LIRAANGA 30

1Lwa Raheli yalola avulakhu mwana wa yali niyivula khu Yakobo, yalolela mwana wi shikhana wavo imbotokha. Yavoolela Yakobo, “Yivula khwinzi vaana, nikakhavele kario, nzitsanga khukhutsa.”

2Yakobo yalolela Raheli vurima navoola, “Nyala khwivukula mu vwiyangu vwa Nyasaye, wakhwikalila khwivula?”

3Nalwo lwa Raheli yavoola, “Ndi hanu nu mwana wi shikhana murukwa wanje ulaangwangwa Bilia. Ukone naye, anzivulili vaana, khandi nilivalitswa nayivula vaana khuvirila khuye.” 4Raheli yavukula murukwa wewe Bilia, naha musatsa wewe. Yakobo yakona naye. 5Bilia yaheelitsa, niyivula khu Yakobo mwana wi shiyayi. 6Nalwo lwa Raheli yavoola, “Nyasaye umali khukholela malahi. Umali khuhulila mwoyo kwanje; khandi umbeele mwana wi shiyayi.” Khulwa yako, yakulikha mwana mwenoyo lira Dani. 7Bilia yaheelitsa khandi niyivula khu Yakobo mwana wi shiyayi wa khavili. 8Nalwo lwa Raheli yavoola, “Nanyiilana nu mwana wi shikhana weru, navutswa mali khukuura.” Yakulikha mwana mwenoyo lira Nafutali.

9Lwa Leya yalola ndi wasinjila khwivula vaana, yavukula mwana wi shikhana murukwa wewe walaangwangwa Zilipa, naha Yakobo ave mukhali wewe. 10Zilipa yivula khu Yakobo mwana wi shiyayi. 11Leya yavoola, “Ikhaavi indahi ingwilili!” Yamukulikha lira Gadi. 12Zilipa yivula khandi khu Yakobo mwana wi shiyayi wa khavili. 13Leya yavoola, “Ndi nu vuyaanzi vwatoto! Vakhali valiitsa khunaanga wakasitswa.” Yakulikha mwana mwenoyo lira Asheri.

14Mumatukhu kukhuchesa inganu, Rubeni yasimukha natsia mu milimi. Yanyolayo viraakwa vialaangwangwa mandoraki, via yalerela mama wewe Leya. Raheli yavoolela Leya, “Nuyaanza mbekhu malala khu mandoraki ku mwana wowo yaka.”

15Navutswa Leya yavoolela Raheli, “Lwa wanuula musatsa wanje, uvukulanga likhuva lienelo khuli ni shindu shitititi? Ukanakananga ulavukula khali mandoraki ku mwana wanje?”

Raheli yamuvoolela, “Nu vulahi. Lekha Yakobo akone nivi khuli murungu kwa mandoraki ku mwana wowo.”

16Lwa Yakobo yali niyakharula mu milimi khulukolovo khwenokho, Leya yasimukha natsia khwakana naye. Leya yamuvoolela, “Utsitsanga khukona ninzi, shichila khusamulitsi lwa unyoli mandoraki ku mwana wanje.” Khulwa yako, Yakobo yakona naye mu vutukhu vwenovo.

17Nyasaye yahulila lisaala lia Leya, ma Leya naheelitsa; khandi niyivula khu Yakobo mwana wi shiyayi wa kharanu. 18Leya yavoola, “Nyasaye umbeele murungu kwanje, shichila navukula mwana wi shikhana murukwa wanje, nimba musatsa wanje.” Leya yakulikha mwana mwenoyo lira Isakari. 19Leya yaheelitsa khandi niyivula khu Yakobo mwana wa sita. 20Leya yavoola, “Nyasaye umbeele shihanwa shilahi shiene. Musatsa wanje aliitsa khumba luyali, shichila mali khwivula khuye vaana sita.” Yakulikha mwana mwenoyo lira Zabuloni. 21Matukhu mati nikakhavira, Leya yivula khuye mwana wi shikhana. Yamukulikha lira Dina.

22Nalwo lwa Nyasaye yitsushitsa Raheli; yahulila lisaala lielie niyivula mwana. 23Raheli yaheelitsa niyivula mwana wi shiyayi. Raheli yavoola, “Nyasaye umali khundulitsilaho tsisoni tsianje, lwa yakhamba mwana wi shiyayi.” 24Raheli yakulikha mwana mwenoyo lira Yosefu, navoola, “Mwami Nyasaye ameete mwana wundi!”

