TAUNET 17
17
Kayomiset agobo yatitaisiet eng’ bororietab Israel
1Ak ye kingo bo Abram kenyisiek tamanwogik sogol ak sogol, komong’ji Jehovah Abram, ak kolenji, A Kamuktaindet ne bo Kamuktaet; wendote tainnyu, ak iegu ne igesunotgei. 2Ak agonu kayomisennyu konyo kwenunnyo, inye ak ane, ak atesin mising’ kot. 3Ak kiibutyi ng’ony Abram: kong’alal Kamuktaindet ak inendet kolenji, 4Keero, eng’ ane anyun, komi kayomisennyu koboten, ak tun iegu kwandab bororiosiek che chang’. 5Ma keguurenen Abram agoi, ago kagiguurenen Abraham: amu kaagonin iegu kwandab bororiosiek che chang’. 6Ak aberurin mising’ eng’ iyotet, ak ayai bororiosiek eng’ inye, ak komong’unenen laitorinik. 7Ak agimiti kayomisennyu eng’ kwenunnyo, inye ak ane, ak iyoteng’ung’ ne biitu let eng’ inye, eng’ ibinwekwak tugul, si koek kayomiset ne wendi agoi koigeny, ale aek Kamuktaindet eng’ inye ak eng’ iyoteng’ung’ ne biitu let eng’ inye. 8Ak agonin emoni iwendote, inye koboto lagoguk che biitu let eng’ inye, agot emet komugul ne bo Kanan, kobunjok koigeny; ak aegu Kamuktaindenywa.
9Ak kilenji Kamuktaindet Abraham, Rib anyun inye kayomisennyu, inye ak lagoguk che biitu let eng’ inye, eng’ ibinwekwak tugul. 10Kayomisennyu ni, ne kanyol orib, eng’ kwenunnyo, inye ak ane, ak lagoguk che biitu let eng’ inye: kiyatitoi ng’etet age tugul eng’ okwek. 11Ak kimuratani iririotab borwekwok, ak egu noto kaborunet ne bo kayomiset eng’ kwenunnyo, ane ak okwek. 12Kiyatitoi ng’etet age tugul eng’ okwek ne kagotar betusiek sisiit, ng’etet age tugul eng’ ibinwekwok tugul, ne kisikyin gorikwok, ak ne kigiale fedaisiek eng’ toek alak tugul, ne masalwok. 13Kanyol keyatita ne kisikyin gong’ung’, ak ne kiale fedaisieguk: ak kotebe kayomisennyu borwekwok koek kayomiset ne bo koigeny. 14Ak ng’etet age tugul ne ma kimuratan iririotab bortanyi, king’etoi chichoto eng’ bikyik, amu kibut kayomisennyu.
15Ak kimwachi Kamuktaindet Abraham, kolenji, Sarai osotiondeng’ung’, ko mata iguure kainennyi Sarai, ago kagoek kainennyi Sara. 16Ak aberur inendet, ak ne siirei, ko kaagochi inendet kosigun werit: ee, aberuri inendet, ak egu kametab bororiosiek; ak komong’une inendet laitorinikab bik. 17Ak kiing’uruk anyun Abraham, kotokyi togennyi ng’ony, korori ak kole eng’ muguleldanyi, Tos kisikyi lakwet chito ne kigotar kenyisiek bogol? Ak tos ta kosich lakwet Sara agine, ne kigotar kenyisiek tamanwogik sogol? 18Ak kilenji Abraham Kamuktaindet, Kata mie kosob Ismael eng’ taing’ung’. 19Ak kile Kamuktaindet, Achicha, sigun iman Sara kaing’ung’ werit; ak tun iguure kainennyi Isak: ak agimiti kayomisennyu koboto inendet ak iyotennyi ne tun biitu let eng’ inendet, si koek kayomiset ne wendi agoi koigeny. 20Ak kaagasun ng’alek agobo Ismael: keero, kaaberur inendet, ak agochini inendet iyotet, ak abaroi inendet mising’ inne, ak tun sichei bounik taman ak aeng’ ak agochini koek bororiet ne o. 21Ago agimiti kayomisennyu eng’ Isak, inendet ne tun sigun Sara eng’ kenyit ne nyonei eng’ betusiechuto.
22Ak kiiges ng’alalet ne king’alali ak inendet, ak kitogosta Kamuktaindet kobagakta Abraham. 23Ak kinam Abraham werinnyi Ismael, ak tugul che kigisikyin gonnyi, koboto tugul che kigiale fedaisiek, muren age tugul ne bo gotab Abraham, ak komuratan iririotab borwekwak eng’ betunoto, ko u ye kiga mwachi Kamuktaindet inendet. 24Ak kiga kotar Abraham kenyisiek tamanwogik sogol ak sogol, yoto ye kigimuratani inendet. 25Ak ki bo Ismael werinnyi kenyisiek taman ak somok, yoto ye kigimuratani. 26Kigiyatita betunoto Abraham ak werinnyi Ismael. 27Ak kigiyatita koboto inendet murenik tugul che bo gonnyi, agot icheget che kigisikyin gonnyi, ak che kigiale fedaisiek eng’ toek.
Currently Selected:
TAUNET 17: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
