LEVI 17
17
Vutakatifu Vuli mu Masahi
1Mwami Nyasaye yavoolela Musa, 2“Voolela Haruni na vaana veve nende Vaisraeli voosi: Mwami Nyasaye avoolanga, 3Shia mundu Muisraeli wosi, uliitsa khusinzila ichilishi inoho likondi inoho imbuli mu maheemo ka vandu vamenyamu, inoho ihale wene khurula mu maheemo ka vandu vamenyamu, 4vuchila khulera mu vwinjililu vwi Liheemo Litakatifu, khuhaana khuli shihanwa khu Mwami Nyasaye imbeli wi Liheemo Litakatifu liu Mwami Nyasaye -- mundu mwenoyo aliitsa khuva nasuunduli shisahi; khandi aliitsa khukhungwa khurula mu vandu veve. 5Yaka kaliitsa khwikholekha kario, nikanyalikha Vaisraeli valilera khu Mwami Nyasaye, vihanwa vi misango chia vamenya nivakholanga mu milimi. Valiitsa khulerela musalisi, nakhwo khuvoola, khu Mwami Nyasaye, mu vwinjililu vwi Liheemo Litakatifu nu khuchisinza, khuli shihanwa shiu khulera milembe. 6Musalisi aliitsa khumitsa masahi kenako, mu tsimbeka tsiosi tsiu vwaali mu vwinjililu vwi Liheemo Litakatifu nu khusamba, nu mulilu shivana khu mwayu kuhuunyanga vulahi nu kuyaanzitsa Mwami Nyasaye kunyoleshemu. 7Vaisraeli valiitsa khulekha khukholela imbuli yimililanga matimoni misango chia vamenya nivasaalakhu. Vaisraeli valiitsa khutsililila khulonda lilako yili, khumatukhu koosi kaliitsa khuvaho.
8“Shia mundu Muisraeli wosi, inoho mundu mucheni wosi wumenyanga Israeli, uliitsa khuhaana shihanwa shiu khusambwa, inoho khukhola musango kundi kwosi 9khuli shihanwa khu Mwami Nyasaye, havundu handi hosi vuchila khukholela mu vwinjililu vwi Liheemo Litakatifu, aliitsa khukhungwa khurula mu vandu vaanje.
10“Niiva mundu Muisraeli wosi, inoho mundu mucheni wosi wumenyanga Israeli, aliitsa khulia inyama ishilimu na masahi, Mwami Nyasaye aliitsa khumwambakhana nu khumukhunga khurula mu vandu veve. 11Vulamu vwi shindu shiosi shili mwoyo vuli mu masahi. Nashio shivune shichilanga Mwami Nyasaye, navoola ndi masahi koosi kaliitsa khusuundulwa khu vwaali, khusemeha vandu khurula mu vwoni. Masahi, kahaananga vulamu, kasemehanga vandu khurula mu vwoni. 12Nako kachilanga Mwami Nyasaye, navoolela Vaisraeli ndi vave vo inoho mundu mucheni wosi wumenyanga muvo avuli khuliakhu inyama yosi ishilimu na masahi.
13“Mundu Muisraeli wosi, uliitsa khuhiitsa muruku kwosi inoho linyonyi liu khulia, aliitsa khusuundula hasi masahi khurulamu, nu khukakhunikha na malova. 14Vulamu vwi shindu shiosi shili mwoyo, vuli mu masahi. Nako kachilanga Mwami Nyasaye, navoolela Vaisraeli ndi vavuli khulia inyama yosi ishilimu na masahi; khandi ndi mundu wosi, uliitsa khukhola kenako, aliitsa khukhungwa khurula mu vandu veve.
15“Shia mundu wosi, ave nu mundu Muisraeli inoho nu mundu mucheni, uliitsa khulia inyama yu muruku kwakhutsa inoho kwi inyama yumbulimu yiira, aliitsa khufuya tsinguvu tsietsie, khwisinga na matsi, khandi alindilile khutukha halukolovo, nashili khukholwa khuva munihu, khulondokhana khu mulukha. 16Navutswa niiva mundu mwenoyo, aliitsa khuvula khufuya tsinguvu tsietsie, nu khwisinga na matsi, aliitsa khusalila mwene.”
Currently Selected:
LEVI 17: LLLCATHOLIC
Highlight
Share
Compare
Copy
Want to have your highlights saved across all your devices? Sign up or sign in
© The Bible Society of Kenya, 2013