BOISIONIKAB CHE KIYOKTOI 7
7
Amdaetab Stepano
1Kole anyun tisiindet ne o, Tos u choto tuguchu? 2Kole Stepano, Che kitupche ak kwanisiekyok, ogaso. Kimong’ji Jehovah ne bo torornatet kwandanyo Abraham, ye kimi Mesopotamia, kotomo komeny Haran, 3ak kolenji, Mong’u eng’ emeng’ung’ ak eng’ ole mi biguk, ak inyo emet ne ta aborun. 4Komong’ anyun eng’ emetab Kaldeik, ak komeny Haran: ak kingo kagome kwandanyi, kouu Jehovah inendet, konyo emonito omenye rani: 5ak kima igochi inendet borotet eng’ oloto, acha, agot ole indoi keldanyi: ak kiiarorji kole, tun igochin inendet ak iyotennyi eng’ let, ye kitom kosich lakwa. 6Ak kimwa Jehovah ko u ni, kole, Egu lagokyik bunotik eng’ emetab bik alak, ak koyai ichek koek otwogik, ak koyachi ne ya eng’ kenyisiek bogol ang’wan. 7Ak kimwa Jehovah, kole, Aruokyini bororionoto ne tun ratei ichek: ak ye ibata noto komong’ ak koboisiewa eng’ olito. 8Ak kiigochi arorutiet ne bo kamuratanet: kosich anyun Abraham Isak, ak komuratan inendet eng’ betut ne bo sisiit; ak kosich Isak Jakobo, ak kisich Jakobo kwanisiekyok taman ak aeng’.
9Ak ye kingoam ng’et kong’ boisiechoto agobo Josep, koalda inendet kwo Misri: ak kimi Jehovah koboto inendet, 10ak kisor inendet eng’ nyalilwogikyik tugul, ak kogochi chamet ak ng’omnatet eng’ taitab Parao laitoriatab Misri; ne kiinde inendet koek bounindet eng’ Misri ak gonnyi tugul. 11Kinyo anyun rubet Misri komugul ak Kanan, ak nyalilda ne o: ak manyor kwanisiekyok amitwogik. 12Ago ye kingogas Jakobo kole mitei bek Misri, koyokto kwanisiekyok eng’ banda ne bo tai. 13Ak eng’ banda ne bo aeng’ koborjigei Josep tupchosiekyik; ak kinaak eng’ Parao bikab Josep. 14Ak kiiyokto Josep kole keguur kwandanyi Jakobo, ak bikyik tugul, bik tamanwogik tisab ak mut. 15Kochortagei anyun Jakobo kwo Misri; ak kime, inendet, ak kwanisiekyok; 16ak kigila ichek koba Sekem, ak kigitupchi kererit ne kiga al Abraham eng’ kamanutietab feda eng’ werikab Hamor eng’ Sekem.
17Ak ye kingorik betut ne bo arorutiet, ne kiiyosiechi Jehovah Abraham, koyabak bik ak kotesogis eng’ Misri, 18agoi kobiit laitoriat age eng’ Misri, ne kima kongen Josep. 19King’omenji inendet bororiennyo, ak koyachi ne ya kwanisiekyok, si kolakta manyurunikwak si masopcho. 20Ak kigisich Musa eng’ betusiechoto, ak ki kararan inendet mising’; ak kigigu eng’ gotab kwandanyi arawek somok; 21ak kingo kagemeto, konyo chebo Parao, komut, ak kogu koek werinnyi. 22Ak kiginet Musa ng’omnatet tugul ne bo Misrik; ak ki kim eng’ ng’alekyik ak boisionikyik.
23Ak ye kingoit olo bo kenyisiek artam, kobwat eng’ muguleldanyi korutochi tupchosiekyik, lagokab Israel. 24Ak ye kingogeer kinyalili age eng’ ichek, kotoret inendet, ak koyaaktochi mugetut inendet ne kaginyalili, kokwer Misrindet kobar: 25ak kilen inendet naei tupchosiekyik kole igochin Jehovah ichek sorunet eng’ eunnyi; ago ma nai. 26Ak eng’ betut ne isubi noto kochunji ichek kobortos, ak iimachei kooiyo ichek, kolenji, Murenju, otupche okwek; kalya si oyachige ne ya? 27Ago kitoorta inendet ne kiyachi nin age ne ya, ak kole, Ng’o ne koindein iegu bounindet ak kiruogindet kot iruokwech? 28Imache ibara ko u ye koibar Misrindet amut? 29Kimwee Musa anyun ng’olyondonoto, kwo koek bunotyo eng’ emetab Midian, ole kisikyi werik aeng’.
30Ak kingobata kenyisiek artamu, komong’ji inendet malaikaiyat eng’ ong’atet ne bo tulwetab Sinai, eng’ mat ne lalei eng’ ketit ne samum. 31Ak kingogeer Musa, kokwong’ eng’ kioto kageer: ak kingorikta kole kogeer, kotwek kutitab Kiptaiyat, 32kole, A Jehovah ne bo kwanisieguk, Jehovah ne bo Abraham, ak ne bo Isak, ak ne bo Jakobo. Kobotan Musa, ko mata kogany kogeer. 33Kolenji Kiptaiyat anyun inendet, Icheru kweoniguk eng’ kelyeguk: amu tilil ng’onyut yoto itonone. 34Kiageer iman nyalildab bikyuk che mitei Misri, ak kiagas tigenenywa, ak kaachoruge si kobiit asor ichek: nyo anyun nguno, ayokten iwe Misri.
