TAUNET 14
14
Lugetab laitorinik. Luuletab Lot ak ole kigisorundo
1Ak kibiit ko u ni eng’ betusiek che bo Amrapel, laitoriatab Sinar, ak Ariok, laitoriatab Elasar, ak Kedolaomer, laitoriatab Elam, ak Tidal, laitoriatab Goim, 2kiborio laitorinichuto ak Bera, laitoriatab Sodom, ak Birisa, laitoriatab Gomora, ak Sinab, laitoriatab Adma, ak Semeba, laitoriatab Seboim, ak laitoriatab Bela (noto ko Soar). 3Kiiyomogei chuto tugul eng’ atebwetab Sidim (noto ko Araraita ne bo Munyuk). 4Kiot ichek Kedolaomer kenyisiek taman ak aeng’, ak eng’ kenyitab taman ak somok kongelelso. 5Ak kinyo Kedolaomer koboto laitorinik che kimi ak inendet, eng’ kenyitab taman ak ang’wan, kwo kobar Repaik eng’ Asterot-Karnaim, ak Susik eng’ Am, ak Emik eng’ Sabe-Kiriataim, 6ak Horik, eng’ tulwenywa Seir, agoi El-paran, ne negite ong’atet. 7Ak koweek kobwa En-mispet (noto ko Kades) ak kobar koret tugul ne bo Amalekik, ak Amorik agichek, che kimenyei Hasason-tamar. 8Ak kimanda laitoriatab Sodom, ak laitoriatab Gomora, ak laitoriatab Adma, ak laitoriatab Seboim, ak laitoriatab Bela (noto ko Soar); kitet luget kotuiyo eng’ atebwetab Sidim, 9kiba koborio ak Kedolaomer, laitoriatab Elam, ak Tidal, laitoriatab Goim, ak Amrapel, laitoriatab Sinar, ak Ariok, laitoriatab Elasar; koborio laitorinik ang’wanu ak laitorinik mut. 10Ki nyiitat atebwetab Sidim keringonik che bo lamit; ak kimwei laitorinik che bo Sodom ak che bo Gomora, ak kirorokyi oloto, ak kimwechi chun kang’et tulwet. 11Ak kiluul tuguk tugul che bo Sodom ak che bo Gomora, ak amitwogikwak tugul, ak koba bandanywa. 12Ak kiluul Lot weritab ng’etab kametab Abram, ne kimenyei Sodom, ak tugukyik, ak koba.
13Ak kiwa chito ne kigachilil, si komwachi Abram Hebranindet: ne tebune ole negite ketikab Mamre, Amorindet ne tupcho ak Eskol, ng’etab kam bo Aner; ak kinamegei bichuto ak Abram. 14Ak kingogas Abram kole, Kageluul ne bo ornywa, koawen koboto otwogikyik che kiginet luget, che kigisikyin gonnyi, bik bogol somok ak taman ak sisit, ak kiisub laitorinichoto agoi koit Dan. 15Ak kiyiem inendet ak otwogikyik bunik kemoi, ak kobar ichek, ak kiisub agoi koit Hoba ne mi eutab katam ne bo Damasko. 16Ak kisor tuguk tugul, ak koweech Lot ne bo ornywa, ak tugukyik, ak kobogorisiek agichek, ak bik.
Koberuri Melkisedek Abram
17Kimong’ anyun laitoriatab Sodom kotorok inendet, ye kiweeksei kobunu baretab Kedolaomer ak laitorinik che kimitei koboto inendet, eng’ atebwetab Sabe (noto ko atebwetab laitoriat). 18Ak kiibu Melkisedek laitoriatab Salem makatinik ak divaik: ki tisiindetab Kamuktaindet ne Toror Mising’. 19Ak kiiberur inendet, ak kole, Ingoberurok Abram eng’ Kamuktaindet ne Toror Mising’ ne chechik kipsengwetisiek ak ng’ony. 20Iberurot Kamuktaindet ne Toror Mising’, ne kiinde buniguk euneguk. Ak kiigochi Abram inendet kebeberta ne bo taman ne bo kiy tugul. 21Ak kilenji laitoriatab Sodom Abram, Kona bik, ak iib inye tuguk kobunjin. 22Kolenji Abram laitoriatanb Sodom, Kaaiitochi eunnyu Jehovah, Kamuktaindet ne Toror Mising’, ne chechik kipsengwetisiek ak ng’ony, 23ale maname agot inet anan tapsiniet, agot kiy age tugul neng’ung’, si memwa ile, Kaayai Abram koek magorio: 24kobate choto che kigoam murenik, ak motwetab bik che kigibe tugul; Aner, ak Eskol, ak Mamre, ingoib ichek kebebertanywa.
Currently Selected:
TAUNET 14: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
