LIRAANGA 23
23
Sara Yakhutsa Yayeveelwa mu Shilindwa
1Sara yali watushitsa mihika imia indala makhomi kavili na saba; khandi nachio mihika chia Sara yamenyanga mu shivala. 2Sara yakhutsila havundu halaangwangwa Kiriatsi Aruba, nilili lira lindi li litaala lia Heburoni, mu shivala shia Kanaani. Aburahamu yatsiayo khwikhula Sara, niyakhutsa.
3Aburahamu yarula havundu ha mukhali wewe yali niyakhutsila, navoolela Vaahitse, 4“Inzi ndi vutswa mundu khurula mu vandu vuluhia lundi, wumenyanga mu munyi. Numuyaanza ngulitsilikhu mulimi, nzeveelemu mmbili ku mukhutsu wanje.”
5Vaahitse vachipa Aburahamu, 6“Mwami, uhulishitsi ka khuvoolanga. Khwakhuvukula khuli mwimilili wi tsingulu tsinyishi wumenyanga mu khutsi. Uyeveele mmbili ku mukhali wowo mu shilindwa shilahi muno, mu vilindwa via khuli navio hanu. Mundu avulakhuho mu khutsi unyala khwambakhana khukhuha shilindwa, inoho khukhwambakhanila khuyeveela mmbili ku mukhali wowo.”
7Khulwa yako, Aburahamu yasinjila niyinamila Vaahitse, vene shivala shienesho; 8navoola, “Niiva muli ni lienya liu khukhonya, khulondokhana khuli nzeveela mmbili ku mukhutsu wanje, nu vulahi mumbulishitsi. Ndeveli mundu ulaangwangwa Efuroni mwana wa Zohari, 9angulitsile luhangaywa lwali lwelwe, luli Makepela khundulu khu mulimi kwekwe. Muvooleli angulitsile vukuuli vwosi, vwa akanakananga khungulitsila, munyi numurelekhu vushiahidi, ave havundu hanyala khuyeveelanga mivili chia vakhutsu vaanje.”
10Efuroni yali wikhale mu vandu valala Vaahitse mu shikhaalo shia havundu hali himbi mu shilivwa shi litaala; yachipa Aburahamu, 11“Mwami wanje, shikaliitsa khuva kario tawe. Mbulishitsa; khuheetsanga mulimi yuku kwosi, khali luhangaywa luli mu mulimi yuku. Khuheetsanga imbeli wa vandu vaanje, nivalolanga. Yeveela mmbili ku mukhutsu wowo.”
12Navutswa Aburahamu yinamila vandu vene shivala shienesho; 13navoolela Efuroni imbeli wa vandu voosi, “Nuyaanza mbulishitsa -- lekha khuhe murungu ku mulimi. Nuyaanza uhuchilile murungu kwa khuheetsanga; naho ha niitsa khuyeveela mmbili ku mukhutsu wanje.”
14Efuroni yachipa Aburahamu, 15“Mwami wanje, mbulishitsa. Mulimi kwanje kuli nu vukuuli ifetsa vitonye tsimia tsine, navutswa vukuuli vwenovo ni shina hakari hanje nende hoho? Yeveela mmbili ku mukhutsu wowo mu mulimi yuku.” 16Aburahamu yahuchilila vukuuli vwa Efuroni yali namuvoolele, namuvalitsila ifetsa vitonye tsimia tsine imbeli wa Vaahitse voosi, khulondokhana khu shipimu shiatoto shia vandu vakholanga vukhala varumishilanga mumatukhu kenako.
17Khulwa yako, mulimi kuli Makepela kwali kwa Efuroni khuluveka luli ivukwi wa Mamure -- mulimi nende luhangaywa lwalimu, misala chiosi chiali nichili havundu henaho hosi chiamanya nichikwa 18munjila inunji chia Aburahamu, imbeli wa Vaahitse voosi mu shikhaalo shiali ha shilivwa shi litaala lienelo.
19Nikamali khwikholekha kario, Aburahamu yamanya nayeveela mmbili ku mukhali wewe Sara muluhangaywa lu mu mulimi kuli Makepela khuluveka luli ivukwi wa Mamure (Lira lindi ni Heburoni), litaala liu mu shivala shia Kanaani. 20Lwa mulimi kwakuulwa khurula khu Vaahitse, mulimi kwenoko nende luhangaywa lulimu, lwamanya nuluva havundu ha Aburahamu, anyala khuyeveelanga mivili chia vakhutsu veve.
Currently Selected:
LIRAANGA 23: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
