YOHANA 10
10
Lukanu khu Mwayi wa Makondi
1Yesu yavoola, “Muvoolelanga kilikali ndi mundu winjilanga mushiko shia makondi nakhavirili mu shilivwa, navutswa khwinjilila havundu handi vuchila khuvirila mu shilivwa, ni shihuuvi khandi nu munuuli. 2Navutswa mundu winjilanga mushiko shia makondi khuvirila mu shilivwa neye mwayi wa makondi. 3Mulindi wi shilivwa amwikulilanga shilivwa; ma makondi kahulila mwoyo kwekwe. Alaanganga shia likondi lira, khandi akarulitsa ilwanyi. 4Lwa avetsanga namali khurulitsa makondi keke koosi ilwanyi, akimililanga, ma makondi keke kenako kamulonda, shichila kamanya mwoyo kwekwe. 5Navutswa makondi shikanyala khulonda mundu wundi wakakhamanyi tawe; kanyala khumwilukha, shichila shikamanyi mwoyo ku mundu wundi mwenoyo tawe.”
6Yesu yavoolela Vafarisayo lukanu yulu, navutswa vakorwa khumanya ka yali navoolanga.
Yesu nu Mwayi Mulahi wa Makondi
7Khulwa yako, Yesu yavoola khandi, “Muvoolelanga kilikali ndi ninzi shilivwa shia makondi kavirilamu. 8Vandu vandi voosi vitsa imbeli wanje, nishili khwitsa ni vihuuvi khandi ni vanuuli; navutswa makondi shikali ka vahulishitsa tawe. 9Ninzi shilivwa; niiva mundu aliitsa khwinjila khuvirila mwinzi, mundu mwenoyo aliitsa khuhonyinywa. Aliitsa khwinjilamu, nu khurula ilwanyi manyole vwayilu. 10Shihuuvi shitsanga vutswa khuhuuva, khwiira nu khutivitsa. Inzi namala khwitsa khu vanyole vulamu, khandi vavunyole mu vunyishi.
11“Ninzi mwayi mulahi. Mwayi mulahi akhutsilanga makondi keke. 12Mundu usamulitswi khwaya makondi shiali mwayi mwene makondi tawe. Lwa alolanga shihulukhu nishitsa, alekhanga inyuma makondi yilukha. Nalwo lwa shihulukhu shikwananga makondi; khandi kasalana. 13Mundu mwenyoyo yilukhanga, shichila avetsanga wasamulitswa khwaya makondi khandi shiaheendelakhu makondi kenako mwoyo tawe. 14Ninzi mwayi mulahi; namanya makondi kaanje, khandi makondi kaanje kamanya inzi -- 15khuli lwa Tata yamanya, ninzi namanya Tata; nakhutsa shichila makondi kaanje. 16Ndi khandi na makondi kandi, navutswa shikali ku mushiko shia makondi yishi tawe. Niitsa khulera khandi makondi kenako. Khali ko kaliitsa khuhulishitsa mwoyo kwanje. Nalwo lwa kaliitsa khuva shiayo shilala shia makondi khandi nu mwayi mulala.
17“Tata wanyanza shichila nayirulitsa khukhutsa, khu mbe mwoyo khandi. 18Mundu avulakhuho unyala khurulitsa mwinzi vulamu vwanje. Navutswa inzi mwene nayirulitsa khukhutsa shichila lienya lianje. Ndi nu vunyali vu khukhutsa; khali vunyali vu khuva mwoyo. Yaka nako ka Tata wanje yambolela khole.”
19Vayahudi vavukhana mu tsinganakani khandi, shichila makhuva ka Yesu yavoola kenako. 20Vandu vanyishi khuvo vavoola, “Litimoni lili muye; khandi ukwili mulalu. Shichila shina khutsililile khumuhulishitsa?”
21Navutswa valala khu vandu venavo vavoola, “Mundu wi litimoni lili muye shianyala khulomoloma khuli ye alomolomanga tawe! Toto, litimoni linyala khuhonyinya vandu vavekhula?”
Yesu Yambakhanwa
22Kali matukhu ku vushindu; khandi Mulukha Kukhutakasa Litempeli kwali nu kwikhoyelwa mu Yerusalemi. 23Yesu yali nachenda chendanga mu Litempeli havundu halaangwangwa Lusimbu lwa Solomoni. 24Vayahudi vivunjelitsa himbi ha yali nali, nivamureeva, “Wenyanga khumenye nu khuhaya hayanga khuluhono shina? Niiva uli Masiha, khuvoolele katoto kene havulavu.”
25Yesu yavachipa, “Mbele nimuvoolele khale; navutswa mwa yambakhana khusuuvila. Vikholwa viakholanga khuvirila mu lira lia Tata wanje vihaananga vushiahidi khulondokhana khwinzi; 26navutswa mwambakhananga khusuuvila, shichila shiumuli makondi kaanje tawe. 27Makondi kaanje kahulishitsanga mwoyo kwanje. Inzi nakamanya, nako kanondanga. 28Kaheetsanga vulamu vwi mihika ni mihika; khandi shikanyala khukhutsa tawe. Mundu avulakhuho unyala khunuula makondi kenako. 29Tata wanje wamba makondi kenako, ali nu vunyali khuvira voosi; mundu avulakhuho unyala khunuula Tata wanje makondi kenako. 30Inzi nende Tata wanje khuli shilala.”
31Vayahudi vatola khandi machina valese Yesu. 32Yesu yavavoolela, “Namala khumumanyinyakhu viloleshitsu vinyishi viu khuchenyinya khurula khu Tata wanje. Ni shiloleshitsu shina khurula khu viloleshitsu vienevo shichilanga nu mwenya khundesa na machina?”
33Vayahudi vachipa Yesu, “Shikali khwenyanga khukhulesa na machina, shichila shiloleshitsu shilala shia wakhola khuvio tawe; navutswa shichila unyekanga Nyasaye; khandi lwa yivi uli mundu vutswa, wikholanga khuva Nyasaye.”
34Yesu yavachipa, “Kahandikwa mu Malako kenyu vene ndi Nyasaye yavoola, ‘Munyi muli vanyasaye.’ 35Khwamanya ndi ka Mahandiko Matakatifu kavoolanga ni katoto mihika ni mihika; khandi Nyasaye yalaanga vandu venavo vanyasaye, vandu vilwatsilwa likhuva lielie. 36Khulondokhana khwinzi, Tata yandovola nanduma mu shivala. Khulwa yako, munyala khuvoola munjila shina inzi nyekananga, lwa mboli ninzi Mwana wa Nyasaye? 37Leshi khusuuvila mwinzi, niiva shikholanga vindu via Tata wanje yenyanga khole tawe. 38Navutswa niiva kholanga vindu vienevo, khali niiva mwayambakhana khusuuvila mwinzi, musuuvile mu vikholwa vianje viakholanga, khu mumanye ndi Tata ali mwinzi, ninzi ndi mu Tata.”
39Vayahudi vachelitsa khandi khukumila Yesu, navutswa yatsunukha mu makhono kavo.
40Khulwa yako, Yesu yakalukha niyambukha Muchela kwa Yorodani khutsia havundu ha Yohana yabatisilakhu vandu. Yamenya havundu henaho. 41Vandu vanyishi vasimukha nivatsia khu Yesu; nivavoola, “Yohana Mubatisi shiyakholakhu viloleshitsu tawe; navutswa shia shindu shiosi shia Yohana yalomoloma khulondokhana khu mundu uyu ni shiatoto.” 42Vandu vanyishi havundu henaho vasuuvila mu Yesu.
Currently Selected:
YOHANA 10: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
