NDARI 28
28
1NAKE Jehova akĩarĩria Musa, akĩmwĩra atĩrĩ, 2Athana wĩre ciana cia Isiraeli imenyagĩrĩre ũhoro wothe wa kũndutĩra indo iria ndutagĩrũo ihinda rĩrĩa rĩagĩrĩire rĩakinya, o na irio ciakwa iria ndutagĩrũo cia mahaki ma gũcinwo na mwaki, marĩa matũmaga njigue mũtararĩko ũrĩa ũnungaga wega; 3ũkĩmere atĩrĩ, Rĩrĩ nĩrĩo ihaki rĩa indo cia gũcinwo na mwaki rĩrĩa mũrĩrutagĩra Jehova; mũrĩrutaga hingo ciothe, o mũthenya, tũtũrũme twĩrĩ twa mwaka ũmwe, tũtarĩ na kaũũgũ, nĩ ũndũ wa ihaki rĩa njino. 4Gatũrũme kamwe nĩkarutagwo rũcinĩ, nako karĩa kangĩ karutagwo hwaĩ-inĩ gũtanatuka; 5tũrutanagĩrio hamwe na gĩcunjĩ gĩa ikũmi kĩa eba ng’ima ya mũtu mwega mũhinyu mũno, ũtuĩke ihaki rĩa mũtu, na ũtukanagio na gĩcunjĩ gĩa kana kĩa hini ĩmwe ya maguta marutĩre wĩra wa kũhũrahũrũo magakeerũo wega. 6Rĩu nĩrĩo ihaki rĩa njino rĩa gũtũũra rĩrutagwo hingo ciothe; naguo ũhoro ũcio nĩguo waathanĩirũo o kũu kĩrĩma-inĩ gĩa Sinai, atĩ ihaki rĩu rĩrutagwo rĩa gũtuĩka mũtararĩko ũrĩa ũnungaga wega rĩrutĩirũo Jehova na ũndũ wa gũcinwo na mwaki. 7O nacio indo iria irutagwo cia kũnyuwo cia igongona ciarĩo ituĩke gĩcunjĩ gĩa kana kĩa hini ĩmwe nĩ ũndũ wa gatũrũme kau kamwe ga tũu twerĩ; naho handũ harĩa hatheru nĩho ũgaitanga ndibei ĩo ndũrũ, ĩtuĩke kĩndũ kĩrĩa kĩrutĩirũo Jehova. 8O nako gatũrũme kau kangĩ ũkarutage hwaĩ-inĩ gũtanatuka; na karutanagĩrio na ihaki rĩa mũtu, o na indo iria irutagwo cia kũnyuwo cia igongona, o ta ũrĩa irutagwo rũcinĩ; nĩ getha gatuĩke ihaki rĩa njino rĩa gũtũma mũtararĩko ũrĩa ũnungaga wega ũiguwo nĩ Jehova.
9O naguo mũthenya wa thabatũ nĩũkarutaga tũtũrũme twĩrĩ twa mwaka ũmwe, tũtarĩ na kaũũgũ; natuo tũrutanagĩrio na icunjĩ igĩrĩ cia ĩkũmi cia eba ng’ima ya mũtu ũrĩa mwega mũhinyu mũno, ũtuĩke ihaki rĩa mũtu ũtukanĩtio na maguta, o na indo iria irutagwo cia kũnyuwo cia igongona ciarĩo. 10Rĩu nĩrĩo ihaki rĩa njino rĩa kũrutagwo mĩthenya yothe ya thabatũ, hamwe na ihaki rĩu rĩa njino rĩa gũtũũra rĩrutagwo hingo ciothe, na indo iria irutagwo cia kũnyuwo cia igongona ciarĩo.
11Na rĩrĩ, o kĩambĩrĩria-inĩ kĩa mĩeri yanyu-rĩ, rutagĩrai Jehova ihaki rĩa njino; narĩo rĩtuĩke ndegwa igĩrĩ itarĩ ngũrũ, na ndũrũme ĩmwe, o na tũtũrũme mũgwanja twa mwaka ũmwe, tũtarĩ na kaũũgũ, 12na harutanĩrio na ndegwa o ndegwa icunjĩ ithatũ cia ĩkũmi cia eba ng’ima ya mũtu ũrĩa mwega mũhinyu mũno wa gũtuĩka ihaki rĩa mũtu, ũtukanĩtio na maguta; na icunjĩ igĩrĩ cia ĩkũmi cia mũtu ũrĩa mwega mũhinyu mũno, ũrutanĩrio na ndũrũme ĩo ĩmwe, ũtuĩke ihaki rĩa mũtu, ũtukanĩtio na maguta; 13o nakĩo gĩcunjĩ kĩmwe gĩa ikũmi kĩa mũtu ũrĩa mwega mũhinyu mũno, ũtukanĩtio na maguta, ũrutanĩrio na gatũrũme o gatũrũme ũtuĩke ihaki rĩa mũtu nacio indo icio-rĩ, nĩcio ihaki rĩa njino rĩa gũtũma mũtararĩko ũrĩa ũnungaga wega ũiguwo nĩ Jehova na ũndũ wa gũcinwo na mwaki. 14Na rĩrĩ, indo iria irĩrutagwo, ituĩke indo cia kũnyuwo cia igongona-rĩ, nĩ nuthu ya hini ĩmwe ya ndibei nĩ ũndũ wa ndegwa ĩmwe, o na gĩcunjĩ gĩa gatatũ kĩa hini ĩmwe nĩ ũndũ wa ndũrũme ĩmwe, o na gĩcunjĩ gĩa kana kĩa hini ĩmwe nĩ ũndũ wa gatũrũme kamwe; rĩu nĩrĩo ihaki rĩa njino rĩa mweri o mweri, mĩeri-inĩ yothe ya mwaka mũgima. 15Ningĩ Jehova arutĩrũo thenge ĩmwe ĩtuĩke igongona rĩa mehia; na ĩrutanĩrio na ihaki rĩa njino rĩu rĩa gũtũũra rĩrutagwo hingo ciothe, hamwe na indo iria irutagwo cia kũnyuwo cia igongona ciarĩo.
