LUKA 21

Shihanwa shiu Mukhutsakhali Yahaana

(Mk 12:41-44)

1Yesu yaheenza iyi neyo, nalola vandu vahinda nivalakhulanga vihanwa viavo mu livishilu li litempeli; 2khandi nalola mukhali mulala mukhutsakhali mumanani nalakhulamu tsisenti tsivili. 3Yesu yavoola, “Muvoolelanga katoto ndi mukhutsakhali mumanani uyu ulakhulimu mu vunyishi khuvira vandu vandi voosi. 4Vandu vandi vahaani vihanwa viavo khurula mu vunyishi vwi miandu chia vali nachio; navutswa mukhali uyu, mu vumanani vwevwe, uhaani shiosi shiavele nashio shivele shimukhonye mu limenya lielie.”

Yesu Yalomoloma khuli Litempeli Lipomolwa

(Mat 24:1-2; Mk 13:1-2)

5Valala khu veechi va Yesu vali nivalomolomanga makhuva khulondokhana khu Litempeli; khuli liumbakhwa liakasa muno na machina malahi khandi vihanwa via vahaananga khu Nyasaye. Yesu yavoola, 6“Vindu viosi viamulolanga yivi, matukhu kaliitsa khutukha lwa lichina khali lilala shililiitsa khurikalakhu mu makono kalio tawe; koosi kaliitsa khusiuvwa hasi.”

Vutiinyu nende Litambitswa

(Mat 24:3-14; Mk 13:3-13)

7Vamureeva khandi, “Mwechitsi, yaka kaliitsa khwikholekha inyinga shina; khandi ni shina shiliitsa khuva shimanyilu kali himbi khwikholekha?”

8Yesu yavachipa, “Muve vacheli; muvuli khukaatwa nu mundu wosi. Vandu vanyishi valiitsa khwitsa khuvirila mu lira lianje, nivavoola, ‘Ninzi ye!’ khandi, ‘Matukhu kamali khutukha!’ Mukhavalondi tawe. 9Lwa muhulila maahe khandi makhuva nikamonywa khulondokhana khu liihe, muvuli khuria. Vindu khuli vienevo vilaranga khwikholekha; navutswa shishili shimanylu shimanyinyanga matukhu kukhumalilikha kali himbi khutukha tawe.”

10Yesu yatsililila khuvavoolela, “Vivala viliitsa khukwana vivala vindi; khandi vwami vuliitsa khwinjilila vwami vundi; 11shivala shiliitsa khutechela vutamanu muno, inzala iliitsa khuva shia havundu hosi nende vulwale; khuliitsa khuva ni vindu vicheni khandi viu khutechelitsa nivitsanga khurula mwikulu. 12Navutswa vindu vienevo viosi nivishili khwikholekha, muliitsa khukumilwa nu khutambitswa; muliitsa khuhaanwa khuyaalilwa mu masinagogi mamuvohwi mucheela; muliitsa khuhilwa imbeli wa vami nende vamihi shichila lira lianje. 13Yuvu navwo vuliitsa khuva vwiyangu vwenyu vu khwilwatsa Ivanjeli. 14Mulombe tsinganakani tsienyu isaa nishili khutukha khandi muvuli khuheenda mwoyo khulondokhana khu ka namuvoole khwishinga vene; 15shichila niitsa khumuha makhuva nende vusitsa, vwa khali mulala khu vatsiku venyu akhanyala khwambakhana inoho khukalukhanyinya kamuvoolanga khuva ku vuvehi tawe. 16Muliitsa khutsamwa khali na vivuli venyu, vamwavo venyu, viikho venyu nende valina; khandi valiitsa khwiira valala khu munyi; 17vandu voosi valiitsa khumuhima shichila inzi. 18Navutswa khali liswi khurula khu mirwi chienyu liliitsa khuvula khukora. 19Muve vitsumishitsi, khu mulihonyinywa.

