JOHANA 20
20
Kererit ne kima komi kiy
1Kinyo kererit Maria Magdalene, karon, ko kairir emet, eng’ betut ne bo tai ne bo wigit, ak kogeer koita ko kageisto eng’ kererit. 2Kolabat kot koit ole mi Simon Petero, ak noto age ne bo alamalyet, ne kichamei Jesu inendet, ak kolenji ichek, Kageib Kiptaiyat eng’ kererit, ama kingen ole kaginde. 3Koba anyun Petero, ak nin age ne bo alamalyet, kotokyigei kererit. 4Kiruai tuwai kibagenge: ak kilabat nin age ne bo alamalyet kondoe Petero, ak kosib koit kererit; 5ak kingong’uruk kogeer orit, kogeer ngoroikab katanit ko itootin; ago mawa orit. 6Konyo anyun Simon Petero agine, kosubu inendet, ak kwo kererit orit; ak kogeer ngoroik che bo katanit ko itootin; 7ago anget ne kimitei metinnyi ko kima komi, koboto ngoroik che bo katanit, ago ki mamanat inegei eng’ oldo age. 8Kiwa orit agine noto age ne bo alamalyet ne kiga sib koit kererit, ak kigeer ak kiiyan. 9Amu kitom konai sirutiet ne kile, ng’eetei kogeny matiny eng’ che kibek. 10Koba ga anyun kogeny choto bo alamalyet.
Koborjingei Jesu Maria
11Ago kitononi Maria eng’ kererit sang’, korirei: ak ye kita korirei, kong’uruk koiit kererit; 12ak kigeer malaikaisiek aeng’ che leelach ngoroik kotebyei ng’ony, age eng’ ole bo metit, ak age eng’ ole bo kelyek, eng’ ole kimi bortab Jesu. 13Ak kilenji, Kobogoriondoni, kalya si irir? Kolenji, Amu kageib Kiptaiyandennyu, amangen ole kaginde inendet.
14Ak ye kingo kagomwa ko u noto, kowelelgei, kogeer Jesu kotononi, ama konai kole Jesu noto. 15Kolenji Jesu, Kobogoriondoni, kalya si irir? Icheng’e ng’o? Kiibwati kolen inendet ko ribindetab mbaret, ak kolenji, Kiptaiyandani, ngo kaiib inendet eng’ oli, imwawa ole kainde, si aib inendet. 16Kolenji Jesu, Maria. Kowelelgei, ak kolenji eng’ kutitab Hebranik, Rabboni; ye kiweech kele, Konetindoni. 17Kolenji Jesu, Ametwaa; amu tom atogosyi oldab Kwanda: ago ui ole mi tupchosiekyuk, ak ilenji, Atogosyini oldab Baba, ago Baba neng’wong’, Jehovah nenyu, ago Jehovah neng’wong’. 18Konyo Maria Magdalene kolenji alamalyet, Kaageer Kiptaiyat: ak kagomwachi tuguchu inendet.
Koborjingei Jesu alamalyet
19Ak ye kingoek lagat eng’ betunoto bo tai ne bo wigit, ye kiga keger kurgotik eng’ ole kimi alamalyet, amu kiiywei Yahudik, konyo Jesu kotonone kwenunywa ak kolenji, Ingoteb kalyet eng’ okwek. 20Ak ye kingo kagomwa nito, koborji eunekyik ak karastanyi. Koboiboitu anyun alamalyet, ye kingogeer Kiptaiyat. 21Kolenji Jesu anyun kogeny, Ingoteb kalyet eng’ okwek: ko u ye kiiyokwa Kwanda, ayoktook ak okwek ko u noto. 22Ak ye kingo kagomwa nito, kobusyi, ak kolenji, Otaach Tamirmiriet ne Tilil: 23bik alak tugul che onyochini kaat tengekwogikwak, kenyochin kaat; ak alak tugul che oesioi onyochi kaat, keesioi kenyochi kaat.
Koborjingei Jesu Tomas
24Ago kima komi Tomas ne kigiguure Didumo, ne ki age eng’ taman ak aeng’, koboto ichek ye kinyonei Jesu. 25Kolenji anyun chun alage che bo alamalyet, Kagegeer Kiptaiyat. Ago kilenji Tomas ichek, Ngot ko mageer eng’ eunekyik berutik che bo kipchumarisiek, ak ande mornennyu berutikab kipchumarisiek, ak ande eunnyu karastanyi, ko mayani.
26Ak kingobata betusiek sisiitu ko kimi go alamalyennyi kogeny, ak kimi Tomas koboto ichek. Kinyo anyun Jesu, ko kerotin kurgotik, ak kotonon eng’ kwenunywa, ak komwa kole, Ingoteb kalyet eng’ okwek. 27Kolenji Tomas, Iyogou morneng’ung’, ak igeer eunekyuk; ak iyogou eung’ung’ ak inde karastanyu; si meegu ne matinyei kayanet, ago iyan. 28Kowolji Tomas kolenji, Kiptaiyandennyu ak ko Jehovah nenyu. 29Kolenji Jesu inendet, Kaiyan amu kaigeera: iberurotin ichek che iyani ama keer.
Kit ne tokyingei Logoiywechu
30Kiyai Jesu kaborunoik alak che chang’ eng’ taitab alamalyet che ma sirotin eng’ bukuini: 31ago kigisir chu, si kobiit oyan ole Jesu ko Kristo, Weritab Jehovah; ak si kobiit ye oyani onyoru sobondo eng’ kainennyi.
Currently Selected:
JOHANA 20: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
