LIRAANGA 12

Khuli Abramu Yalaangwa

1Mwami Nyasaye yavoolela Abramu, “Rula mu shivala shioshio, mu viikho vovo, khandi mu inzu ya tata wowo, utsi mu shivala shia nzitsanga khukhumanyinya. 2Niitsa khukhuha vitsukhulu vanyishi, khandi valiitsa khuva luhia lwi tsingulu tsinyishi. Niitsa khukhukasitsa nu khulomba lira liolio khumanyikhana muno, khu nuve mundu uliitsa khukasitsa vandi. 3Niitsa khukasitsa yavo vakhukasitsanga, navutswa niitsa khulaama yavo vakhulaamanga. Niitsa khukasitsa vandu voosi mu shivala khuvirila khu yivi.”

4Nalwo lwa Abramu yasimukha natsia, khuli Mwami Nyasaye yali navooli akhole. Loti yasimukha naye. Abramu yarula mu litaala lia Harani nali ni mihika makhomi saba na chiranu. 5Abramu yavukula mukhali wewe Sarai, mwana wa amwavo wewe Loti, halala ni miandu chiosi nende varukwa voosi va vali nivanyola mu litaala lia Harani, nivatsia mu shivala shia Kanaani.

Lwa vinjila mu shivala shia Kanaani, 6Abramu yachenda nakhalakanyila mu shivala mwenomo, khutukha lwa yatukha khu musala ku museno kwa More, Havundu Hatakatifu mu litaala lia Shekemu. (Mumatukhu kenako, Vakanaani vali vamenya mu shivala shienesho.) 7Nalwo lwa Mwami Nyasaye yalolekha khu Abramu, namuvoolela, “Niitsa khuha vitsukhulu vovo shivala yishi.” Abramu yumbakha havundu henaho vwaali vu Mwami Nyasaye, wali ni yalolekha khuye. 8Matukhu mati nikakhavira, Abramu yasimukha natsia khuluveka luli ikuvanda wi shivala shi vikulu ivukwi wi litaala lia Betseli; yumbakha liheemo hakari ha mataala ka Betseli khuluveka luli imbo nende Ai khuluveka luli ivukwi. Abramu yumbakha hawenaho khandi vwaali vu Mwami Nyasaye, khandi nasaala khu Mwami Nyasaye. 9Khulwa yako, Abramu yatsililila nu luchendo lwelwe, lu khutsia khuluveka luli ikuvanda wi shivala shia Kanaani.

Khuli Abramu Yamenyanga mu Shivala shia Misri

10Mumatukhu kenako, khwali ni inzala mu shivala shienesho. Abramu yakholomokha natsia mu shivala shia Misri khumenyayo khumatukhu mati, shichila inzala yali indulu muno. 11Lwa Abramu yali nali himbi khwinjila mu shivala shia Misri, yavoolela mukhali wewe Sarai, “Uli mukhali wakaasa likoondo. 12Lwa Vamisri vakhulolakhu, valakanakana ndi uli mukhali wanje, vanyala khunziira niivi vakhuleshe. 13Vavoolele uli mbotso wanje, khu vambukuli vulahi khandi mbuli khwiirwa shichila yivi.” 14Lwa Abramu yatukha mu shivala shia Misri, Vamisri valola ndi mukhali wewe wakaasa likoondo. 15Lwa varumishi vu Mwami wa Misri valola mukhali mwenoyo, vamwitsominya imbeli wu Mwami wa Misri, nahilwa mu inzuyu vwami. 16Mwami wa Misri yalinda vulahi Abramu, shichila Sarai, khandi Mwami wa Misri naha Abramu makondi, tsimbuli, tsing'ombe, tsipunda, varukwa nende tsingamia.

17Navutswa Mwami Nyasaye yanyashitsa Mwami wa Misri nende vandu vi inzu yeye nu vulwale vutamanu muno, shichila Sarai, wali mukhali wa Abramu. 18Nalwo lwa Mwami wa Misri yaruma mundu khutsia khulaanga Abramu. Mwami wa Misri yamureeva, “Shichila shina numbukula munjila irio? Shichila shina wambakhane khumbolela nu mukhali wowo? 19Shichila shina numbolela ni mbotso wowo, khali nimukhola mukhali wanje? Mukhali wowo neye uyu; muvukule utsi!” 20Mwami wa Misri yavoolela vandu veve makhuva khulondokhana khu Abramu, nivamukhunga khurulaho, halala nu mukhali wewe nende miandu chiechie chiosi.

Currently Selected:

LIRAANGA 12: LLLPRO

Highlight

Copy