LUKA 18
18
Lukanu khu Mukhutsakhali nende Mukhalachi
1Yesu yavoolela veechi veve lukanu yulu khuveechitsa ndi shia khase khosi khutukha vasaale vuchila khukhutsa mwoyo. 2Yavoola, “Mu litaala lindi, khwalimu nu mukhalachi wali niyambakhana khuria Nyasaye inoho khuha vandu luyali; 3khandi khwaliho nu mukhutsakhali mu litaala lienelo wali niyamenya natsitsanga khuye khumureeva nayaanza amukhonye, ‘Kholela katoto khu vatsiku vaanje.’ 4Mukhalachi mwenoyo yambakhana khumukhonya khumatukhu manyishi; navutswa lukhumalilikha yireevana mwene, ‘Khali niiva shinaria Nyasaye inoho shimbetsanga vandu luyali tawe, 5nikhali, shichila mukhutsakhali uyu anyashitsanga, niitsa khumukholela katoto khu vatsiku veve. Niiva shinyala khumukholela ndio tawe, alasinya shichila khutsililila khwitsa khwekhwe!’ ”
6Nalwo lwa Mwami yavoola, “Hulishitsi khuli mukhalachi mutamanu mwenoyo yavoola. 7Nyasaye shialiitsa khukholela vandu veve vayarovola katoto, nivali yavo vamulililanga mbasu nu vutukhu? Aliitsa khuvula khuvukula luhono khuvakhonya! 8Muvoolelanga, aliitsa khuvakholela katoto khandi akakhole vwangu. Navutswa lwa Mwana wu Mundu aliitsa khwitsa, kanyala khuva ni kilikali aliitsa khunyola vandu khulilova nivali ni lisuuvila?”
Lukanu khu Mufarisayo nende Musololi wu Vushuru
9Yesu yavoola lukanu yulu khandi khu vandu valala vikhola kholitsanga khuva valunji nu khuchaya vandi. 10“Litukhu lindi, vandu vavili vasimukha nivatsia mu Litempeli khusaala: mulala khuvo yali Mufarisayo, na wundi musololi wu vushuru.
11“Mufarisayo yasinjila haluveka nasaala, ‘Nyasaye, khusanditsanga shichila shindi khuli vandu vu vung'wang'wa, vambakhananga khukhola katoto, vaheeyi, inoho khuli musololi wu vushuru uyu tawe. 12Mbonganga vuchila khulia hali khavili khulisitsa; khandi khuha likhomi khurula khu vindu viosi vianyolanga khuli murungu kwanje.’
13“Navutswa musololi wu vushuru yasinjila ihale wene niyambakhana khuheenzakhu mwikulu, navutswa yatuuya khu shiliru shieshie, navoola, ‘Nyasaye, ndolela tsimbavasi shichila ndi mundu mwoni!’ 14Muvoolelanga ndi musololi wu vushuru yakalukha ingo wewe nakholelwi khuva wi likhola liu vulunji khuvira Mufarisayo woyo; shichila mundu wikalihitsanga mwene khuvira vandi, aliitsa khuchehitswa, navutswa mundu wichehitsanga mwene, aliitsa khukalihitswa.”
Khuli Yesu Yakasitsa Vaana Vatititi
(Mat 19:13-15; Mk 10:13-16)
15Vandu valala valera vaana vatititi vavo khu Yesu avavishikhu makhono keke. Veechi vavalola ni vavakondeshela khukhola ndio, 16navutswa Yesu yalaanga vaana venavo khwitsa khuye, navoola, “Leshi vaana vatititi vitsi khwinzi, khandi muvuli khuvakaya, shichila Vwami vwa Nyasaye nu vwa vandu khuli yava. 17Muvoolelanga kilikali ndi mundu uliitsa khuvula khunyola Vwami vwa Nyasaye khuli mwana mutititi, aliitsa khuvula khwinjilamu.”
Vuhinda nende Vwami vwa Nyasaye
(Mat 19:16-30; Mk 10:17-31)
18Mwimilili mulala Muyahudi yareeva Yesu, “Mwechitsi Mulahi, ni shina shianyala khukhola khunyole vulamu vwi mihika ni mihika?”
19Khulwa yako, Yesu yamureeva, “Shichila shina unaanganga mulahi? Mundu avulakhuho mulahi nikakhali Nyasaye wonyene. 20Wamanya malako yaka, ‘Uvuli khuheeya; uvuli khwiira; uvuli khuhuuva; uvuli khwichishilakhu vandi; khandi uhe tata wowo nende mama wowo luyali.’ ”
21Mundu mwenoyo yachipa, “Khurula nindi muvukha, nalondanga malako yaka koosi.”
