MARIKO 10
10
1NAKE agĩũkĩra akiuma kũndũ kũu, agĩkinya bũrũri wa Judea, o na mũrĩmo ũrĩa wa Jorodani: nakĩo kĩrĩndĩ gĩkĩmũũnganĩra o rĩngĩ; nake agĩcoka kũruta andũ ũhoro ta ũrĩa aamenyerete gwĩkaga. 2Na kwĩ Afarisai mokire kũrĩ we, makĩmũũria atĩrĩ, Watho nĩwĩtĩkĩrĩtie mũndũ ate mũtumia wake? na nĩ kũmũgeria maamũgeragia. 3Nake agĩcokia ũhoro akĩmoria, Musa aamwathire atĩa? 4#Gũcok 24.1-4; Mat 5.31.Makiuga, Musa nĩetĩkĩragia mũndũ aandĩke marũa ma gũtigana nake amũte. 5Nake Jesu akĩmera atĩrĩ, Aamwandĩkĩire rĩathani rĩu nĩ ũndũ wa kũũma kwa ngoro cianyu. 6#Kĩam 1.27; 5.2.No kuuma o kĩambĩrĩria rĩrĩa indo ciothe ciombirũo, gũtũire kwĩragwo ũũ, Aamombire marĩ mũndũ mũrũme na mũndũ mũka. 7#Kĩam 2.24.Nĩ ũndũ ũcio mũndũ mũrũme nĩagatigana na ithe na nyina, magwatane na mũtumia wake, 8nao erĩ matuĩke mwĩrĩ ũmwe: ũguo-rĩ, matingĩcoka gũtuĩka erĩ, no mwĩrĩ ũmwe. 9Nĩ ũndũ ũcio, arĩa Ngai agwatanĩtie, mũndũ ndakanamatigithanie. 10Na me nyũmba thĩinĩ, arutwo makĩmũũria rĩngĩ ũhoro ũcio. 11#Mat 5.32; 1 Kor 7.10,11.Nake akĩmera atĩrĩ, Mũndũ o wothe wa gũte mũtumia wake, ahikie ũngĩ-rĩ, ha ũhoro wake nĩatharĩtie: 12nake mũtumia we mwene angĩte mũthuriwe, ahikio nĩ ũngĩ, nĩatharĩtie.
13Ningĩ andũ makĩmũtwarĩra twana, atĩ atũhutie: nao arutwo makĩmakaania. 14Nake Jesu ona ũguo akĩrakara, akĩmera atĩrĩ, Rekei twana tũũke kũrĩ niĩ, mũtige gũtũgiria: amu ũthamaki wa Ngai nĩ wa arĩa matariĩ tatuo. 15#Mat 18.3.Ngũmwĩra atĩrĩrĩ na ma, Mũndũ o wothe ũtakaamũkĩra ũthamaki wa Ngai ta kaana, ndagatonya guo o na atĩa. 16Agĩcoka agĩtũiyũkia moko-inĩ make, agĩtũrathima agĩtũigagĩrĩra moko.
17Na hingo oimagaraga erekeire njĩra, mũndũ akĩmũteng’erera, akĩmũturĩria ndu, akĩmũũria atĩrĩ, Mũrutani mwega, nĩ atĩa ingĩĩka nĩ getha ngagae muoyo wa tene na tene? 18Nake Jesu akĩmũcokeria atĩrĩ, Ũkũnjĩta mwega nĩkĩ? gũtirĩ mwega tiga o ũmwe, nĩwe Ngai. 19#Thama 20.13; Gũcok 5.17; Thama 20.14; Gũcok 5.18; Thama 20.15; Gũcok 5.19; Thama 20.16; Gũcok 5.20; Thama 20.12; Gũcok 5.16.Ndũũĩ maathani, atĩ Ndũkanoragane, Ndũkanatharanie, Ndũkanaiye, Ndũkanaigĩrĩre mũndũ kĩgenyo, Ndũkanahenanie, Tĩa thoguo na nyũkwa? 20Nake akĩmwĩra atĩrĩ, Mũrutani, maũndũ macio mothe ndũire ndĩmarũmĩtie nginya ndĩ o mũnyinyi. 21Nake Jesu, aamũrora, akĩmwenda, akĩmwĩra atĩrĩ, Nĩkũrĩ ũndũ ũmwe ũtigairie: nĩ rĩrĩ, thiĩ, ũkendie indo ciothe iria wĩ nacio, ũhe arĩa athĩni, na nĩũkagĩa na ũtonga Igũrũ: na ũũke, ũnũmĩrĩre. 22Nowe agĩtuka gĩthiithi aaigua ũhoro ũcio, agĩthiĩ e na kĩeha: nĩ gũkorũo nĩ mũndũ warĩ na indo nyingĩ.
