Kîam 25

Nchiarwa ingî cia Abrahamu

(1Ma 1.32-33)

1Abrahamu nî aacokere aragûra mûka ûngî weetagwa Ketura. 2Nawe araciara Zimurani na Jokishani na Medani na Midiani na Ishibaki na Shuha. 3Jokishani aarî îthe wa Sheba na Dedani. Nabo ataana ba Dedani baarî Ashurimu na Letushimu na Leumimu. 4Ataana ba Midiani nabo baarî Efa na Eferi na Hanoki na Abida na Elida. Bau bonthe baarî ba rûrîîjo rwa Ketura. 5Abrahamu nî aanenkeere Isaaka into bionthe birîa aarî nabio. 6Îndî ataana barîa Abrahamu aagîîte na aka ba gwîka nî aabaeere biewa, na o arî mwoyo arabaathûrana na Isaaka bareeta nthîgûrû ya bwa gaiti.

Gûkua kwa Abrahamu

7Abrahamu aatûûrîre mîaka îgana rîa mîrongo mûgwanja na îtaano (175). 8Abrahamu nî aakuîre agûtindira mma. 9Ataana baawe, Isaaka na Ishimaeli baramûthika gîkurunguune kîa Maki-pela muundeene jwa Efuroni mûtaana wa Zohari ûrîa Mûhiti, bwa gaiti ya Mamure. 10Munda jûu nîju jûrîa Abrahamu aagûrîte kuuma kîrî Ahiti. Abrahamu na mûka waawe Sara nîku baathikîrwe. 11Nyuma ya gîkuû kîa Abrahamu, Mûrungu nî aatharimîre mûtaana waawe Isaaka. Isaaka nî aatûûrîre Beeri-Iahai-roi.

Nchiarwa cia Ishimaeli

(1Ma 1.28-31)

12Iji nîcio nchiarwa cia Ishimaeli mûtaana wa Abrahamu ûrîa Abrahamu aaciarîîrwe nî Hagari Mûmisri, ûrîa waarî nthûûmba ya Sara. 13Jaja nîjo mariîtwa ja ataana ba Ishimaeli bathingateene kûringana na ûrîa baaciari. Nabo nî Nebaiothi ûrîa waarî mwana wa kîranga, arathingatwa nî Kedari na Adibeeli na Mibisamu, 14na Mishima na Duma na Massa, 15na Hadadi na Tema na Jeturi na Nafishi na Kedema. 16Bau nîbo baarî ataana ba Ishimaeli na jau nîjo mariîtwa jaao na ntûûra ciaao na ja gûntû kûrîa baambaga maema. Bau nîbo baaere atongeeria îkûmi na baîrî barîa baambîrîîrie mîîrîga yaao. 17Ishimaeli aakuîre agûtûûra ûkûrû bwa mîaka îgana rîmwe rîa mîrongo îthatû na mûgwanja (137).

18Nchiarwa cia Ishimaeli ciatûûrîre nthîgûrû îrîa yaarî gatîgatî ka Havila na Shuri, bwa gaiti ya Misri, na gwîta bwa nthî ya Asîria. Nchiarwa cia Ishimaeli nî ciatûûrîre itî na ngwatanîro na ndûgû ciaao cionthe.

Gûciarwa kwa Esaû na Jakubu

19Iji nîcio nchiarwa cia Isaaka mûtaana wa Abrahamu. Abrahamu nîwe waarî îthe wa Isaaka. 20Isaaka aarî na ûkûrû bwa mîaka mîrongo îna (40) rîrîa aagûrîre Rebeka mwarî wa Bethueli. Bethueli aarî Mûaramu wa kuuma Padani-aramu. Ningî Rebeka aarî mwarî wa ng'ina wa Labani. 21Isaaka nî aarombere MWATHANI nîûntû bwa mwekûrû waawe nîkwîthîrwa aarî nthaata. MWATHANI aaigîrue îromba rîaawe, na mwekûrû waawe Rebeka aragîa îu. 22Îndî twaana tûratua gûtindîkana tûrî kîu kîa ng'ina, nawe Rebeka araciûria, “Nîatîa gûkari kîu gîkî?” Nawe areeta kûûria MWATHANI ûntû bûu. 23#Aro 9.12 MWATHANI aramwîra atîrî,

“Mîgongo îîrî îrî kîu gîaaku.

Ûgaaciara antû baîrî nabo batîgwatanagîra;

ûmwe agaakîria ûngî inya

na ûrîa mûkûrû akaa nthûûmba ya ûrîa mwanake.”

24Rîrîa îgiita rîaawe rîa kuurûka rîakinyîre, nawe araciara maatha. 25Mwana wa mbere aarî ûmûtuune, na mwîrî jwaawe jûnthe jwoojûri ruuri. Nawe areetwa Esaû.#25.25 Esaû: na Kîhibirania nî kuuga “Guee” kana “Nciûri.” 26Mûtaana wa ng'ina aracoka arauma agwete Esaû gatakino. Nawe areetwa Jakubu.#25.26 Jakubu: nî ta kuuga “Kûgwata gatakino.” Isaaka aarî na ûkûrû bwa mîaka mîrongo îtaantatû (60) rîrîa Rebeka aaciarîre aana bau.

27Biîjî biu bigûkûra, Esaû nî aaere mûthoogi ûmûnene, na aatindaga ithakeene. Jakubu nî aaere muntû ûmûkiri na aatindaga maemeene. 28Isaaka nî eendeete Esaû, nîûntû nî eendeete kûrîa nyama irîa aathoogaga. Îndî Rebeka eendeete Jakubu.

Esaû kwendia kiigai kîaawe kîa ûrikithathi

29Ntukû îmwe Jakubu nî aarugîre gîtweero gîkîega. Esaû areeja arî na mpara mono aumîte kîthakeene. 30Esaû areera Jakubu atîrî, “Ndûmia gîtweero kîu kîa nthoroko intuune, nîûntû ndî na mpara îmbîî.” (Kîu nîkîo gîtûmi eetîrwe Edomu#25.30 Edomu nî kuuga “Ûtuune.”) 31Jakubu aramwîra atîrî, “Mbere mpenderia kiigai gîaaku kîa ûrikithathi.” 32Esaû arauga atîrî, “Nandî ka ngûkua nî mpara; kiigai kîa ûrikithathi kîrî na gîtûmi kîrîkû kîrî ni?” 33#Ahi 12.16 Jakubu aramwîra “Amba ûciîtie.” Esaû araciîtia, atî akamwenderia kiigai kîaawe kîa ûrikithathi. 34Rîu Jakubu ararûmia Esaû mûgaate na gîtweero kîa nthoroko. Esaû ararîa na aranyua. Aracoka arookîîra, araciîtîra. Ûu nîu Esaû aiteereere kiigai kîaawe kîa ûrikithathi.

Currently Selected:

Kîam 25: KIMERUBIBLE

Highlight

Copy