Génesis 19
19
Diosajj Sodoma, Gomorra marcanacaruw t'unji
1Cunapachatejj uca pä angelanacajj Sodoma marcaru puripcän ucapachajj niya ch'amacthapjjänwa, Lot chachasti marcar mantañ puncun kont'atäscänwa, cawqhantejj jakenacajj tantachasipjjerïna ucqhana. Uca pani angelar uñjasasti catokañataquiw sayt'asi, ucatsti orakcamaw alt'asi, 2saraquïnwa:
—Tatanaca, achict'asipjjsmawa, jichhärmajj naya jumanacan sirviriman utapanay korpacht'asipjjamjja. Ucanwa cayunacam jarekt'asipjjäta, ucatsti arumanthiw wali alwat sarjjapjjäta —sasa.
Ucampis jupanacajj sapjjänwa:
—Yuspagarapjjsmawa, ucampis janiw utamar korpachasipquiristti jan ucasti callequi ict'apjjä —sasa.
3Ucampisa Lot chachajj sascaquïnwa utapan korpachasipjjañapataqui, ucatsti jupanacajj jupampi chicaraquiw utapar sarjjapjjäna. Cunapachatejj puripjjän ucapachasti, Lot chachajj mä suma mank'a waquicht'ayaraquïna, jan levaduran t'ant'anaca, visitanacasti mank'apjjaraquïnwa.
4Ucampisa janïr iquintapquipansti, Sodoma marcanquir take jakenacaw Lot chachan utaparojj muyuntapjjäna, chuymani jakenaca, wayna jakenaca, 5ucatsti Lot chacharuw arnakapjjäna:
—¿Cawquinquis jichhärma utamar purinqui uca jakenacajja? ¡Irpsunim! ¡Jupanacampiw iquintañ munapjjta! —sasa.
6Lot chachasti jupanacampi parliriw mistuni, puncsti wali suma jist'antaraqui, 7ucatsti saraquïnwa:
—Munat jilatanaca, achict'asipjjsmawa, janiquiy uca jan walinac lurapjjamti. 8Nayan pä phuchajjaw utjasqui, jupanacasti janïraw chacha uñt'apquiti; irpsunïwa jumanacajj cuntejj munapcta uca jupanacampi lurapjjañamataqui, ucampis jan cuna ñankhanacsa lurapjjamti aca chachanacarojja, jupanacajj nayan visitanacajjawa —sasa.
9Ucampis jupanacajj sasipcaquïnwa:
—¡Sartam ucqhata! Jumajj yakha marcat jutir jakëtawa, ¿jumat nanacar apnakapjjetäta? Jichhasti jumarojj uca jakenacat sipansa juc'ampi jan walinacwa lurapjjämajja —sasa.
Ucatsti Lot chacharojj nuwjañwa kalltapjjäna, ucatsti puncu t'unsuñataquiw maqhatapjjäna, 10ucampisa Lot chachan visitanacapajj juparojj waythapisinwa uta mankhar wayuntjjapjjäna; ucatsti puncjja jist'antjjapjjänwa, 11ankanquir jakenacarusti juyqhuptayapjjaraquïnwa. Takeni chuymani jakenacatpacha waynanaccama, uqhamaw juyqhu uñjasipjjäna puncu taccäwisa karirapjjaraquïnwa.
12Visitanacasti Lot chacharojj sapjjaraquïnwa:
—¿Yakha familianacamajj aca marcan utjtamti? Yokanacamampi, phuchanacamampi, tollkanacamampi, uqhamarac take cunatejj utjctam aca marcan ucanac irpjjarusjjam, ucatsti acat jayar sarjjapjjam, 13aca marcsti t'unjapjjäwa. Sintipunëjjewa Tatitu contra jucha luratanacapajja, ucatwa aca marcar t'unjañataqui qhitanipjjetu —sasa.
14Lot chachasti tollkanacapan ucaruw saräna, ucanacasti phuchanacapampi casarasiñataqui parlatäpjjänwa, ucatsti jupanacarojj saraquïnwa:
—¡Sartasipjjam, ucatsti aca marcat jayar sarjjapjjam, Tatitu Diosaw aca marcjja t'unjani! —sasa.
Ucampisa tollkanacapajj janiw Lot chachan aruparojj yäkapcänti, 15khanjtanjjepansti, angelanacajj Lot chacharojj sapjjänwa:
—¡Janc'aqui sartasim! Jichhasti sarjjam aca marcata, warmimaru, pä phuchanacamampiru irpjjarusiwayjjam, janitejj jiwañ muncsta ucapachajja, nanacasti aca marcjja t'unjapjjäwa —sasa.
16Lot chachasti janiw janc'achascänti, ucatwa angelanacajj amparat waythapipjje, Tatitun jupat qhuyapayasitap laycu. Uqhamaraquiw warmiparusa, pä phuchaparusa waysuwayapjjäna, ucatsti marca ankäjjaruw irpanucjjapjjäna jan jiwapjjañapataqui. 17Cunapachatejj marca ankäjjancjjapjjän ucqhasti, mä angelaw saraquïna:
—¡Jaltjjam, khespiñamataqui! Janipun kheparojj uñtanipjjamti, janirac sayt'apjjamsa aca vallenjja. Kollu tokenacar jaltjjapjjam khespiña munsta ucapachajja —sasa.