23Nake Jesu akĩroranga, akĩĩra arutwo ake atĩrĩ, Andũ arĩa me na indo-rĩ, kaĩ nĩmakona hinya magĩgatonya ũthamaki-inĩ wa Ngai-ĩ! 24Nao arutwo makĩgega nĩ ciugo icio ciake. Nake Jesu agĩcokia ũhoro rĩngĩ, akĩmera, Ciana ici, andũ arĩa mehokete indo-rĩ, kaĩ nĩ hinya magĩgatonya ũthamaki-inĩ wa Ngai-ĩ! 25Nĩ ũhũthũ ngamĩra ĩhungure kahoro ga cingano, kũrĩ mũndũ mũtongu atonye ũthamaki-inĩ wa Ngai. 26Nao makĩgega mũno mũno, makĩmũũria, Hakĩrĩ ũguo-rĩ, nũ ũngĩkĩhota kũhonoka? 27Nake Jesu akĩmera atĩrĩ, amacũthĩrĩirie, Gũtingĩhoteka nĩ andũ, no ti ũguo Ngai: amu-rĩ, maũndũ mothe mahotekaga nĩ Ngai. 28Nake Petero akĩrika kũmwĩra atĩrĩ, Rĩu-rĩ, ithuĩ tũtitigĩte indo ciothe na tũgakũrũmĩrĩra? 29Nake Jesu akiuga, Ngũmwĩra atĩrĩ na ma, Gũtirĩ mũndũ ũtigĩte nyũmba, kana agatiga ariũ a nyina, kana aarĩ a nyina, kana nyina, kana ithe, kana ciana, kana ithaka, nĩ ũndũ wakwa na tondũ wa Ũhoro-ũrĩa-Mwega, 30ũtakaheo rĩu matukũ maya tũrĩ, na akĩrĩrĩrio maita igana, nyũmba, na ariũ a nyina, na aarĩ a nyina, na manyina, na ciana, na ithaka, hamwe na mĩnyamaro; na hingo ĩrĩa ĩgoka thutha, aheo muoyo ũtagathira. 31#Mat 20.16; Luk 13.30.Ĩndĩ aingĩ makĩrĩ a mbere nĩmagatuĩka a thutha; nao a thutha matuĩke a mbere.
32Na maarĩ njĩra-inĩ makĩambata Jerusalemu, nake Jesu nĩaamatongoirie: nao nĩmaagegete, o na andũ arĩa maamũrũmĩrĩire makamaka. Nake agĩtwara arĩa ikũmi na erĩ rĩngĩ, akĩrika kũmera maũndũ marĩa akona, 33akiuga, Nĩ atĩrĩrĩ, tũkwambata Jerusalemu, nake Mũrũ wa Mũndũ nĩakaneanwo kũrĩ athĩnjĩri-Ngai arĩa anene o na aandĩki-marũa; nao nĩmakamũtuĩra cira atĩ oragwo, na mamũneane kũrĩ andũ a Ndũrĩrĩ: 34nao nĩmakamũnyũrũria, na mamũtuĩre mata, na mamũhũre na kĩboko kĩĩ njaaga, na mamũũrage; na thutha wa mĩthenya ĩtatũ nĩagacoka kũriũka.