Yesu Yalomoloma khu Litivitswa lia Yerusalemi

(Mat 24:15-21; Mk 13:14-19)

20“Navutswa lwa muliitsa khulola litaala likali lia Yerusalemi nilivotokhanilwi na vasikali, nalwo lwa muliitsa khumanya ndi khutivitswa khwalio khumali khutukha. 21Nalwo lwa muliitsa khulekha yavo vali mu lusomo lwa Yudeya vilushili mu vikulu; yavo vali mu litaala likali khurulamu; khandi yavo vali ilwanyi valivula khutsiakhu mu litaala likali; 22shichila kaliitsa khuva ‘Matukhu ku khusalilitswa,’ khurweshitsa koosi kahandikwa mu Mahandiko Matakatifu. 23Vuliitsa khuva vutiinyu muno mumatukhu kenako khu vakhali vaheelitsa khandi khu vakhali vanunyinyanga vaana vatoro! Shichila linyakhana litamanu liliitsa khuva linyishi mu shivala shinu; khandi Nyasaye aliitsa khusalilitsa vandu yava. 24Vandu valala valiitsa khwiirwa ni shivavi; khandi vandi valiitsa khuvukulwa khuli vavohe khuhilwa mu vivala viosi; ma litaala likali lia Yerusalemi lilikuurwa na vandu vi tsimbia tsindi, khutukha lwa matukhu ka vandu vi tsimbia tsindi kaliitsa khurweshitswa.

Khukalukha khu Mwana wu Mundu

(Mat 24:29-31; Mk 13:24-27)

25“Khuliitsa khuva ni vindu viu khuchenyinya nivikholekhanga khu liuva, mweli, nende tsinyining'ini. Vandu vu mu vivala viosi valiitsa khuheenda mwoyo, valiitsa khuria shichila khuhilikana khwi inyanza nende maruundu mu inyanza. 26Vandu valiitsa khushinda shichila vuri lwa valiitsa khuva nivalindililanga kaliitsa khwikholekha shia havundu hosi khulilova; shichila tsingulu tsiu mwikulu tsiliitsa khunuyanyinywa khurula mu makono katsio. 27Mwana wu Mundu aliitsa khulolekha, khuvirila mu malesi ni tsingulu tsinyishi nende vukhumi. 28Lwa vindu vienevo viranga khwikholekha, sinjili mulindilile, shichila muli himbi khuhonyinywa.”

Liechitso khu Musala ku Mukhuyu

(Mat 24:32-35; Mk 13:28-31)

29Nalwo lwa Yesu yavavoolela lukanu yulu: “Kanakanikhu shindu khulondokhana khu musala ku mukhuyu nende misala chindi chiosi; 30lwa masambu kachio karaanganga khulolekha, nalwo lwa mumanyanga ndi matukhu ki shimiyu kali himbi khutukha. 31Munjila indala yeneyo, lwa muliitsa khulola vindu vienevo nivikholekhanga, nalwo lwa muliitsa khumanya ndi vwami vwa Nyasaye vuli himbi khwitsa.

32“Musuuvilitsanga ndi vindu vienevo viosi viliitsa khwikholekha, vandu voosi vashili mwoyo nunundi nivashili khukhutsa. 33Likulu nende lilova viliitsa khurulaho, navutswa makhuva kaanje shikaliitsa khurulaho tawe.

Shiheeli Shilatukha Vuchila Khumanya

34“Muve vacheli! Muleshe khulitohitswa khukorela mu milukha chi lilia linyishi, mulitanda khandi khuheenda mwoyo, shichila vulamu yuvu inoho litukhu lienelo khumunyolishitsa vwangu 35khuli mureeko; shichila liliitsa khutukha khu vandu voosi vamenyanga khulilova. 36Navutswa muheenze tsisaa tsiosi, khandi musaale shia khase khosi khu muve ni tsingulu tsiu khwihonolokha khurula khu vindu viosi viliitsa khwikholekha, khandi mulisinjila imbeli wu Mwana wu Mundu.”

37Yesu yamala matukhu kenako koosi niyechitsanga mu Litempeli; khandi lwa khulukolovo khwatukhanga, yatsitsanga khumala vutukhu vwosi khu Shikulu shia Misayituni. 38Shia litukhu nu kushili mu mavwevwe, vandu voosi viitsanga khumuhulishitsa mu Litempeli.

Currently Selected:

LUKA 21: LLLPRO

Highlight

Copy