18Ucampis Lot chachajj sänwa:
—¡Janiw tatanaca, achict'asipjjsmawa! 19Jumanacajj sinti jach'a asquinacwa lurapjjestajja, nayataquisti sinti suma jakenacäpjjtawa, khespiyapjjaraquistawa jacañajjsa, ucampis janiw nayajj kollu tokenacar sarquiristti, t'unjäwisti thaquinjja catjaraquitaspawa, ucatsti nayajj jiwaraquiristwa. 20¡Uñtapjjam, qhayan mä jisc'a marca uñjta! Jac'anquiwa, ucaruw jaltjjapjjaraquiristjja. ¡Ucar jaltjjapjjam sapjjeta, jacañajj khespiyasiñajjataqui! ¿Chekpachansa jisc'aquejjay uca marcajja? —sasa.
21Ucatsti uca angelanacat maynïrejj sänwa:
—Ist'smawa, ucatsti mayitamarojj jaysaraquïwa. Cuna marcattejj parlquista ucsti janiw t'unjcaraquïti, 22ucampisa ¡saram! uca marcar jaltjjam, janiraquiw cunsa lurcäti uca marcar puriñamcamajja —sasa.
Ucatwa uca marcajj Zoar sasa sutichatajja.
23Cunapachatejj khanjtanjjäna, uqhamarac Lot chachas Zoar marcar purjjaraquïna ucqhajja, 24Tatitusti ninampi, azufrempwa Sodoma, uqhamarac Gomorra marcanacjjarojj puriyanïna, 25ucatsti take qhitinacatejj uca marcanacan jacapcäna ucanacampwa t'unjäna, uqhamarac take cunatejj uca vallen jilcäna ucanacsa k'alwa t'unjäna. 26Ucampisa Lot chachan warmipajja khepatwa jutascäna, ucatsti jupajj khepa uñtäna, ucatsti uca pachparuw jayu kala tucjjaraquïna.
27Khepärmanthi alwasti, Abrahamajj cawqhantejj Tatitumpi parlcatayna ucqharuw saräna, 28Sodoma, uqhamarac Gomorra marcanacwa uñtäna, uqhamarac take uca valle tokenaca, ucatsti uñjaraquïnwa ucsatjja mä jek'e maqhatasquiri, mä hornotjama. 29Uqhamwa Diosajj uca valle tokenquir marcanac t'unjäna, cawqhantejj Lot chachajj jaccän uca marcanaca, ucampis Abrahamat amtasïnwa, ucatwa Lot chacharojj uca chekatjja irpsuwayjjaraquïnjja.
Moabitanacampin, amonitanacampin uñstatapa
30Uca khepatsti Lot chachajj Zoar marcan kheparañjja ajjsarayasjjänwa, ucatsti pä phuchapa irpjjarusiwayasinjja kollu tokenacaruw sarjjäna, ucanwa quimsanpacha mä putun jacapjjäna. 31Mä urusti jilïri phuchajj sullca phucharojj sänwa:
—Awquisajj chuymanëjjewa, take acsa tokenacansti janiraquiw mä chachas utjquiti jiwasan casarasiñasataquejja, cunjämatejj waquisqui uqhama. 32Uqhamajj umjayañäni, ucatsti jupampiw iquintañäni, uqhamat jupatac wawanïñasataqui —sasa.
33Uca arumpachaw awquiparojj vino churapjjäna, ucatsti jilïri phuchajj jupampiw iquintäna, ucampis awquipajj janiw amuyascänti cunapacha iquintatapsa ni cunapacha sartjjatapsa. 34Khepa urusti, jilïri phuchajj sullca phucharojj saraquïnwa:
—Masayp'ojj nayajj awquisampiw iquintta, uqhamajj jichharmajj umjayaraquiquiñäni ucatsti jupampiw jumajj iquintaraquïta, uqhamat panpachaniw jupatac wawanïñäni —sasa.
35Uca arumpachaw awquiparojj wasitat vino churapjjäna, sullca phuchasti awquipampiw iquintaraquïna, ucampisa Lot chachajj janiraquiquiw amuycänti cunapacha phuchapan iquintatapsa, uqhamarac sartjjatapsa. 36Uqhamaw Loten phuchanacapajj awquipataqui usur jakeptapjjäna. 37Jilïri phuchasti mä yokall wawa wawachasi, ucarusti Moab sasaw suticharaquïna, ucasti jichhajj moabitanacan awquipäjjewa. 38Sullca phuchasti mä yokall wawa wawachasiraquïna, ucatsti Ben-amí sasaw suticharaquïna, ucasti jichhajj amonitanacan awquipäjjewa.
Currently Selected:
Génesis 19: AYOP
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
