KHURULA 1

Vaisraeli Vanyashitswa Vululu Misri

1Yaka nako mira ka vaana va Yakobo, vasimukha na tata wavo Yakobo, nivatsia mu shivala shia Misri, shia mundu nu lwivulu lwelwe, 2Rubeni, Simioni, Levi, Yuda; 3Isakari, Zabuloni nende Benyamini; 4Dani nende Nafutali; Gadi nende Asheri. 5Isavu ya vaana voosi vivulwa khu Yakobo, yali vandu makhomi saba; mumatukhu kenako, Yosefu yali watsia khumenya mu shivala shia Misri. 6Mihika minyishi nichiakhavira, Yosefu halala na vamwavo veve voosi vakhutsa, halala na vandu vi likhula lienelo. 7Navutswa vitsukhulu va Vaisraeli, vivulana mu vunyishi; vashila muno khandi vali ni tsingulu tsinyishi shia havundu hosi Misri.

8Nalwo lwa khwaliho nu mwami wundi muyia wamihanga Misri, wali nashili khumanyakhu shindu shiosi khulondokhana khu Yosefu. 9Mwami wa Misri mwenoyo, yavoolela vandu veve, “Loli! Vaisraeli vayivulana mu vunyishi, khali vali ni tsingulu tsinyishi khuvira tsieru. 10Hambi khuchelitsi khukhava khuli khuvativitsa, inoho valiitsa khwivulana mu vunyishi; khali niiva liihe linyala khuvaho vanyala khwiyunga na vatsiku veru, khukhukwana nu khwilukha mu shivala shieru.” 11Vamisri varovola vandu vu khusinjilila Vaisraeli, nu khuvanyashitsa khulu khuvanika khukhola muhinzilu mulitoho. Vaisraeli vumbashila Mwami wa Misri mataala, ku khuvikhamu vindu ka Pitsoni nende Ramesesi. 12Navutswa lwa Vamisri vatsililila khusalilitsa Vaisraeli, nalwo lwa vatsililila khwivulana mu vunyishi; khandi nivasalana shia havundu hosi mu shivala shienesho, khali Vamisri nivaria Vaisraeli. 13Vamisri vahinzilitsa vululu muno Vaisraeli; 14khali nivalomba limenya lia Vaisraeli khuva litiinyu muno, shichila muhinzilu mulitoho kwa vakholanga, lwa vumbakhanga nivaloonga matofari, khandi nivakhola mihinzilu chindi chiosi mu milimi; Vamisri va vahinzilitsa vululu muno.

15Mwami wa Misri yavoolela vakhali Vahebrania vivulitsanga vandu vakhali, mulala khuvo walaangwangwa Shifura na wundi Puha, 16“Lwa murumikha khuli vandu vivulitsanga vakhali Vahebrania, khandi muheenzele havundu ha vivulilanga, niiva muliitsa khulola mwana wi shiyayi neye wivulwi, muliitsa khumwiira; navutswa niiva aliitsa khuva nu mwana wi shikhana, muleshe khumwiira.” 17Navutswa vakhali Vahebrania venavo, vali vaha Nyasaye luyali. Vambakhana khukhola ku Mwami wa Misri yavavoolela vakhole, navutswa valekha vaana vi shiyayi, khutsililila khuva mwoyo. 18Mwami wa Misri yalaanga halala vakhali Vahebrania venavo, navareeva, “Shichila shina numukhola kenako, khandi numulekha vaana vi shiyayi, khutsililila khuva mwoyo?” 19Vakhali Vahebrania vavoolela Mwami wa Misri, “Vakhali Vahebrania shivali khuli vakhali Vamisri tawe; shichila vali ni tsingulu tsiu khwivula vwangu, khali mulala khu khutsi, nashili khutukhaho.” 20Nalwo lwa Nyasaye yakasitsa vakhali Vahebrania venavo. Vaisraeli vivulana mu vunyishi khandi nivava ni tsingulu. 21Lwa vakhali Vahebrania venavo vali nivahaana luyali khu Nyasaye, nalwo lwa Nyasaye yavaha lwivulu lwavo vene. 22Mwami wa Misri yavoolela vandu veve voosi, “Muliitsa khusiuva mu Muchela kwa Naili, shia mwana wi shiyayi wosi wu mukhali Muhebrania yivula; navutswa muliitsa khwiira mwana wi shikhana.”

Currently Selected:

KHURULA 1: LLLCATHOLIC

Highlight

Copy