35Musa nito ne kiesio ichek, kolen, Ng’o ne koindein iegu bounindet ak kiruogindet? Inendet ne kiiyokto Jehovah eng’ eutab malaikaiyat ne kimong’ji inendet eng’ ketit si kobiit koek bounindet, ak katiagindet. 36Kiimut chichi anyun ichek komanda, ye kingo kagoyai kwong’utik ak kaborunoik eng’ Misri, ak eng’ Nyanjet ne Birir, ak eng’ kenyisiek artam eng’ ong’atet. 37Musa nito ko noto ne kilenji lagokab Israel, Ing’eetwok Jehovah maotiot ne tun bunu che otupche, ne u ane. 38Nito ko inendet ne kimi kaniset eng’ ong’atet koboto malaikaiyat ne king’alalji inendet eng’ tulwet ne bo Sinai, ak koboto kwanisiekyok: ne kitaach ng’alek che soptos si kogonech:
39ak kima kas it kwanisiekyok inendet, ago kiesio inendet, ak kiweektagei mugulelwekwak Misri, 40kolenji Aron, Yaiywech kanamonik kondoenech: amu magingen ole katepto Musa nito, ne kiimutwech kemong’une emetab Misri. 41Ak kiyai anyun moita eng’ betusiechoto, ak koipchi tiseiywot kanamwonoto, ak koboiboitu eng’ boisionikab eunekwak. 42Ago kiituktochi batai Jehovah ichek, ak kogoito ichek koot lugetab kipsengwet; ko u ye sirat eng’ bukuitab maotik, kele,
Tos kiogona che kiyagi che kageeny ak tiseiywek
Eng’ kenyisiek artam eng’ ong’atet,
Ee gotab Israel?
43Ak kioib okwek emait ne bo Molok.
Ak kecheiyat ne bo kanamwet Repan,
Kanamonik che kioyai si osa:
Ak autok obe Babulon bitonin.
44Kitinyei kwanisiekyok emait ne bo baornatet eng’ ong’atet, ko u ye kiga koaror inendet ne kimwachi Musa, kolenji, koyai ko u kergeindo ne kiga kogeer. 45Ne kiib kwanisiekyok agichek eng’ betusiekwak, koboto Josua, ye kinamei Bororiosiek, che kion Jehovah eng’ taitab kwanisiekyok, agoi betusiekab Daudi; 46ne kinyor chamet eng’ taitab Jehovah, ak kosom konyor meng’otetab Jehovah ne bo Jakobo. 47Ago Solomon ne kiteekyi got.
48Ago mamenyei Inendet ne Toror Mising’ gorik che kiyae eunek; ko u ye mwaei maotiot, kole, 49Ng’echerennyu ne bo laitornatet kipsengwet,
Ak ng’ony ko ng’echeretab kelyekyuk:
Tos oteekwa got ne u nee? Mwaei Kiptaiyat:
Anan ano ole amuung’e?
50Tos ma eunnyu ne kiyaei tuguchu tugul?
51Okwek che uui kaat che ma kimuratan mugulelwek ak itik, ogirindoi Tamirmiriet ne Tilil kotugul: ko u ye kiyaei kwanisiekwok, oyae ak okwek ko u noto. 52Ng’o eng’ maotik ne ma us kwanisiekwok? Ak kibar che kisib kobor nyonunetab Chito ne bo Imanda; ne kaoegu okwek nguno ng’wektoik ak rumik. 53Okwek che kiotaach Ng’atutiet ko u ye kiging’at eng’ malaikaisiek, ak ma orib.
Meetab Stepano
54Ak ye kingogas ng’alechuto kong’wonegitu mising’ eng’ mugulelwekwak, ak konyei kelek agobo inendet. 55Ago kiinyal kipsengwet kochiilji kong’ ko nyiitat inendet Tamirmiriet ne Tilil, ak kigeer lilindab Jehovah, ak Jesu kotononi eng’ eutab tai ne bo Jehovah, 56ak kile, Ogeero, ageere kipsengwetisiek ko kagoyatogis, ak kotononi Weritab chi eng’ eutab tai ne bo Jehovah.
57Ago kibolyo eng’ kutit ne o, ak koger itikwak, ak kotorombenji kibagenge; 58ak kitoorta inendet komanda eng’ nganaset, ak kolage koik: ak kiinde baorinik ngoroikwak kelyekab muren age ne kigiguure Saul. 59Kolach anyun Stepano, koguurei Kiptaiyat, kolen, Kiptaiyat Jesu, taach tamirmiriennyu. 60Ak kigutuny, ak komwa eng’ kutit ne o, kole, Kiptaiyat, ameiityi ichek tengegi. Ak kingo kagomwa nito, konuuch.
Currently Selected:
BOISIONIKAB CHE KIYOKTOI 7: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
