithio-rĩ, hĩndĩ ĩrĩa aahoyaga Ngai, Igũrũ rĩkĩhingũka, 22#Kĩam 22.2; Thab 2.7; Isa 42.1; Mat 3.17; Mar 1.11; Luk 9.35.nake Roho Mũtheru agĩikũrũka, akĩũmba igũrũ rĩake arĩ na mwĩrĩ ũhaana ta wa ndutura, naguo mũgambo ũkiuma Igũrũ ũkiuga atĩrĩ, Wee nĩwe Mũrũ wakwa nyendete mũno; nĩngenaga nĩ ũndũ waku.

23Nake Jesu we mwene, rĩrĩa aambĩrĩirie kũrutana, nĩaaninĩte mĩaka ta mĩrongo ĩtatũ, nao andũ megeragĩria atĩ nĩwe mũrũ wa Jusufu, wa Eli, 24wa Mathati, wa Lawii, wa Meliki, wa Janai, wa Jusufu, 25wa Matathia, wa Amosi, wa Nahumu, wa Esili, wa Nagai, 26wa Maathi, wa Matathia, wa Semeini, wa Joseki, wa Joda, 27wa Joanani, wa Resa, wa Zerubabeli, wa Salathieli, wa Neri, 28wa Meliki, wa Adi, wa Kosamu, wa Elimadami, wa Eri, 29wa Jesua, wa Eliezeri, wa Jorimu, wa Mathati, wa Lawii, 30wa Simeoni, wa Juda, wa Jusufu, wa Jonamu, wa Eliakimu, 31wa Melea, wa Mena, wa Matatha, wa Nathani, wa Daudi, 32wa Jesii, wa Obedi, wa Boazu, wa Salimoni, wa Nahashoni, 33wa Aminadabu, wa Aruni, wa Hezironi, wa Peresu, wa Juda, 34wa Jakubu, wa Isaaka, wa Iburahimu, wa Tera, wa Nahori, 35wa Serugu, wa Ragau, wa Pelegi, wa Eberi, wa Shela, 36wa Kainani, wa Arafakasadi, wa Shemu, wa Nuhu, wa Lameki, 37wa Methusela, wa Enoko, wa Jaredi, wa Mahalaleli, wa Kainani, 38wa Enosi, wa Sethi, wa Adamu, wa Ngai.

Currently Selected:

LUKA 3: OGKBIBLE

Highlight

Copy