22Lwa Yesu yahulila ndio, yamuvoolela, “Ni shindu shilala shia wenyekhanga ukhole. Kuulitsa vindu viuli navio viosi uhe vamanani tsisenti tsienetso; na ulava ni livishilu mwikulu; ma witsi unonde.” 23Navutswa lwa mundu mwenoyo yahulila ndio, yavelela muno, shichila yali mundu wi miandu minyishi.
24Yesu yamuheenza navoola, “Nu vutiinyu muno khu vandu vahinda khwinjila mu Vwami vwa Nyasaye! 25Nu vutoro muno khu ingamia khwinjila munduhu yisindani khuvira mundu muhinda khwinjila mu Vwami vwa Nyasaye.”
26Yavo vahulila ndio vareeva, “Ni viina unyala khuhonyinywa?”
27Navutswa Yesu yachipa, “Ka mundu anyala khuvula khunyala, kanyala khunyalikha khu Nyasaye.”
28Navutswa Petro yavoola, “Lola, khwamala khulekha tsinzu tsieru, ma khwakhulonda.”
29Yesu yavavoolela, “Muvoolelanga katoto ndi mundu wosi walekha inzu yeye inoho mukhali wewe inoho vamwavo veve inoho tata inoho mama wewe inoho vaana veve, shichila Vwami vwa Nyasaye, 30aliitsa khunyola vindu mu vunyishi muno mumatukhu kanu, khandi mumatukhu kaliitsa khuvaho vulamu vwi mihika ni mihika.”
Yesu Yalomoloma lwa Khavaka khu Likhutsa Lielie nende Lisimushitswa
(Mat 20:17-19; Mk 10:32-34)
31Yesu yavukula veechi likhomi na vavili navahila haluveka, navavoolela, “Hulishitsi! Khutikulukhanga nu khutsia Yerusalemi, khandi shia shindu shiosi shiahandikwa na vaprofeti khulondokhana khu Mwana wu Mundu shilitsa khurweshitswa. 32Aliitsa khuhaanwa khu vandu vi tsimbia tsindi. Valiitsa khumukholela shihenye henye, vamunyeche khandi vamusutsili maree. 33Valiitsa khumushuta ni shivoko nu khumwiira, navutswa matukhu kavaka nikakhavira, aliitsa khwisimushitswa khurula mu likhutsa.”
34Navutswa veechi shivali vamanyikhu khali shindu shiosi khulondokhana khu vindu vienevo tawe. Vaviswa shivune shia makhuva kenako; khandi vakorwa khumanya ka Yesu yali nalomolomanga khulondokhanakhu.
Yesu Yahonyinya Muvekhu Musavisavi
(Mat 20:29-34; Mk 10:46-52)
35Lwa Yesu yali nali himbi khutukha mu litaala lia Yeriko, mundu muvekhu yali niyikhale khundulu khu muhaanda nasava savanga. 36Lwa mundu mwenoyo yahulila shituma shia vandu nivaviranga, yareeva shikholekhanga.
37Vamuvoolela, “Yesu wa Nazareti avirilanga hanu.” 38Yalaanjilila nu mwoyo mukali navoola, “Yesu! Mwana wa Daudi!#18:38 Mwana wa Daudi: khwivaala khwa Vayahudi khulaanga “Masiha.” Mbelela tsimbavasi!”
39Navutswa vandu voosi vali nivali imbeli vamukondeshela, khandi nivamuvoolela ahonjele; navutswa yatsililila khulaanjilila ikulu muno, navoola, “Mwana wa Daudi! Mbelela tsimbavasi!”
40Yesu yasinjila navoola vamulerele mundu mwenoyo; navutswa lwa yisuunda himbi, Yesu yamureeva, 41“Ni shina shia wenyanga khukholele?” Yachipa, “Mwami, nyenyanga tsimoni tsianje tsilole khandi.”
42Yesu yamuvoolela, “Lola! Lisuuvila liolio limali khukhuhonyinya.”
43Mundu mwenoyo yalola vwangu; nalonda Yesu, nasanditsanga Nyasaye. Lwa shituma shia vandu valola ndio, voosi vitsominya Nyasaye.
Currently Selected:
LUKA 18: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