35Na rĩrĩ, Jakubu na Johana, ariũ arĩa a Zebedi, makĩmũkuhĩhĩria makĩmwĩra atĩrĩ, Mũrutani, tũkwenda ũtwĩke o ũrĩa tũgũkũhoya. 36Nake akĩmoria, Mũkwenda ndĩmwĩke atĩa? 37Nao makĩmwĩra atĩrĩ, Ũtwĩtĩkĩrie tũgaikara ũmwe guoko-inĩ gwaku kwa ũrĩo na ũmwe guoko-inĩ gwaku kwa ũmotho, wagĩa na riri waku. 38#Luk 12.50.Nake Jesu akĩmera, Mũtiũĩ ũrĩa mũkũhoya. Mwahota kũnyuĩra gĩkombe kĩrĩa niĩ ngũnyuĩra, kana mũbatithio kũbatithio kũrĩa niĩ ngũbatithio nakuo? 39Makĩmwĩra, Twahota. Jesu agĩkĩmera, Gĩkombe kĩrĩa ngũnyuĩra no mũkanyuĩra, o na kũbatithio kũrĩa ngũbatithio no mũkabatithio nakuo: 40ĩndĩ gũikara guoko-inĩ gwakwa kwa ũrĩo, kana guoko-inĩ gwakwa kwa ũmotho, ti ũndũ ũngĩheanwo nĩ niĩ; nĩũkaheo o arĩa mathondekeirũo. 41Arĩa angĩ ikũmi nao maaigua, magĩitĩka kũrakara nĩ ũndũ wa Jakubu na Johana. 42#Luk 22.25,26.Nake Jesu akĩmeta, akĩmera atĩrĩrĩ, Nĩmũũĩ atĩ arĩa meragwo nĩ athamaki kwa andũ a Ndũrĩrĩ nĩmetũũgagĩria igũrũ rĩao, na anene ao nĩmamaathaga. 43#Mat 23.11; Mar 9.35; Luk 22.26.No ti ũguo gatagatĩ-inĩ kanyu; no rĩrĩ, ũrĩa ũngĩenda gũtuĩka mũnene thĩinĩ wanyu, nĩatuĩke o ndungata yanyu: 44na ũrĩa ũngĩenda gũtuĩka wa mbere thĩinĩ wanyu, nĩatuĩke o ngombo yanyu inyuothe. 45Tondũ ti-itherũ Mũrũ wa Mũndũ ndokire gũtungatĩrũo, no atungatanĩre, na arute muoyo wake ũtuĩke wa gũkũũra andũ aingĩ.
46Nao magĩkinya Jeriko: na rĩrĩa oimaga kũu Jeriko, me na arutwo ake o na kĩrĩndĩ kĩingĩ, mũrũ wa Timayo, ũrĩa wetagwo Baritimayo, mũndũ mũtumumu watũire ahoyaga thendi-rĩ, nĩaakorirũo aikaire thĩ mũkĩra-inĩ wa njĩra. 47Nake aaigua atĩ nĩ Jesu ũrĩa wa Nazarethi, agĩitĩka kwanĩrĩra, akiugaga, Jesu, Mũrũ wa Daudi, njiguĩra tha. 48Na andũ aingĩ makĩmũkaania, makĩmwĩra atĩ akire: nake no kwanĩrĩra aacokire kwanagĩrĩra o mũno, Mũrũ wa Daudi, njiguĩra tha. 49Nake Jesu akĩrũgama, akiuga, Mwĩtei. Magĩgĩĩta mũndũ ũcio mũtumumu, makĩmwĩra atĩrĩ, Wĩũmĩrĩrie: ũkĩra, nĩegũgwĩta. 50Nake agĩtiga aateania nguo, akĩguthũka, agĩthiĩ harĩ Jesu. 51Nake Jesu akĩmũcokeria ũhoro, akĩmũũria, Ũkwenda ngwĩke atĩa? Nake mũndũ ũcio mũtumumu akĩmwĩra atĩrĩ, Mũrutani, ngwenda o njoke kuona. 52Nake Jesu akĩmwĩra atĩrĩ, Wĩthiĩre: gwĩtĩkia gwaku nĩkuo gwatũma ũhone. Na kahinda o kau agĩcoka kuona, akĩmũrũmĩrĩra o na njĩra.
Currently Selected:
MARIKO 10: OGKBIBLE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