Yakobo Vavoolelana Vukhwi na Labani

25Lwa Raheli yali niyivula Yosefu, Yakobo yavoolela Labani, “Seevula nduli hanu; shichila nyenyanga khukalukha mu shivala shia nivulwamu. 26Mbe vakhali vaanje nende vaana vaanje, vachila nikhukholela muhinzilu. Lekha nduli hanu; shichila wamanya vulahi muhinzilu kwa nakhukholela.”

27Navutswa Labani yavoolela Yakobo, “Lekha mbole ndi mali khweka khuvirila mu vukhumu ndi Mwami Nyasaye wangasitsa shichila yivi. 28Mbolela mirungu chiochio, ninzi nakhurunga.”

29Yakobo yamuvoolela, “Yivi mwene wamanya vulahi khuli nakhukholelanga muhinzilu; khandi khuli tsing'ombe tsiotsio tsiali tsikhomeelu. 30Wali navio vitititi nishili khwitsa, khandi khuli viameetekha mu vunyishi, khandi khuli Mwami Nyasaye yakhukasitsa shia havundu hosi ha nali nindi. Navutswa ni litukhu shina lia inzi mwene, niitsa khukhalavanila khandi vandu vi inzu yanje?”

31Labani yareeva Yakobo, “Ni shina shia khurunga?”

Yakobo yamuvoolela, “Ukhundungakhu shindu shiosi tawe. Nikava ulakholela ka nyenyanga kakholwi, natsililila khandi khwayitsa miruku chiochio, nu khuchilinda. 32Lekha njende chende nunundi mu miruku chiochio chiosi. Narulitsa mu miruku chienecho shia likondi liosi limwamu khandi shia imbuli yu vutondonye inoho ya matavala. Nakwo murungu kwa khureevanga undunji. 33Uliitsa khumanya mumatukhu kaliitsa khuvaho, niiva nali mundu museletse. Lwa uliitsa khwitsa khuheenza murungu kwanje, niiva nanyolekha ni imbuli ivula vutavala inoho vutondonye inoho likondi limwamu, nalwo lwa uliitsa khumanya ndi lihuuvilwi.”

34Labani yavoolela Yakobo, “Mbuchilile. Niitsa khukhola khuli lwa uvooli.” 35Khulitukhu lilala lienelo, Labani yarulitsa mu shiayo tsimbuli tsiosi tsikhole tsili nu vutavala inoho vutondonye inoho khandi tsimbuli tsikhali tsiosi tsiali nu vutavala khandi vutondonye inoho tsindavu muno; yarulitsamu makondi mamwamu khandi. Labani yavoolela vaana veve vakasinjilile, 36narulaho khutsia ihale wene khurula khu Yakobo ni miruku chiechie khutukha havundu wachenda khumatukhu kavaka. Yakobo yayitsa vulahi miruku chia Labani chiarikala.

37Yakobo yavukula tsisia tsimbisi tsiu musala kwa popula, alumondi, nende musiyenze, nakhovola makhanda kachio khu tsilaini tsindavu tsiloleshe mukari mwachio. 38Yakobo yavukula tsisia tsienetso manatsisinjilitsa imbeli wi miruku chiali havundu hi miruku ching'welelanga matsi. Yavikhaho tsisia tsienetso, shichila khung'wa matsi. 39Khulwa yako, lwi tsimbuli tsiarumana tsiene imbeli wi tsisia tsienetso, tsivula vimeme viu vutavala, nende viu vutondonye.

40Yakobo yiyahulila haluveka makondi khurula mu tsimbuli manakakhoma khukahila khuluveka lwi tsimbuli tsia Labani tsia matavala. Munjila yinu, Yakobo yali ni miruku chiechie mwene khuvira chia Labani.

41Lwa miruku mikhomeelu chiarumana chiene khuchiene, Yakobo yasinjilitsa tsisia tsienetso imbeli wachio havundu ha chiang'welelanga matsi, khwivula mu tsisia tsienetso. 42Navutswa Yakobo shiyasinjilitsakhu tsisia tsienetso imbeli wi miruku chiang'aha tawe. Miruku chiang'aha chiamanya nichikwa chia Labani, na miruku mikhomeelu nichikwa chia Yakobo. 43Khulwa yako, Yakobo yali muhinda muno khuvirila munjila yiyi. Yali ni miruku minyishi, varukwa vanyishi, tsingamia nende tsipunda tsinyishi.

Currently Selected:

LIRAANGA 30: LLLCATHOLIC

Highlight

Copy