LIRAANGA 33
33
Yakobo Yakana na Esau
1Yakobo yaheenza nalola Esau yitsanga na vandu veve tsimia tsine. Yakobo yakavula vaana khu Leya, Raheli nende vakhali veve varukwa vavili. 2Yavikha vakhali veve varukwa nende vaana vavo imbeli, Leya nende vaana veve nivalondakhu, khandi Raheli nende Yosefu nivava vukhumalilikha. 3Yakobo yavimilila imbeli, niyinama hali saba hasi, lwa yali nali himbi khutukha khu amwavo wewe. 4Navutswa Esau yilukhaka natsia khwakanila Yakobo, namukhumbelela; khandi namutsunzuna khu munwa kwekwe. Voosi nivaraanga khulila. 5Lwa Esau yaheenza, nalola vandu vakhali nende vaana vavo, yareeva, “Ni vandu shina vuli halala navo yava?”
Yakobo yamuvoolela “Mwami, navo vaana va Nyasaye yandolela tsimbavasi namba.” 6Vakhali varukwa vitsa himbi nende vaana vavo, nivamwinamila; 7Leya nende vaana veve nivitsa khumwinamila, khandi lukhumalilikha Yosefu nende Raheli, nivitsa khandi khumwinamila.
8Esau yareeva, “Shituma shia vandu vambukani navo lukhuraanga yavo vali na makhuva shina?”
Yakobo yamuvoolela, “Khundolela vulahi imbeli wowo.”
9Navutswa Esau yavoolela Yakobo, “Mwana weru, ndi navio mu vunyishi. Vikha viuli navio mwene.”
10Yakobo yavoolela Esau, “Nuyaanza, shikava kario tawe! Niiva undolele vulahi vwene, uhuchilile shihanwa shianje. Shichila lwa khuloli mumoni, kamanyinyanga khuli ndoli Nyasaye, lwa wa khambukula vulahi vwene. 11Nuyaanza uhuchilile shihanwa shia khulerele yishi; shichila Nyasaye wandolela tsimbavasi; khandi shichila ndi na shia shindu shiosi shia nzikombanga khunyola.”
12Nalwo lwa Esau yavoolela Yakobo, “Chenda khuruli hanu. Niitsa khukhwimilila imbeli.”
13Navutswa Yakobo yavoolela Esau, “Wamanya ndi vaana ni vateteshele; khandi khutukha nganakane shindu khulondokhana khu makondi ni tsing'ombe nende vimoli. Niiva tsilakhomwa nu khushutwa ni mishialiti khulitukhu lilala, miruku chiosi chinyala khukhutsa. 14Nuyaanza nzimilila imbeli inzi murumishi wowo; nakhulonda kalaha, ninjendanga vwangu khuli nyala ni tsing'ombe nende vaana, khutukha lwa ndukha khu yivi mu shivala shia Edomu.”
15Esau yavoola, “Lekha khuleshele valala khu vandu vandi navo hanu.”
Navutswa Yakobo yamuchipa, “Mbulakhu shivune shichilanga nukholela vulahi.” 16Khulitukhu lienelo, Esau yaraanga luchendo lwelwe lu khukalukha mu shivala shia Edomu. 17Navutswa Yakobo yasimukha natsia havundu halaangwangwa Sukotsi, havundu hayumbakha mwene inzu yeye; khandi niyumbakha viiko vi tsing'ombe tsietsie. Nashio shivune shiachila havundu henaho nakulikhwa lira Sukotsi.
18Lwa Yakobo yakalukha narula mu shivala shia Mesapotamia, yatukha vulahi vwene mu litaala lia Shekemu, lili mu shivala shia Kanaani. Yumbakha liheemo lielie liu khumenyamu mu litaala lienelo. 19Yakobo yakula mulimi kwenoko khurula khu vitsukhulu va Hamori, wivula Shekemu ni ifetsa vitonye imia indala. 20Yakobo yumbakha vwaali havundu henaho, navukulikha lira Eli Elohe Israeli (livoolanga Nyasaye wa Israeli).
Currently Selected:
LIRAANGA 33: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