16 #
Thama 12.1-13; Gũcok 16.1,2. Na rĩrĩ, mweri wa mbere, o mũthenya wa ikũmi na ĩna waguo, nĩguo wa Bathaka ya Jehova. 17#Thama 12.14-20; 23.15; 34.18; Gũcok 16.3-8.O naguo mũthenya wa ikũmi na ĩtano wa mweri ũcio nĩguo ũgatuĩka wa gĩathĩ kĩu; nayo mĩgate ĩtarĩ mĩimbie ĩkarĩo mĩthenya mũgwanja. 18Naguo mũthenya wa mbere nĩmũkagĩaga na ũũngano mwamũre ũkoniĩ andũ othe, na mũtikaruta wĩra o na ũrĩkũ wa ndũire; 19no rĩrĩ, mũkarutaga indo cia gũcinwo, cia ihaki rĩa njino rĩa kũrutĩrũo Jehova; nacio nĩ ndegwa igĩrĩ itarĩ ngũrũ, na ndũrũme ĩmwe, o na tũtũrũme mũgwanja twa mwaka ũmwe; na mũcimenyerere itigakorũo na kaũũgũ; 20na mũcirutanĩrie na ihaki rĩacio rĩa mũtu, o mũtu ũrĩa mwega mũhinyu mũno, ũtukanĩtio na maguta; naguo ũrutwo icunjĩ ithatũ cia ikũmi cia eba ng’ima nĩ ũndũ wa ndegwa ĩmwe; o nacio icunjĩ igĩrĩ cia ikũmi nĩ ũndũ wa ndũrũme ĩmwe; 21nakĩo gĩcunjĩ kĩmwe kĩmwe gĩa ikũmi kĩrutwo nĩ ũndũ wa gatũrũme o gatũrũme ga tũu mũgwanja; 22o na ningĩ thenge ĩmwe ĩrutwo ĩtuĩke igongona rĩa mehia, nĩguo mũhoroherio nayo. 23Indo icio mũgacirutanagĩria hamwe na igongona rĩrĩa rĩcinagwo rũcinĩ, rĩu rĩa gũtũũra rĩrutagwo hingo ciothe. 24Na rĩrĩ, nĩ ihinda rĩa matukũ mũgwanja kĩrũmanĩrio mũkarutaga irio icio irutagwo cia gũcinwo na mwaki, cia gũtũma mũtararĩko ũrĩa ũnungaga wega ũiguwo nĩ Jehova; nacio irutanagĩrio hamwe na ihaki rĩa njino rĩu rĩa gũtũũra rĩrutagwo hingo ciothe, o na indo iria irutagwo cia kũnyuwo cia igongona ciarĩo. 25Ningĩ mũthenya wa mũgwanja mũgĩe na ũũngano ũngĩ mwamũre ũkoniĩ andũ othe, na mũtikaruta wĩra o na ũrĩkũ wa ndũire.
26 #
Thama 23.16; 34.22; Gũcok 16.9-12. O na ningĩ-rĩ, mũthenya wa gĩathĩ kĩa irio cia mũro wa mbere, hĩndĩ ĩrĩa mũkũrutĩra Jehova ihaki rĩa mũtu wa ngano ya mũhando, gĩathĩ-inĩ kĩanyu kĩrĩa gĩĩtagwo gĩa ciumia-rĩ, gĩagai na ũũngano mwamũre ũkoniĩ andũ othe; na mũtikarute wĩra o na ũrĩkũ wa ndũire. 27No rĩrĩ, rutagai ihaki rĩa njino rĩa gũtũma mũtararĩko ũrĩa ũnungaga wega ũiguwo nĩ Jehova; narĩo nĩ rĩa ndegwa igĩrĩ itarĩ ngũrũ, na ndũrũme ĩmwe, o na tũtũrũme mũgwanja twa mwaka ũmwe; 28na irutanĩrio na ihaki rĩacio rĩa mũtu, o mũtu ũrĩa mwega mũhinyu mũno, ũtukanĩtio na maguta; nacio icunjĩ ithatũ cia ikũmi cia eba ng’ima irutwo nĩ ũndũ wa ndegwa ĩmwe, o na icunjĩ igĩrĩ cia ikũmi nĩ ũndũ wa ndũrũme ĩmwe, 29o na gĩcunjĩ kĩmwe gĩa ikũmi kĩrutwo nĩ ũndũ wa gatũrũme o gatũrũme ga tũu mũgwanja; 30na harutwo thenge ĩmwe nĩguo mũhoroherio nayo. 31Nacio indo icio mũcirutanagĩrie hamwe na ihaki rĩa njino rĩa gũtũũra rĩrutagwo hingo ciothe, o na ihaki rĩarĩo rĩa mũtu, na indo iria irutagwo cia kũnyuwo cia igongona ciarĩo, (naho ha ũhoro wa nyamũ icio, menyagĩrĩrai atĩ itikanakorũo irĩ na kaũũgũ).
Currently Selected:
NDARI 28: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019