MARIKO 3
3
1NINGI agĩtonya rĩngĩ thunagogi; nakuo kwarĩ mũndũ wonjete guoko. 2Nao magĩikara mamũcũthĩrĩirie, mone kana nĩangĩmũhonia mũthenya wa thabatũ; nĩguo mahote kũmũthitaka. 3Nake akĩĩra mũndũ ũcio wonjete guoko, Ta umĩra ũrũgame haha gatagatĩ-inĩ. 4Agĩcoka akĩũria andũ acio atĩrĩ, Mũthenya wa thabatũ-rĩ, watho wĩtĩkĩrĩtie gwĩkwo wega, kana gwĩkwo ũũru? gũtũũria muoyo, kana kũũraga? Nao magĩkira. 5Na aarĩkia kũmaroranga arakaire, nĩ kũigua ũũru nĩ ũrĩa momĩte ngoro, akĩĩra mũndũ ũcio atĩrĩ, Tambũrũkia guoko. Nake agĩgũtambũrũkia: nakuo guoko gwake gũgĩcoka kwagĩra. 6Nao Afarisai makiuma nja, makĩgĩa ndundu o ihinda o rĩu nĩ ũndũ wake, me na arĩa metagwo Aherodia, mamenye ũrĩa mangĩmũũragithia.
7Nake Jesu akĩĩeherera me na arutwo ake, agĩthiĩ iria-inĩ: na kĩrĩndĩ kĩingĩ kiumĩte Galili gĩkĩmuuma thutha: o na andũ angĩ moimĩte Judea, 8na Jerusalemu, na Idumea, na mũrĩmo ũrĩa wa Jorodani, o na kũrĩa gũkuhĩ na Turo na Sidoni, kĩrĩndĩ kĩingĩ ma, gĩgĩũka kũrĩ we nĩ kũigua maũndũ marĩa manene ekaga. 9#Mar 4.1; Luk 5.1-3.Nake akĩĩra arutwo ake atĩ macua ĩikare hakuhĩ nake nĩ ũndũ wa kĩrĩndĩ kĩu kĩonganĩte, nĩguo matikae kũmũhatĩka: 10nĩ gũkorũo nĩaahonetie andũ aingĩ; na tondũ ũcio arĩa othe maarĩ na mĩrimũ magĩkĩmũtindĩka nĩ getha mamũhutie. 11Nacio ngoma thũku, o ciamuona, ikamũgũĩra thĩ, igakaya, ikiugaga, Wee nĩwe Mũrũ wa Ngai. 12Nake agacikaanagia mũno itikamuumbũre.
13Agĩcoka akĩhaica kĩrĩma-inĩ, agĩĩta o arĩa eyendeire we mwene; nao magĩthiĩ harĩ we. 14Akĩamũra ikũmi na erĩ, maikarage nake na ningĩ amatũme makahunjie ũhoro, 15na magĩe na wathani wa gũtũma ndaimono ciume andũ. 16Nao nĩ aya, nĩ Simoni, nake ũcio akĩmũtua Petero; 17na nĩ Jakubu wa Zebedi, na Johana mũrũ wa nyina na Jakubu; nao acio akĩmatua Boanerigesi, nĩguo Ariũ a marurumĩ: 18na nĩ Andarea, na Filipu, na Baritholomayo, na Mathayo, na Toma, na Jakubu wa Alufayo, na Thadayo, na Simoni ũrĩa Mũkanaani, 19o na Judasi Mũisikariota, ũrĩa wamũkunyanĩire anyitwo.
Agĩcoka agĩtonya nyũmba. 20Nakĩo kĩrĩndĩ gĩkĩũngana rĩngĩ, aa Jesu magĩkĩremwo o na kũrũma kandũ. 21Na andũ a kwao maaigua ũguo, makiumagara magĩthiĩ kũmũnyita: tondũ moigaga atĩ, Nĩagũrũkĩte. 22#Mat 9.34; 10.25.Nao aandĩki-marũa arĩa maaikũrũkire moimĩte Jerusalemu, o makiuga, E na Beelizebuli, ningĩ makiuga, Nĩatũmaga ndaimono ciume andũ na hinya wa mũnene wa ndaimono. 23Nake akĩmeta akĩmera atĩrĩrĩ na ngerekano, Shaitani aahota atĩa kũrutũrũra Shaitani? 24Na ningĩ ũthamaki o wothe, andũ aguo mangĩamũkana mahũrane o ene, ũthamaki ũcio ndũngĩtũũra. 25O na nyũmba o yothe, andũ ayo mangĩamũkana mamenane o ene, nyũmba ĩo ndĩngĩhota gũtũũra. 26Nake Shaitani angĩkorũo nĩeũkĩrĩire ehũre, akaamũkana-rĩ, ndangĩtũũra, no athire. 27No gũtirĩ mũndũ ũngĩhota gũtonya nyũmba ya mũndũ karau na atahe indo ciake, ataambĩte kuoha mũndũ ũcio karau; hĩndĩ ĩo noyo angĩtaha indo nyũmba yake. 28Ndamwĩra atĩrĩrĩ o ma, Ciana cia andũ nĩikoherũo mehia ma cio mothe, o na irumi ciacio o ciothe iria igakorũo irumĩte Ngai nacio: 29#Luk 12.10.no mũndũ o wothe angĩruma Roho Mũtheru ndarĩ hingo akoherũo; nĩehĩtie rĩĩhia rĩgũtũũra tene na tene. 30Akiuga ũguo nĩ ũndũ nĩmoigire, E na ngoma thũku.
31Na rĩrĩ, nyina na ariũ a nyina magĩũka; makĩmũrekeria mũndũ amwĩte, marũgamĩte nja. 32Nao andũ nĩmaaikaire thĩ mamũrigicĩirie kĩrĩndĩ kĩingĩ; makĩmwĩra, Atĩrĩrĩ, nyũkwa na ariũ a nyũkwa megũgũcaria me nja. 33Nake akĩmacokeria ũhoro, akĩũria, Maitũ na ariũ a maitũ nũ na ũ? 34Akĩroranga andũ acio maaikaire thĩ mamũrigicĩirie, akiuga, Onei, maitũ na ariũ a maitũ nĩ aya! 35Amu-rĩ, mũndũ o wothe ũrĩĩkaga maũndũ marĩa Ngai endaga, ũcio nĩwe mũrũ wa maitũ, na mwarĩ wa maitũ, na maitũ.
Currently Selected:
MARIKO 3: OGKBIBLE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
