TAUNET 19
19
Kotaachei Lot malaikaisiek aeng’ eng’ Sodom
1Kiit anyun malaikaisiechoto aeng’u Sodom koskoleny; ak kimi Lot ormarichetab Sodom: ak kigeer Lot ichek, kong’eet kotorokta, ak kong’uruk kot kotiiny togennyi ng’ony; 2ak kole, Kasaak ale, omosu, obwa anyun kiptainikyuk gotab otwogindeng’wong’, ak otebi kemouni komugul, ak oun kelyek, si osib ong’eetye, omuste. Ak kile ichek, Achicha, kitebe sang’ kemout komugul. 3Ak kiigaigai Lot mising’; kimasta anyun ichek koba gonnyi: ak kiyachi inendet igorta, kobeelji makatinik che ma kinde mermerek, si koam ichek. 4Ago ye kitomo koruiyo, kobwa bikab nganaset, bichoto bo Sodom, neranik koboto che osen, bik tugul che kibun komasta age tugul, kobwa koyiem got: 5ak kiguur Lot kolenji, Ngorjo bik che kabwa gong’ung’ kemouni? Imutwech kobwa sang’, si kobiit kenai ichek.
6Ak kimanda Lot kwo ole mi ichek eng’ kurgat, ak koger kurget. 7Ak kilenji, Asaak, che kitupche, amoyai sogornatani te ni. 8Ogeero, atinye tibik aeng’ che tom kotuiyo ak chi; ochamwa amutwak, si oyachi ko u ye ogeere: ago amoyachi kiy bichu; amu kagobwa gonnyu.
9Ak kile, Istege. Ak kole, Kitoondenjinech chichi, ago kaga machei koek kiruogindet: kimache anyun keyaun ne ya kosiir icheget. Ak kirieb mising’ ichek chichoto, noto ko Lot, ak korikyi kurget kolen kobut. 10Ak kiiyogoito eunekwak bichoto, kochuut Lot konyo go, ak koger kurget. 11Ak kibire koratet bichoto kimitei kurgetab got, che mengechen ak che eechen; agoi kong’etyo kocheng’ei kurget.
Keng’emei Sodom ak Gomora, ak kesoru Lot
12Ak koteebe bichoto Lot kolenji, Tos ta itinye alak? Ngo mi sandetab cheptang’ung’, ak weriguk, ak tibiguk, ak chi age tugul ne itinye ne mi nganaset; imut komanda eng’ olito. 13Amu kimache keng’em olito, amu kogoeet kateiyenywa eng’ taitab Jehovah; ak kagoyokwech Jehovah kebwa keng’em. 14Ak kimanda Lot, kwo kong’alal ak sanik che kiitun tibikyik, kolenji, Ong’eetye, oba eng’ olito; amu machei kong’em Jehovah nganasani. Ago ki u inendet eng’ sanichato chito ne urerenjin. 15Ak ye kingoeech, kochirji malaikaisiek Lot, kolenji, Ng’eet, imut kaing’ung’, ak tipchuguget aeng’ mitei yu; si ma kiwong’un amu tengektab nganasani 16Ago kiigagei: ak konam bichoto eut, ak eutab osotiondennyi, ak eunekab tibikyik aeng’; amu kirire Jehovah inendet: ak kiimaanda eng’ nganaset, ak kobagakta eng’ sang’. 17Ak ye kingo kagomaanda, kolenji, Mwei, soruge; amat igeer let, ametonone oldo tugul eng’ atebwoni; mwechi tulwet, si ma kiwong’un. 18Ak kilenji Lot, Achicha, kiptaiyandennyu: 19asain ale, kagonyor otwogindeng’ung’ chamet eng’ taing’ung’, ak kaites rireneng’ung’ bo ge ne kaiborua, amu kesoru sobondanyu; ago anyun, mamuchi amwechi tulwet, si manyorua nyalil, ak kogona ame: 20keer anyun-o, negit nganasani, mie amwechi, amu ming’in: Ee, chamwa amwechi (tos ma nganaset ne ming’in?) Si kosob sobondanyu. 21Ak kilenji, Kaagasun agobo ng’olyondonito agine, ale mang’eme awong’u nganasanato kaimwa. 22Chakte, mwechi oloto; amu mamuchi ayai kiy agoi iit oloto. Kigiguure Soar nganasanato amu noto.
23Kiga kochor asista ye kingoitei Lot Soar. 24Eng’ yoto anyun kotumji Jehovah Sodom ak Gomora koik che laldos ak mat che bunu Jehovah eng’ kipsengwet; 25ak king’em kobeel nganasochoto, ak atebwet komugul, ak bik tugul che kimenyei nganasochoto, ak tuguk tugul che bitos eng’ ng’ony. 26Ago kigusgong’ osotiotab Lot eng’ let, ak kiwalak koek tulwet ne ming’in ne bo munyuk. 27Ak king’eet Abraham karon komusta kwo agoi koit ole kitonone eng’ taitab Jehovah: 28ak kitobendo kogeerot olin bo Sodom ak Gomora, agot emet tugul ne bo atebwet, ak kigeer iyeto ne bo emet kotogostoi ko u iyeto ne bo mat ne o mising’.
29Ak kingo kagong’em Kamuktaindet nganasok che bo atebwet kowong’, kobwat anyun Kamuktaindet Abraham ak komaanda Lot komandae ng’emisiet, ye kingo kagong’em kowong’ nganasok, ole kimenyei Lot.
30Kitogosta anyun Lot kwo Soar, kwo komeny tulwet, koboto tibikyik aeng’; amu kiiywei komeny Soar; ak kimeny kebenet, inendet ak tibikyik aeng’. 31Kilenji anyun ne o ne ming’in, Kagoosit kwandanyo, ak mami mureno emet komugul ne imuchi korikyech ko u biteetab ng’ony komugul: 32nginage kwandanyo maiyek si kobiit keruiye ak inendet, si kerib iyotetab kwandanyo. 33Ak kiinaga kwandanywa maiyek kemounoto ak kiwa ne o kwo koruiyo ak kwandanyi, ak kima nai inendet ye kiruitos tuwai, anan ye king’eetei. 34Ak eng’ betut ne kiisubi noto, kolenji ne o ne ming’in, Keero, kogiruiye lagat ak baba: nginage maiyek kemouni bo ra kogeny; ak iwe inye oruiye tuwai, si kerib iyotetab kwandanyo. 35Ak kiinaga maiyek kwandanywa kogeny kemounoto: king’eet anyun ne ming’in, kwo koruiyo ak inendet ak kima nai inendet ye kiruitos tuwai, anan ye king’eetei. 36Kimanach anyun tibikab Lot tuwai komanage kwandanywa. 37Ak kisich ne o werit, ak kiguure kainennyi Moab: inendet ko kwandab Moabik agoi ra. 38Ak kisich ne ming’in agine werit, ak kiguure kainennyi Ben-ami: inendet ko kwandab Amonik agoi ra.
Currently Selected:
TAUNET 19: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
