LIRAANGA 35

Yakobo Yakalukha mu Litaala lia Betseli

1Nyasaye yavoolela Yakobo, “Tikulukha vwangu utsi mu litaala lia Betseli, khumenyeyo. Uliitsa khunzumbashilayo vwaali khwinzi Nyasaye, walolekha khu yivi lwa wali nuwilukhanga amwavo wowo Esau.”

2Yakobo yavoolela vandu vi inzu yeye nende yavo voosi va yali nali navo, “Siuvi misambwa chia vanyasaye va vandu vi tsimbia tsindi vamuli navo. Mwinihitse vene, khandi mwifwale tsinguvu tsindahi. 3Khutsitsanga khurula havundu hanu, nu khutikulukha khutsia mu litaala lia Betseli, wa nzitsanga khumbakha vwaali khu Nyasaye, wakhonya mumatukhu ka nali nindi mu matiinyu; khandi wali ninzi shia havundu hosi wa natsitsanga.” 4Vavukula misambwa chia vanyasaye, chia vali nachio nivaha Yakobo, khali matemba ka vali nivifwali mu maroyi kavo. Yakobo yavukula, naviyeveela mu malova himbi ha musala ku museno, kwali nukwameela mu litaala lia Shekemu.

5Lwa Yakobo nende vaana veve vasimukha nivarulaho, vandu vamenyanga mu mataala ka himbi, varaanga khuheenda mwoyo, khali nivavula khuhitsanyinya vaana vi shiyayi va Yakobo. 6Yakobo nende vandu voosi va yali nali navo vatukha mu litaala lia Luzi (nakhwo khuvoola Betseli) lili mu shivala shia Kanaani. 7Yakobo yumbakha vwaali havundu henaho. Yakulikha havundu henaho lira Eli Betseli, shichila Nyasaye yalolekha khuye havundu henaho, niyilukhanga amwavo wewe. 8Muleli wa Rebeka walaangwangwa Debora yakhutsa; nayeveelwa hasi wu musala ku museno, khuluveka ikuvanda wi litaala lia Betseli. Havundu henaho hakulikhwa lira Aloni Bakutsi (nakhwo khuvoola musala kuroonyanga miliika).

9Lwa Yakobo yakalukha narula mu shivala shia Mesopotamia, Nyasaye yalolekha khandi khuye; namukasitsa. 10Nyasaye yavoolela Yakobo, “Ulaangwangwa Yakobo, navutswa khuraanjila nunundi umali khukulikhwa lira Israeli.” Khulwa yako, yakulikhwa lira Israeli. 11Nyasaye yamuvoolela “Ninzi Nyasaye Uli Ikulu khu Viosi. Yivula vaana mu vunyishi. Vandu vi tsimbia tsinyishi valiitsa khurula khu yivi; khandi uliitsa khuva kuuka wa vami. 12Niitsa khukhuha shivala shia nali ninaha Aburahamu nende Isaka; khali niitsa khuha vitsukhulu vovo shivala shienesho nu wakhutsa.” 13Nalwo lwa Nyasaye yamulekha havundu ha yali nalomolome khuye henaho. 14Yakobo yasinjilitsa lichina liu khwitsushitsilakhu havundu ha Nyasaye yali nalomolome khuye; khandi nasuundulakhu idivai nende makura, khulikhola khuva litakatifu. 15Khulwa yako, Yakobo yakulikha havundu ha Nyasaye yali nalomolome khuye lira Betseli.

Khuli Raheli Yakhutsa

16Yakobo nende vandu vi inzu yeye vasimukha nivarula mu litaala lia Betseli. Lwa vali nivashili ihale wene wi litaala lia Efuratsa, matukhu ka Raheli ku khwivula katukha, nahulila isalila indulu muno. 17Lwa Raheli yali nahulilanga isalila yu khwivula indulu muno, mundu wa mwivulitsanga yamuvoolela, “Raheli, lekha khuria; shichila ushili khwivula mwana wundi wi shiyayi.” 18Navutswa lwa Raheli yali niyakhamiila miuya (shichila yali umali khukhutsa) yakulikha mwana mwenoyo lira Benoni #35:18 Benoni: livoolanga mwana wanzivulili mu vutiinyu., navutswa tata wewe yamukulikha lira Benyamini #35:18 Benyamini: livoolanga mwana uliitsa khunyola tsikhaavi. 19Raheli yakhutsa, mmbili kwekwe nukuyeveelwa mu shilindwa shili khundulu khu muhaanda kutsitsanga Efuratsa, litaala lilaangwangwa nunundi Betselehemu. 20Yakobo yasinjilitsa lichina liu khwitsushitsilakhu khu shilindwa shia Raheli. Nalio liliho nunundi khuli shimanyilu shi shilindwa shia Raheli. 21Yakobo yatsililila nu luchendo lwelwe; nasimiikha liheemo lielie injelekha wu munaara kwalaangwangwa Migidali Ederi.

Vaana vi Shiyayi va Yakobo

(1 Tsiny 2:1-2)

22Lwa Yakobo yali nashimenyanga mu shivala shienesho, Rubeni yakona na Bilia, mulala khu vakhali vamenyinywa va tata wewe. Yakobo yavoolelwa makhuva kenako.

Mumatukhu kenako, Yakobo yali wayivula vaana vi shiyayi likhomi na vavili. 23Vaana va Leya yivula khu Yakobo ni Rubeni (Mwana mukhulundu khu Yakobo), Simioni, Levi, Yuda, Isakari nende Zabuloni. 24Vaana va Raheli yivula khu Yakobo ni Yosefu nende Benyamini. 25Vaana va Bilia wali murumishi wa Raheli yivula khu Yakobo ni Dani nende Nafutali. 26Vaana va Zilipa wali murukwa wa Leya walaangwangwa Zilipa yivula ni Gadi nende Asheri. Vaana yava vivulwa khu Yakobo, namenyanga mu shivala shia Mesapotamia.

Khuli Isaka Yakhutsa

27Yakobo yasimukha natsia khulola tata wewe, wali nali havundu halaangwangwa Mamure, himbi mu litaala lia Heburoni, havundu ha Aburahamu nende Isaka vali ni vamenyakhu khale. 28Isaka yali watushitsa mihika imia indala na makhomi munane 29nakhutsa, niyasakhula. Vaana veve Esau nende Yakobo, vayeveela mmbili kwekwe mu shilindwa.

Currently Selected:

LIRAANGA 35: LLLCATHOLIC

Highlight

Copy