YOHANA 5

Lihonyinywa lia ha Litavalia

1Matukhu mati nikakhavira, Yesu yatikulukha natsia Yerusalemi khwikhoyela mulukha kwa Vayahudi. 2Khwali ni litavalia lia matsi mu Yerusalemi mwenomo himbi ha Shilivwa shia Makondi, liali liatiilwa ni tsirilu tsiranu, lira lindi Muluhebrania ni Betsezatsa. 3Shituma shikali shia vandu vali nivalwala, vavekhu, valeme nende vafwokoya vamenyanga mu tsirilu tsienetso, [nivalindililanga matsi kalenjele, 4shichila shia khase khosi, injelosi yu Mwami Nyasaye yatsitsanga ha litavalia lia matsi khutuvulanyinya matsi. Mulwale wu khuraanga witumbulanga mu matsi kenako ni kakhatuvukha yahonanga khurula mu vulwale vwevwe vwosi.]#5:4 Mahandiko matakatifu kandi kakhale kavula tsimbaso 3b-4. 5Khwali nu mundu ha litavalia henaho wali niyalwala vulwale khumihika makhomi kavaka na munane. 6Yesu yamulola nakoniho, namanya ndi nu mundu wali niyalwala khumihika minyishi. Yamureeva, “Wenyanga uhone?”

7Mundu wali niyalwala mwenoyo yamuvoolela, “Mwami, mbulakhu mundu hanu unyala khumbila mu litavalia lia matsi yili, lwa matsi kavetsanga ni kakhatuvulwa. Lwa njelitsanga khukwamu, mundu wundi aranganga khwitumbulamu imbeli wanje nishili.”

8Yesu yamuvoolela, “Sinjila! Vukula shiseelo shioshio, uchende.” 9Mundu wali niyalwala mwenoyo yahona vwangu. Yavukula shiseelo shieshie naraanga khuchenda.

Makhuva kenako kikholekha khulitukhu li Lisabato. 10Khulwa yako, vimilili va Vayahudi vavoolela mundu wali nahonyinywi, “Litukhu linu ni li Lisabato. Malako keru shikahuchililanga uchinji shiseelo shioshio tawe.” 11Navutswa mundu mwenoyo yavachipa, “Mundu umbonyinyi ambolele, ‘Vukula shiseelo shioshio, uchende.’ ”

12Vamureeva, “Nu mundu shina wakhuvoolela, ‘Vukula shiseelo shioshio, ma usimushi utsi?’ ”

13Navutswa mundu wali nahonyinywi shiyali namanyi mundu wali namuhonyinyi tawe; shichila Yesu yali uruli havundu henaho, khandi shituma shikali shia vandu shialiho.

14Matukhu mati nikakhavira, Yesu yanyola mundu mwenoyo mu Litempeli, namuvoolela, “Lola! Uhoni nunundi. Lekhana nu vwoni, khu shindu shitamanu shindi shivuli khukhukwila.”

15Khulwa yako, mundu mwenoyo yarulaho natsia khuvoolela vimilili va Vayahudi ndi Yesu neye wali namuhonyinyi. 16Vimilili va Vayahudi varaanga khutambitsa Yesu, shichila yakhola shikholwa shienesho khulitukhu li Lisabato. 17Yesu yavavoolela, “Tata wanje wamenya shia khase khosi nahinzilanga khali khutukha nunundi; khali inzi mbinzilanga khandi.”

18Nashio shivune shiachila Vayahudi nivakhava khuli vanyala khumwiira, shikali shichila yameneka Malako ki litukhu li Lisabato konyene tawe; navutswa yali uvooli khandi ndi Nyasaye ni Tata wewe, khwilekhanyinya mwene khu Nyasaye.

Vunyali vu Mwana wa Nyasaye

19Yesu yavavoolela, “Muvoolelanga toto ndi Mwana avulakhu vunyali vu khukhola shindu shiosi khuvirila khu tsingulu tsietsie mwene; navutswa anyala khukhola shindu shialolanga Tata wewe nakhola shionyene; shichila shia shindu shiosi shia Tata akholanga, nashio khandi shiu Mwana akholanga. 20Tata wayaanza Mwana; khandi amumanyinyanga shia shindu shiosi shia ye mwene akholanga. Aliitsa khumumanyinya khali vindu vikali viene viu khukhola khuvira yivi, khu voosi muliva nilichenya. 21Khuli lwa Tata yisimushitsanga vandu vakhutsa khurula mu likhutsa, avaha vulamu, nindio khandi Mwana aheetsanga vandu vayaanzitswangwa navo vulamu. 22Tata shiakhalachilanga mundu tawe; navutswa waha Mwana wewe vunyali vwosi vukhukhalachila vandu, 23khu, voosi vahe Mwana luyali, munjila indala yene khuli vaheetsanga Tata luyali. Mundu wambakhananga khuha Mwana luyali, shiaheetsanga Tata wamuruma luyali tawe.

