LIRAANGA 49

Makhuva Kukhumalilikha ka Yakobo khu Vaana Veve

1Yakobo yalaanga halala vaana veve navoola, “Hambi himbi handi hanu, khu muvoolele kaliitsa khwikholekha munyi mumatukhu kaliitsa khuvaho.

2“Munyi vaana vaanje, hambi halala muhulile,

mumbulishitsi inzi Israeli, tata wenyu.

3“Mwana wanje mukhulundu Rubeni,

nivi tsingulu tsianje, mwana wa naraanjilakhu khwivula,

mwana mwiloli khandi wi tsingulu khuvira vaana vaanje vandi voosi.

4Uli khuli matsi ki michelelo kanyala khuvula khusinjilitswa.

Navutswa shiuliitsa khuva wimbeli khu vaana vaanje tawe,

shichila wakona nu mulala khu vakhali vaanje;

shiseelo shia inzi tata wowo nukholela tsisoni.

5“Simioni nende Levi ni vamwavo.

Varumishilanga viuchi viavo khwiira.

6Nikhali shinzitsanga khusanga mu ka valoshitsanga khukhola,

inoho khwinjila mu shikhaalo shiavo tawe;

shichila viiranga vandu mu vurima vwavo,

nivaleminya tsichilishi khuli muvayo kwa vayaanzilila khukhola.

7Shilaamo shive khuvo shichila vululu vwavo, shichila mwali nu vurima vululu muno.

Vitsukhulu venyu valiitsa khusalana mu vandu vi tsimbia tsia Israeli.

8“Yivi Yuda, vamwavo vovo valiitsa khukhwitsominya.

Uliitsa khukuura vatsiku vovo.

Vamwavo vovo valiitsa khukhusikamila.

9Yuda ali khuli isimba,

yiiranga inyama khandi ikalukha havundu ha imenyanga,

lwa yinjilanga nikona hasi.

Mundu avulakhuho uchinyashitsanga, shichila ili ni tsingulu.

10Indovoshi yu vwami iliitsa khuvula khurula khu Yuda,

vitsukhulu veve valiitsa khwamiha shia khase khosi.

Vandu voosi valiitsa khumulerela vushuru;

valiitsa khumusikamila.

11Avohanga ipunda yeye khu musala ku musabibu,

khu litunda liu musabibu lilahi liene.

Afuyanga tsinguvu tsietsie mudivai imuuchi muno.

12Tsimoni tsiamuuchiha khuvira idivai

miino keke ni malavu khuvira maveele kakhung'wetsanga.

13“Zabuloni aliitsa khumenya khuluchinga lwi inyanza.

Luchinga lwelwe lwenolo luliitsa khuva havundu hi tsimeli tsisinjilila.

Mupaka kwekwe kulitsa khutukha Sidoni.

14“Isakari ali ni tsingulu khuli tsi ipunda,

ichinganga musiko mulitoho khuluveka

yulu na kundi khuluveka lundi.

15Lwa yilolanga havundu ha ihulushila ni halahi

khandi khuli shivala shieshie shimuyaanzitsanga,

yinamanga ma itiukhwa misiko

khali ihuchilila khukhola mihinzilu khuli murukwa.

16“Dani aliitsa khwamiha vandu veve

khuli luhia lulala mu vandu vi tsimbia tsia Vaisraeli.

17Dani aliitsa khuva khuli inzukha khundulu khwi injila,

inzukha yu vutsiva vutamanu muno khundulu khu khunjila,

ilumanga luhakayi lwi ifarasi,

khu mundu uchihilanga akwila shiu mukongo.

18“Yivi Mwami Nyasaye, nindililanga umbonyinyi.

19“Vandu vanuuli valiitsa khukwana Gadi,

navutswa aliitsa khuvalonda nu khuvahitsanyinya.

20“Lusomo lwa Asheri luliitsa khwama viraakwa vinyishi.

Aliitsa khuha mwami shiukhulia shieshie shitushili.

21“Nafutali ali khuli impongo yilukhakanga

lwivulu lwelwe lulandanga, khu tsisia tsindahi tsiu musala.

22“Yosefu ali khuli musala ku musabibu kuli na matunda,

musala ku musabibu kuli na matunda himbi hasieveye,

kuli ni tsisia tsilandanga khu lisisi.

23Vatsiku veve vamukwanila mu vurima

nivamwilukhanyinya nu vura nende mivanu.

24Navutswa wasinjila nu vura vwevwe vwi tsingulu,

makhono keke kakholwa khuva ni tsingulu

khuvirila mu tsingulu tsia Nyasaye wa Yakobo, Witsingulu Tsiosi,

khuvirila khu mwayi, ulindanga Vaisraeli.

25Nyasaye wa tata wowo neye ukhukhonyanga,

Nyasaye Wuvunyali aliitsa khukhukasitsa yivi

ni ikhaavi yi imbula khurula mwikulu

nende matsi karulanga hasi mulilova,

Tsikhaavi tsi tsing'ombe tsinyishi nende vaana,

26Tsikhaavi tsia khusaalilanga ni tsindahi muno

khuvira lilaaka lia khwanyola khu vikulu viali viakhale

inoho vikulu vi mihika ni mihika.

Tsikhaavi yitsi tsiosi tsiliitsa khuva tsiotsio,

shichila uli mwimilili wa vamwavo vovo voosi.

27“Benyamini ali khuli shihulukhu shialula muno;

mu mavwevwe yiiranga vatsiku,

khandi halukolovo akavula vindu vianyoli.”

28Yitsi tsiosi natsio tsimbia likhomi na tsivili tsia Israeli, khandi yaka nako makhuva ka tata wavo yavavoolela lwa yavakasitsa, nakasitsanga shia mulala khu vaana veve vi shiyayi khulondokhana khuli kenyekhananga.

Likhutsa lia Yakobo

29Yakobo yavoolela vaana veve, “Nzitsanga khukhutsa vwangu yuvu. Muliitsa khunzeveela mu shilindwa halala na vakuuka vaanje muluhangaywa luli mu mulimi kwa Efuroni, wali Muhitse; 30muluhangaywa luli havundu halaangwangwa Makapela, khuluveka luli ivukwi wa Mamure, mu shivala shia Kanaani. Aburahamu yakuula luhangaywa lwenolo khandi mulimi kwenoko khurula khu Efuroni, wali Muhitse, khuva havundu wa vayeveela mivili chia vakhutsu vavo. 31Mivili chia Aburahamu nende mukhali wewe Sara chiayeveelwamu. Mivili chia Isaka nende mukhali wewe Rebeka chiayeveelwamu. Namwo mwa nayeevela mukhali wanje Leya. 32Mulimi halala nu luhangaywa lulimu viakuulwa khu Vaahitse.” 33Lwa Yakobo yali namali khuvoolela vaana veve mivaalo kenako, yakona hasi, nakhutsa.

Currently Selected:

LIRAANGA 49: LLLCATHOLIC

Highlight

Copy