24“Muvoolelanga toto ndi mundu uhulilanga likhuva lianje, khandi asuuvila mu woyo wanduma, ali nu vulamu vwi mihika ni mihika. Mundu khuli mwenoyo shialiitsa khukhalachilwa tawe; navutswa wanyola vulamu shichila wakuura likhutsa. 25Muvoolelanga toto ndi isaa iliitsa khutukha khali yatukha khale, lwa vandu vakhutsa khale valiitsa khuhulila mwoyo ku Mwana wa Nyasaye; khandi yavo valiitsa khukuhulila valiitsa khutsililila khuva mwoyo. 26Khuli lwa Tata ali nu vulamu muye mwene, munjila indala yeneyo, walomba Mwana wewe khuva nu vulamu muye mwene. 27Tata waha Mwana vunyali vu khukhalachila vandu, shichila neye Mwana wu Mundu. 28Makhuva yaka kakhamuchenyinyi tawe; shichila isaa iliitsa khutukha lwa vandu vakhutsa voosi valiitsa khuhulila mwoyo kwekwe 29nu khurula mu vilindwa viavo: yavo vali nivakhola malahi valiitsa khwisimukha khurula mu likhutsa khandi vatsililile khuva mwoyo. Navutswa yavo vali nivakhola vindu vitamanu, valiitsa khwisimukha khurula mu likhutsa vakhalachilwi.

Vandu Vahaana Vushiahidi khu Yesu

30“Mbulakhu shianyala khukhola mwene khuvirila khu vunyali vwanje. Khalachilanga vandu khulondokhana khuli Tata ambolelanga. Khalachilanga vandu munjila yu vulunji, shichila shinjelitsanga khukhola ka inzi mwene nzikombanga khukhola tawe; navutswa lienya lwa woyo wanduma yenyanga nonde.

31“Niiva nyala khuhaana vushiahidi khulondokhana khwinzi mwene, vushiahidi vwanje shiuvuli vwatoto tawe. 32Navutswa khuliho nu wundi umbanilanga vushiahidi; khandi ndi ni limanya ndi avoolanga katoto khulondokhana khwinzi. 33Waruma likhuva khu Yohana, nahaana vushiahidi khulondokhana khu katoto. 34Shimbuchililanga vushiahidi vwa vandu tawe; navutswa mbolanga makhuva yaka khumuhonyinywi. 35Yohana yali khuli itaaha yakhanga nikholitsa vulavu, khandi mwikhoyela mu vulavu vwevwe khumatukhu mati. 36Navutswa vushiahidi vwandi navwo khwinzi mwene nu vu vunyali muno khuvira vwa Yohana; shichila mihinzilu milala miele chia Tata yenyanga mbe ninarweshitsa, nichili nachio chiakholanga, chihaananga vushiahidi havulavu ndi Tata neye wanduma. 37Tata wanduma neye uhaananga mwene vushiahidi khwinzi. Mushili khuhulilakhu mwoyo kwekwe, inoho khulolakhu khuli asasanga khali hatititi hene; 38khandi likhuva lielie shikali lili mu mioyo chienyu tawe; shichila mwa yambakhana khusuuvila mu woyo wa yaruma. 39Musomanga shia shindu shiosi mu Mahandiko Matakatifu, shichila mukanakananga ndi lwa mukasomanga munyala khunyola vulamu vwi mihika ni mihika. Mahandiko Matakatifu nako kahaananga vushiahidi khwinzi! 40Navutswa khali ndio, mwa yambakhana khwitsa khwinzi khu munyole vulamu.

41“Shindi ni lienya lia vandu khunzitsominya tawe. 42Navutswa namanya khuli lwa muli. Khali namanya shiumwayaanza Nyasaye mu mioyo chienyu tawe. 43Namala khwitsa khuvirila mu vunyali vwa Tata wanje, navutswa mwa yambakhana khunzinjilitsa. Nikhali, niiva mundu wundi anyala khwitsa khuvirila mu vunyali vwevwe mwene, neye wa munyala khwinjilitsa. 44Munyala khusuuvila munjila shina niiva munyala khwenya vandi vamwitsominye, navutswa shiumuchelitsanga khunyola litsominywa khurula khu Nyasaye wonyene tawe? 45Muvuli khuva ninganakani ndi ninzi wa nimuyaale khu Tata. Musa neye uliitsa khumuyaala, shichila neye wa mwavikhamu lisuuvilitswa lienyu. 46Niiva ni kilikali mwali mwasuuvila Musa, mwakhasuuvili inzi, shichila yahandika makhuva khulondokhana khwinzi. 47Navutswa niiva mwayambakhana khusuuvila mu ka yahandika, munyala khusuuvila munjila shina makhuva kambolanga?”

Currently Selected:

YOHANA 5: LLLPRO

Highlight

Copy